صباح الوعد ياوردي راجينك علي عتبات الغُنا الصاحي وعلي صحوة غُنا الثورات وغلطان من يقول غبت أو يقول صوت الورد فات خيل غُناك مسروجة علي قِبلة مستقبلاً مكتوب علي دفتر الجايات حتي الدروب واضحات مرسومة بِحرفة مقْرية بعِرفة وبكل اللغات مين في البلد ما أتعلم كيف منك بلسان شعبو يتكلم حتي الجنوب الفرز كومو ما فصل من هواك وجدانو وذكري ضحكة د. جون معاك في حفلك الساهر يوم السهر لخير ويوم النضال حفلات وصوت غُناك مدافع وسيل تدك ذي ديل المِننا منعوك ويوم الشعب جاييك إتلملمو وجوك إتمسحو بفنك وإتبركو في واديك بس كيف يزيلو الفات الفي غُناك موثوق وياشعبنا من عاداك لايمكن يكون منك وياوردي ياساخر من مساخر القوم شايفك يوم ختوك وحولك الأحباب يدعولك الفردوس مستغرب علي الجايين من بطانة القوم وشايفك مآدي للخراب إيدك: (إيه جابكم؟) لاكنت يوم منكم لادخلت في نصكم لاليكم غنيت يا الشردتو افراحنا يا الكسرتو لوحاتنا يا الغرقتو آثارنا وحضارة كمين قرن دة مهما يغرق الغافلين في بحر حسن الظن لايمكن يكون ذي ديل ناس بتعرف الفن فيا النًصبتو (زنان) مطرب علي السودان مصطفي ووردي عركي وزيدان أسامي أكبر من التزوير غٌنا وأشواق،معرفة وتنوير تهذيب عواطف الناس مشروع للتغيير *** فيا وردي يافنان يا مٌلتزم جانبنا كل ما البلاد بتضيق نلقاك فارسنا تأخدنا بصوتك لسكة الآمال ما وقفت بْيِن بْين ولاإهتزيت بين محكمة وسجان ياقمر سماء الأوطان يا نجمة السكة ياهادي في التوهان لاضَلْلَت ولا ضليت بإرادة حب دخلت كل بيت ذي التقول حالف من يوم تبيت تكون حق كل زول يامفرق الاحزان يا دنيا وردية يا غٌنية صِبا العاشقين ياحلاوة الحرية **** ياوردي يا أٌمة لاغبتَ لا إتواريت يا الفي البلاد طفت ولكل زول لاقيت حتمر مع الأنسام وتشق مع النيلين في جناح الطير إسم عابر في بلا د لسة في غناك مليون ميل وياوردي يافنان يازعيم ويا أٌمة كل ماتكبس علي الأنفاس الضَلمة والغُمة بتسندنا غنواتك وننده ليك وكل مايفرحو العشاق بنلقاك ونشتاق ليك
