(500) مليون دولار لشركة المريخ متل احتراف بلة جابر في (باريس سان جيرمان) بعد مباراة المنتخب السوداني امام نظيره الغاني ...وبعد تألق (نزار حامد) في المباراة ...تحدث اعلام المريخ عن احتراف الطرف اليمين للمريخ السيد (بلة جابر) في فرنسا.
يعني يتألق (الصاقعة ) نزار حامد ..ويمشي (بلة جابر) يحترف في الدوري الفرنسي.
شفتوا ...(الحقارة) دي كيف؟.
الوكيل الما عندو نظر دا ...ما شاف (نزار حامد)..كورة وطول وسن صغيرة وابداع.
ما شاف (الصاقعة) عشان يختار (بلة جابر).
زي (ود الرايح)..يدخل ليك السوق من الساعة (10) صباحا ..يلف السوق دا ..محل ..محل.
ما يخلي ليه حتة.
يمشي الجزارة ..ويمشي محل الخضار ...ويمشي محل الفواكه ..يقيف في التفاح ..والبطياخ.
يمشي البوتيكات ..ينزل ليك (الاقمشة) دي كلها...قماش ..قماش.
من (10) صباحا ..يطلع ليك من السوق الساعة (خمسة)..شايل ليه (كيلو موز).
يا (ود الرايح)...هسع انت من عشرة صباحا لي خمسة مساء ..لافى السوق دا كلو عشان (كيلو الموز) دا.
(ود الرايح)..يعاين للموز كدا ..ويقول ليك : (انت قايل الموز دا اي زول بجيبو ..الموز دا انا لافي ليه من عشرة صباحا).
طيب يا ود الرايح انت وقت عاوز ليك (كيلو موز)...البوديك (الصايغ) شنو؟..عاوز شنو بالدهب؟.
ود الرايح تاني يقول ليك : (انت قايل الموز الشايلو دا انا موز ساهل ...الموز دا ما بيجبو اي زول).
هسع الوكيل الغاني الما عندو رأس دا ..شاف نزار حامد (الصاقعة)..وشاف الغزال مهند الطاهر ..وبشة وكاريكا ...وقال عاوز (بلة جابر).
المعنى (كيلو موز).
المريخاب هنا طبعا حددوا لينا عبر الاتصال مع الوكيل الغاني النادي الذي سوف يلعب فيه السيد بلة جابر في فرنسا.
في ناس قالوا ح يحترف مرة واحدة كدا ..في (باريس سان جيرمان)..مما جعلنا نسأل نحن هنا في الخرطوم ...عن القعد الذي جاء للسيد بلة جابر.
وطالبنا ان يترجم العقد من اللغة الفرنسية الي اللغة العربية (عشان ما يتفاصحوا لينا ساكت) ...حتى تتضح ملامح العقد ...فقد يكون العقد الذي جاء لبلة جابر من (باريس سان جيرمان) عقد (مشجع) محترف ...وليس لاعب كرة قدم.
او احتمال عندهم (كشافة) رايحة.
او قد يكون عاوزين يدخلوا (خدمة) الهدف العكسي في الدوري الفرنسي.
الاهداف العكسية بالمناسبة ممتعة ...وجميلة...(احلي من الاهداف الما عكسية).
بلة جابر الذي رشح في ديسمبر الماضي للاحتراف في (باريس سان جيرمان) مرشح الان لمغادرة المريخ.
والله بلة جابر دا يتشطب من المريخ ...نحن رأسنا يتقطع.
اوعكم تشطبوه ..إلا بلة يا جمال الوالي.
بلة جابر ربما يغادر المريخ (مشطوبا) ...وليس (محترفا) الي الدوري الفرنسي.
بنفس هذا الفهم (البلاوي) الدقيق...اعلام المريخ (السالب)..مازال يتحدث عن (متفرقعات) لجنة التسيير ..التى حددت فترته ب (4) شهور فقط ، مع ذلك قالوا عاوزين يحوّلوا نادي المريخ الي (شركة مساهمة)..رأس مالها (500) مليون دولار.
الكترابة يا حسن فاروق.
دي ..شك.
عاوزين يكبوا لينا قروش البلد كلها في المريخ.
الي الان ما شفنا لينا اي (دولار) في شركة المساهمة تلك.
