هيثم مشى المريخ..الحضري سافر (فرانكفورت)..الكهربة (قطعوها).. بلة (سجّل هدف عكسي) تحدثت مرة عن الفيلم المصري (ابو علي) لكريم عبدالعزيز ومنى زكي.
وكنت قد تحدثت تحديدا عن مشهد (الزرزرة) التى كانت تضع فيها زوجة عم منى زكي (اطفالها)..وهي مجمعاهم في صف واحد بالشقة وبتحقق معاهم بغلظة عن (الشال الجبنة من التلاجة) ... وبتوريهم النجوم عز الضهر..وهي بين الفينة والاخرى تصرخ فيهم.
الشال الجبنة من التلاجة منو؟.
الشالها منو بس ؟...اتكلموا.
والاطفال في مشهد (رعب)..فظيع...يرجفوا متل (رايات) الكورنر يوم مباراة مازمبي.
قالوا ليك رايات الكورنر ديل بعد المباراة (راية) لقوها في (الكلاكلة) وراية لقوها في (الثورة الحارة 44) وراية لقوها في (الدروشاب)..وراية لقوها في (عد حسين).
هسع (الرايات) دي ما موضوعنا.
نرجع للفيلم.
منى زكي (الهاربة) من الشرطة كانت قد اقنعت كريم عبدالعزيز (الهارب) ايضا باللجوء الي زوجة عمها (يوم ..يومين) حتى يتدبروا امرهم.
كريم ومنى عندما وصلا شقة زوجة عمها ..وجدت الزوجة بتضع ابناءها في ذلك الموقف (البائخ) وهي بتسأل فيهم عن (الشال الجبنة منو من التلاجة؟).
وبتذل فيهم ذلة الكلاب.
ذلة موظف لي يوم (7) ما دفع قروش الاجار.
ادبة شديد.
طبعا احبط كريم عبدالعزيز من هذا المشهد ..واحرجت منى زكي التى كانت تراهن على زوجة عمها وكانت تفاخر بها امام كريم ..وقررا الخروج من الشقة بعد المقابلة التى قابلتهما بها صاحبة الشقة...وبعد هذه (الزرزرة) فالجواب بتعرف من (زرزرتو).
فمن تتعامل مع (اطفالها) على هذا النحو ..بالتأكيد لن تستحمل (هاربان) مطاردان من الشرطة...ولو لخمس دقائق.
اثناء نزول كريم ومنى من الشقة وهما على سلم العمارة ..قابلهم (الزوج) الذي تزوج من زوجة عم منى زكي بعد وفاة العم.
حالة الزوج وذعره ..جعل كريم عبدالعزيز يقول لمنى زكي : (انا عرفت مين الشال الجبنة من التلاجة).
و يعملوها الكبار ويقعوا فيها الصغار...زي (الكوبري).
طبعا (الكوبري) ما عندو اي دخل بالموضوع دا.
وانا ذاتي الكاتبو ما عارف الجابو هنا شنو في (الجملة) دي.
مرات في كلمات بتنط براها في العمود دا...زي (النضارة).
يمكن يكون جابوه ناس (الضرائب).
النضارة ذاتو ما كان في ليها داعي.
بنفس الفهم.
اعود واقول انا عرفت مين (القطع) الكهرباء من نادي المريخ؟...وقد اشرنا الي ذلك في مساحة الامس.
نعود اليوم بتفاصيل اكثر...بس تابعوا معاي يا جماعة ...وما تفكوا العدد.
الموضوع دا طويل.
قبل (استقالة) جمال الوالي ...كان قد استقال قبل سنوات رئيس نادي الهلال صلاح ادريس الذي تعلل وقتها بانه ينوي التشرح لاتحاد كرة القدم السوداني والذي ترشح فيه وسقط في الانتخابات ..وان كان الانتخابات لا (سقوط) فيها.
فان تسقط في الانتخابات خيرا من ان تأتي بالتعيين.
وهذا امر نحسبه لكل اقطاب الهلال ورجالاته الذين يرفضون (التعيين) جملة وتفصيلا.
لو جابوا لينا (147) لورد بالتعيين ما عاوزنهم.
وقد رفض صلاح ادريس العودة للهلال معينا بقرار وزاري ..وكان خياره للعودة صناديق الاقتراع...وكذلك رفض طه علي البشير ذلك اكثر من مرة.
وطه عنده ذلك الامر ..(مبدأ)..لن يكون رئيسا معينا للجنة تديّر الهلال وهو الذي جرب حكم الهلال (منتخبا).
بل ان قطب الهلال اشرف الكاردينال يحسب له رغم رغبته الاكيدة في قيادة الهلال ..وقدرته المالية الضخمة رفضه الكلي لأن يدخل نادي الهلال (معينا) رغم فشله في الانتخابات الاخيرة.
