* من الأمثال السودانية التي اعتبرها مولانا محمد سيد حاج (عليه الرحمة) انهزامية وسلبية ، المثل القائل : (الخواف ربى عيالو) .. * خصص مولانا محمد سيد حاج واحدة من محاضراته الذكية للحديث عن هذا المثل وعن تأثيره على التربية السودانية .. * وتناول مولانا محمد سيد حاج المثل (الخواف ربى عيالو) من زوايا عديدة وخلص في نهاية المحاضرة إلى أن هذا مثلاً انهزامياً يكرس للتربية (الجبانة) التي تضعف الإيمان في العقيدة .. * تزرع الخوف في عيالك فتجعلهم يتخاذلون حتى في اللحظات التى تحتاج لشجاعة واستشهاد من أجل نصرة الدين .. * وربما بسبب هذا المثل الإنهزامي تسقط راية الجهاد في سبيل الله عند كثير من الذين تعاطوا هذا المثل منذ الصغر .. * وبذات النظرة التي نظر بها مولانا العارف بالله محمد سيد حاج لهذا المثل ننظر نحن بزاويا مختلفة لمقولة (نهواه في كل الظروف) .. * هذه المقولة التي كتبها دكتور عمر محمود خالد وصارت نشيد يتغنى به جمهور المريخ لا تقل خطورة عن المثل القائل (الخواف ربى عيالو) .. * بل إنني أرى أن (نهواه في كل الظروف) هي سبب مباشر في كل تعاسة أهل المريخ .. * (نهواه في كل الظروف) تبرير جاهز لسلسة فشل صار عنواناً لنجمة فكتوريا .. * تفسير مقولة (نهواه في كل الظروف) يعني أننا في المريخ نحب هذا الفريق حينما يكون منتصراً وحينما يكون مهزوماً .. * نحبو في لحظات الانكسار وفي لحظات الإنجاز .. * وبصراحة كده المريخ وتحديداً في ال(15) سنة الأخيرة (ظرفه واحد) .. * ما عندو ظروف كثيرة، بل هو ظرف واحد .. * زي الزول الوشو واحد .. * ظرف واحد متعلق بالانكسار فقط .. * وهذا يتطلب تغيير المقولة لتكون : (نهواه عند الانكسار) .. * وذلك لأن الانكسار هو العادة وما دون ذلك مستغرباً .. * يعني ما في إنجازات عشان تقولوا لينا نهواه في كل الظروف .. * إذا أراد المريخ أن يمضي إلى الأمام عليه أولاً أن يستغنى عن هذه النشيد الذي يكرس لثقافة الإنهزام ويضعف الانتماء عند اللاعب ويشجعه على التراخي .. * إتخيل فريق يتعثر أمام الخرطوم الوطني ويغنوا ليهو (نهواه في كل الظروف) !! * وقبل التعثر أمام الخرطوم سقط سهواً على يد الوفاق وغنوا له (نهواه في كل الظروف) .. * ثم سقط في الأبيض على (كراع الغزال) فغنوا له نهواه في كل الظروف .. * هسه إنتو ما ملاحظين إنو ده ظرف واحد ؟ * ما لاحظتو الحكاية دي ؟ * ما لاحظتو إنكم بتحبوهو في ظروف متشابه ذات اتجاه واحد هو الخسارة ؟ * والله لو الشعار بتاع (نهواه في كل الظروف) ده لو غيرتوا بعد هزيمة الوحدات الأردني مباشرة كان الحال انصلح .. * لكن فريق جاكم خسران بالسبعة استقبلتوا ب(نهواه في كل الظروف) .. * أها الهوا جاكم على الله بس تستحملوا .. * وده كلو هين .. * مسمار مهند ده بالمناسبة هين والله .. * الكلام قدام .. * الكلام المراكش المغربي .. * المباراة باقي ليها ثمانية أيام وإنتو عندكم ثمانية من اللاعبين مقفلين تلفوناتهم .. * وبالطريقة دي يفترض ما تخلو المراكش يتلتل ويجي البلد دي ساكت .. * في الأبيض جبتوا لاعبين من الرديف تميتوا بيهم التشكيلة بعد أن تمرد أولاد الهلال .. * وأنا خايف لما المراكش يجي يكونوا بتوعين الرديف ذاتم إتمردوا .. * والله صحي .. * إنتو لو ما ضامنين إنو عندكم حداشر لاعب ما بتمردوا أحسن تعتذروا لناس المراكش .. * أحسن تنسحبوا والله .. * أفرض إنو النعسان ومازن وبخيت خميس إنضموا للمتمردين ؟ * أها ح تلعبوا كيف أمام المراكش ؟ * ح تلعبوا ناقصين مثلاً ؟ * ما بتجي كده والله .. * ياخ إنتو لو تامين المراكش ده بضربكم رايح جاي خليك من تكونوا متمردين .. * الموضوع ده أنا شامي فيهو ريحة شلباية والله العظيم.. * غايتو الفرصة قدامكم .. * أمامكم أسبوع ممكن تحددوا فيهو الرأي النهائي .. * مدربكم البيدفع حق الفندق ده بصراحة قنع من خيراً في اللاعبين .. * قال اللاعبين بيختاروا المباريات على كيفهم .. * يعني اللاعب بيقول : (والله أنا مباراة هلال كادوقلي دي ما مرتاح ليها ما داير ألعب) .. * بيقول كده وطوالي بينفذ وبيزوغ من المباراة .. * بيزوغ عشان نفسياً ما مرتاح للمباراة !! * أ تقول قاعد يحب .. * يجي لاعب تاني يقول : (أنا حاسي بنفسي زهجان شوية ما داير ألعب مباراة أهلي شندي) .. * وينفذ إحساسه .. * ده الوضع كده يا جماعة في المريخ .. * والله صحي .. * والكلام ده ما قلتو أنا قالوا المدرب البلجيكي البيدفع حق الفندق من جيبو .. * لعيبة المريخ (بتخيروا المباريات) .. * بشوفوا المباريات الساهلة يلعبوها .. * ولما تجي المباريات الخطيرة يتموها بالرديف .. * عشان كده أنا قلت ليكم أخطر من مباراة المراكش ما في .. * وفي المباراة دي بتوقع غير جمال سالم ما تلقوا لاعب في المعسكر .. * لو كلام البلجيكي ده صاح أجزم ليكم يوم مباراة المراكش ما بتلقوا زول في المعسكر .. * بمناسبة المعسكر .. * إشمعنا يعني جمال سالم ما إتمرد ؟ * ده سؤال المفروض لعيبة المريخ يسألوا لأنفسهم ؟ * وأنا ما قاصد (الفتنة) لكن كمان الحق حق .. * السبب البخلي تراوري يتمرد وما يخلي جمال سالم يتمرد شنو ؟ * يكون جمال سالم (قبض تحت التربيزة) ؟ * الله أعلم .. * بس كل شئ وارد .. * عموماً .. إذا كان هلال الأبيض فيهو مهند الطاهر واحد أنا أبشركم إنو فريق المراكش فيهو (3) غزال و(2) وردة وواحد مهند .. * يعني بالحساب كده فيهو ستة مهند الطاهر .. * بس شوفوا ليكم فرد من شركة (الهدف) يحرس جمال سالم الحارسكم .. * وعلي فكرة .. غزلان المراكش بيلعبوا بالقدمين وبرضو بقلبوا هوبا .. * هوبا ب(الصاء) .. * و..و.. * وجيت أهنيك وأصافحك وجيت أقول ...(أنا بهواكي في كل الظروف) !!