كدا انتوا يا جماعة انتظروا (ضخ) نفط الجنوب ...من بعد اتحدثوا عن (شركة المساهمة) دي.
اصبروا الظروف ما معروفة ...البلد داخلة لمرحلة خطيرة.
نائب رئيس نادي المريخ ...الذي قال انه (ما بقرأ جرايد)..قال سوف نؤسس شركة رأس مالها (500) مليون دولار.
دا طالع من وين؟.
والله لو بتقرأ جرايد ...ما بتقول كلامك دا.
الزول دا عايش وين؟.
ما اظن عايش هنا ..ولا عارف البلد حاصل فيها شنو؟.
يكون اخر جريدة شافها ..قبل الانفصال.
الطريف في الامر ...ان الزول (الما بقرأ جرايد دا) ...قال انه لن ينزل انتخابات وانه سوف يكتفى ب (4) شهور في لجنة التسيير.
حالتو دي ما بقرأ جرايد.
لو بتقرأ جرايد ..وبتدخل نت ...(ساعة ونص)..ما بتقعد في اللجنة القاعد فيها دي.
وفي ال (4) شهور ...الزول (الما بقرأ جرايد دا) ...ح يحول المريخ الي شركة مساهمة.
لا بالله.
عشان بتحول ليك.
انتوا قايلنو (موقف شروني)..تحولوا فيه من حتة لي حتة ..تقول (تربيزة).
احسن تحولوه شركة اتصالات ...(اضمن).
افضل على الاقل ..دا جن بتعرفو.
او اعملوه شركة (مواصلات)..جيبوا ليكم (10) باصات سفرية ...ومسكوا اي لاعب بص عشان يسوقو ليكم.
الجماعة بدأوا يتكلموا قالوا (4) شهور ما بتمكن هذه اللجنة عشان تعمل ليها حاجة للمريخ.
لذلك لا بد من (التمديد) للجنة.
زي ما طلع (بتاع التقشف) عصام الحاج ..وقال جددوا للجنة التسيير عشان تقدر تحقق اهدافها.
عصام الحاج (بتاع التقشف)...ضاق قرصة (عداد الكهربة)..لذلك تاني نادي المريخ دا لو فيه (عرس فيصل العجب)..ما بدخلو.
زولكم ارتاح ..يا دوب.
وقت عصام الحاج كان في المجلس ..سعيد السعودي ..عذبو ليك بالمسكولات.
عاوزين المرتبات.
عاوزين حوافز الانتصار.
عاوزين تلج.
عاوزين سمك.
عاوزين (شنكارات).
عاوزين (رصيد).
عاوزين (كهربة).
عاوزين (حقنا).
كل يوم سعيد السعودي طالع ليه بي حاجة ...هسع عصام الحاج ارتاح من الكلام دا.
لذلك طلع عصام الحاج وقال ..الوزير لازم يمدد للجنة.
والوزير قاعد على (الهبشة).
يقولوا ليه : مدد ..بمدد.
ما تمدد ..ما بمدد.
لا بجدع ولا بجيب الحجار.
الطريف في الامر الوزير ..الجاب اللجنة دي ..في حوار في الغراء (اليوم التالي)..قال زمان كان بغني في المدرسة.
الشيء الطبيعي بعد الكلام دا ...الزول دا يكون بغني ( الطاغية الامريكان ليهم تسلحنا)...او على الاقل (جدودنا زمان وصونا على الوطن)..دا الشيء الطبيعي ..او الحاجة المفروض يغنيها السيد الوزير.
عارفين الوزير كان بغني شنو؟.
الكلام دا حسب كلامو.
الوزير دا قال كان بغني ( حبيبتي بستطلفها)...تصوروا.
اغنية الفنان احمد الجابري ..وهي من كلمات الشاعر (عوض جبريل)..الوزير ما بكون عارف الكلام.
يمكن يكون برضو ما بقرأ جرايد.
لذلك بعد الاغنية (الحنينة) دي ..قنعت ليك من الوزير.
دا ح يقولوا ليه : مدد.
بمدد طوالي.
يقولوا ليه : ما تمدد.
ما بمدد.
الزول في اليد.
لكن بس ..بغض النظر عن التمديد ..او عدمو ..نزلوا ليكم (اسمنت).