ونحسب ذلك للكاردينال وهذا موقف جميل منه..وتلك حسنة تميّز بها الهلالاب دون غيرهم.
والديمقراطية ...في الهلال ..امر نعيشه ..شيء نتنفسه ..لا شعارات ننادي بها ..ولا ندفع فاتورتها.
لذلك فان الامين البرير (المنتخب) افضل لنا من الف (لورد) يأتي على قائمة الوزير.
بقى الامين البرير رئيسا للهلال رغم كل الصعاب التى يتعرض لها ..ورغم التراجع الذي يعيشه الهلال فنيا وماديا.
لكن مع هذا نحن سعداء بممارسة (الديمقراطية)..وسعداء ان ندفع تمنها وان كان من نتائج الفريق.
في المريخ من عجب ..ان جمال الوالي الذي جاء (منتخبا) في اخر مجلس شرعي للمريخ ...استقال ليأتي (معينا) على رأس (لجنة) تخيّرها ..وقطعه بيده او قطعها من رأسه ..كما يقطع (القماش).
وعلى ما يبدو ان من خل عادته ..قلت سعادته.
وجمال الوالي خرج من المريخ بالباب ...وعاد بعد حين بالشباك.
نعود ونرجع للفترة التى استقال فيها جمال الوالي والتى سميت عند اهل المريخ بفترة (التقشف).
تقشف شديد ..قالوا ليك (الفول) بتموه موية.
ونظن قبل (تشريح) ذلك الشيء ...ان جمال الوالي جاء وسار على درب صلاح ادريس الذي (استقال) من رئاسة الهلال فاستقال جمال الوالي من رئاسة المريخ.
وكما سبق صلاح ادريس جمال الوالي في (الرئاسة) سبقه صلاح في (الاستقالة) ايضا.
غير ان الفرق يبدو واضحا بين الرجلين.
فقد سدت كل طرق العودة لصلاح ادريس من اجل العودة للهلال ...وفشل صلاح ادريس حتى في ان يعود عبر صناديق الاقتراع ..رغم الانجازات التى تحسب له في فترته في قيادة الهلال وان كان هناك اختلاف حولها.
الهلال استعصى على صلاح ادريس بعد ذلك ...وكان (السما قريب) لصلاح ادريس من ان يعود الي الهلال رغم (الديون) التى خلفها والصرف الذي رفع سقفه في الهلال ..وظن ألا قادر عليه إلا هو.
الامور في الهلال سارت ...وتقدم الف شخص من اجل قيادة الهلال ..والامين البرير الان يقود الهلال بعد ان جاء عبر انتخابات شرعية.
وفي الهلال ما في مشكلة ...اذا جاء اي شخص عبر (صناديق الاقتراع) يمكن ان يقود الهلال..ولصناديق الاقتراع عند الهلاليين احترامها ..وكلمتها ومكانتها السامية.
في المريخ يبدو الفرق شاسع ...كما يغني شاعر الحقيبة (ود الرضي) في رائعته (انا في التمني).
فقد حكم جمال الوالي المريخ لمدة عشر سنوات متواصلة ..كان جمال الوالي فيها الكل في الكل في المريخ.
هو المريخ ..وهو المجلس وهو نجم الفريق وهو اعلامه ...حتى اصبح المريخ يعرف به ..فقد كان يقال مريخ الوالي.
لتسقط كل اسماء المريخ ..وكل تاريخه وتعاريفه ..ويبقى المريخ بنيولك (الوالي) ...اذا هو مريخ الوالي.
في العشر سنوات تلك ...لم يستطع احد في المريخ من الاعلام او من الاقطاب ان ينتقد جمال الوالي ...واصبح لا وجود ولا اثر حتى لكبار المريخ ...ود الياس وعمر حجوج وغيرهم من رجال المريخ الذين اختاروا الابتعاد عن المريخ بعد ان اصبح المريخ مملكة مقفولة لجمال الوالي.
لكن مع هذا الغزل والثناء الذي كان يحظى به جمال الوالي كانت هناك (معارضة) خفية لجمال الوالي ..ربما حسبت في البدء انها من عصام الحاج ومن اخرين ...تجمع اولاد ام درمان او بعض الاصوات التى ارتفع صوتها في السنوات الاخيرة احتجاجا واعتراضا على جمال الوالي.
جمال الوالي ..بعد ان رفع سقف الصرف في المريخ ...وجعل اهل المريخ واقطابه لا طاقة لهم بهذا الصرف ..قرر ان ينسحب لبعض الوقت ليضع معارضته في موقف لا تحسد عليه ..ولينتهى نهائيا من بعض الاسماء التى كانت تشكل له بعض العقبات.
في ذكاء يحسد عليه ...قرر جمال الوالي ان يستقيل ..ليترك (المركب) بديونها تغرق ..وتغرق معها من يقودها عصام الحاج وازهري محمد علي ومتوكل واخرون.
ابتعد جمال الوالي (5) اشهر من المريخ فانكشف حال المريخ ...وتخلص في هذه الفترة من كل الذين لا يريدهم في مجلسه.
تخلص من الاسماء التقليدية ..والقيادات التى كانت تشاركه في القرار وفي الانتماء للمريخ.
ويمكن ان نحسب ذلك (تصفية) قام بها جمال الوالي بعد الاستقالة ليجعل عصام الحاج ومجموعته في موقف (تقشفي) قاحل ..جعل الاعلام والجمهور يسخر منهم ..والمريخاب كلهم يرددون سرا وعلنا (يا حليل الوالي).
لتعود نغمة (جمال الوالي رئيس طوالي) من جديد اوساط المريخ ..وترتفع النغمة حتى تصبح (حلما) واملا في ان يعود الوالي من جديد.
فقد كانت شهور (تقشف) عصام الحاج الاسوأ في المريخ...وقد اراد جمال الوالي ان يوضعه في هذا الموقف ...ليحن اهل المريخ لفترة جمال الوالي ..ويسعوا له.
في فترة ابتعاد جمال الوالي ...قام عصام الحاج بتسجيل هيثم مصطفى في كشوفات المريخ بعد ان تكفل جمال الوالي بدفع حافز التسجيل لهيثم ولعلاء الدين يوسف ..وقد اكتمل السيناريو في منزل جمال الوالي.
شال الشيلة كلها عصام الحاج ...وتحمل وزر القرار وتبعاتها ..واعتراضات الهلالاب ..وانتقاداتهم ...وحقيقة الامر ان تسجيل هيثم مصطفى شيء هندّسه جمال الوالي وخطط له...علما ان جمال الوالي قال في حوار صحفي ...انه لو كان رئيسا للمريخ لما سجّل هيثم مصطفى في كشوفات الاحمر.
وقد كان جمال الوالي يريد ان يكون فقط بعيدا عن الصورة ، ولو كان ذلك عبر (تمثيلية) الاستقالة.
مجموعة جمال الوالي في نادي المريخ ...كما جاءت بهيثم مصطفى جاءت ايضا بمحترفين ...مستواهم الفني اعادني الي وارد السودان من المحترفين سنة 1987.
مكسيم وسليمانو وموانزا ..هؤلاء جاءوا فقط ليوضحوا الفرق بين محترفي جمال الوالي ومحترفي عصام الحاج.
وقد كانت جماهير المريخ ..تسب وتلعن حظها كلما شاهدت مكسيم او سليمانو في الملعب.
ولا نحسب ان المريخ يمكن ان يستفيد من محترف مرتبه (100) دولار ...هذا ما يدخله بائع المياه على مدخل استاد المريخ اسبوعيا.
لا اعتقد ان دخول موانزا ومكسيم وسليمانو في كشوفات المريخ كان صدفة.
اكيد ان سليمانو ومكسيم وموانزا سوف يغادرون كشوفات المريخ في يونيو القادم ، اي ان كل الذي تبقى لهم مع جمال الوالي (17) يوم.
في جانب اخر ..افتعل عصام الحضري المشاكل ...واصطنع الغضب بعد استقالة جمال الوالي ...ليعود الحضري الي القاهرة قبل احدى مباريات المريخ الافريقية المهمة عبر (فرانكفورت).
هذه العودة لا اظنها صدفة ...ذلك فقط من اجل اضعاف المريخ ..واظهار ضعف حيلة عصام الحاج الذي دخل في (مناوشات) ومهاترات مع عصام الحضري ...الذي لا نستبعد عودته للمريخ ..ليؤكد ذلك ما ذهبنا اليه.
وهو ان انفعالات واعتراضات عصام الحضري كانت (مصنوعة)..وكانت فقط من اجل احراج عصام الحاج.
الفضيحة الاخرى التى ظهرت في عهد عصام الحاج ..وقدمته للرأي العام بكل هذا (التشقف) ..هو قطع التيار الكهربائي من نادي المريخ.
وهذا امر بسيط ..وغاية في التدبير لو ان الموظفين في النادي تداركوا الامر ...لكن يبدو ان الموظفين في نادي المريخ قصدوا ان يقطع التيار الكهربائي ..ليظهر عصام الحاج ومتوكل احمد علي في الشروق وفي قناة النيل الازرق وفي تلفزيون السودان القومي ليتحدثوا عن فاتورة كهرباء نادي المريخ ...ليقول المريخاب تاني : (والله يا حليل جمال الوالي).
في عهد جمال الوالي لو ان مجلس المريخ لم يدفع فاتورة الكهرباء لمدة (4) سنوات لما تجرأ احد في الهيئة وقطع الامداد الكهربائي من نادي المريخ.
لكن في عهد عصام الحاج ...يقطع التيار ...لأن جمال اراد ذلك.
لا اظن ان كل هذه الاشياء حدثت (صدفة).
التقشف في فترة جمال الوالي انعكس حتى (فنيا)..وبلغ الامر باللاعب بلة جابر ان يسجل في مرماه هدفا عكسيا ..لم يسجله كلتشى طوال فترته في المريخ.
هل هذا الهدف (البلاوي) برضو (صدفة)؟.
اننا نسأل فقط.
ومن حقنا ذلك بعد عودة جمال الوالي الذي تخلص من كل الوجوه القديمة في المريخ ..وابعد كل الخصوم بما في ذلك رجالات النهضة.
وينتظر بعد مجلس اللوردات ان يعيد جمال الوالي المقربين منه وقد اعلن عن عودة عادل ابوجريشة ..وينتظر صديق علي صالح وابراهومة..وكمال دحية ..وكل الذين يشجعون جمال الوالي وليس المريخ.
سوف يعودوا من جديد ليسطروا على المريخ بعد ان ابعدهم عصام الحاج ووصفهم بانهم لا يحسنوا حتى وضع الخيط في الابرة.
ابقوا معنا وشاهدوا فصول المسرحية ...فمازال في جراب الوالي الكثير.
ملحوظة : ولسه.
هوامش
لجنة (اللوردات).
قالوا ليك وقت لجنة تسيير المريخ يكون عندها اجتماع ...اللوردات ديل (موية صحة) ساكت بخسروا الدولة.
(17) لورد ...لو اي واحد شرب (قارورة) مياه واحدة عاوزين ليهم (17) قارورة.
دا غير (القهوة)...والشاي.
ونطلع نفطر ..ونرجع نكمل الاجتماع.
غايتو يا ناس المريخ لجنة تسييركم بقت اكتر من جماهيركم.
نحن ما كنا فاكرين المريخ دا مورط كدا ...عاوز ليه (17) لورد عشان يسيّروه.
سيرة بس.
الامين البرير براهو ...شغال في الهلال.
ديل (17) لورد.
كملتوا لينا (لوردات) البلد.
اسعار الفراخ كيف الايامات دي؟.
اتوقع تكون في زيادة في سعر الفراخ في (التسجيلات)
والغاز ذاتو ..ح يزيدوا لو المريخ عاوز يجيب ليه (محترف) من برة.
الكوكي بعد ان (صمت) في ايام التقشف.
رجع تاني يصرح.
(الصلعة) ذاتها بقت تلمع.
عصام الحاج دا كان منشفها معاكم شديد.
ايكانغا ..سنكارا ..ساني ...ثلاثتهم غير مجد في الهلال.
اتخارجوا احسن.
ايكانغا ..تقول متعاقد مع مطبعة كروت.
اي مباراة بي (كرت).
سنكارا ..لو بقى هداف الدوري في المباراتين المتبقيتن للدورة الاولى ما بنفع.
اما ساني ..فقد اصبح يكب لياقتو وفنياتو ..وخبرتو كلها في (التسخينة).
بالمناسبة ناس المريخ ممكن يسجلوا (ساني).
خليك عارف يا البرير.
في تحركات سرية نحو (ساني).
لكن مع ذلك ..يجب ألا يجدد الهلال لساني.
سادومبا ..اذا عاد للهلال بعد هذه السن ..مرفوض.
سادومبا ...(فيلم محروق).
خلاص ..الفيه خلصت.
وفشله في تجربته الاخيرة يؤكد ذلك.
كلتشي الي الان بيلعب بي روح (التقشف).
الزول دا يكون ترجموا ليه الحكاية غلط.
يكون فاكر عصام الحاج الي الان قاعد.
لو عاوز تجهجه اي لاعب في المريخ ....قول ليه عصام الحاج راجع تاني.
قالوا ليك بلة جابر نزل (10) كيلو في فترة عصام الحاج.
ضفر (7) كيلو.
نجم الدين (9) كيلو.
موسى الزومة (8) كيلو.
العجب (15) كيلو.
فيصل العجب ...باقي ليه في المريخ (17) يوم.
يا فيصل ..حضر الشنط.
وخليك على الباب.
انت يا فيصل نازل المحطة القادمة.
خلاص ..شبع هو ...تاني (كنبة) ساكت ما في ليك.
(200) الف دولار كلفة التعاقد مع الاهلي من اجل المباراة الودية لتكريم رئيس المريخ المنتخب (السابق) جمال الوالي.
