بالعربى الكسيح محمد الطيب عمر بخيت .. كبير آخر سقط من نظر الجماهير !! * كثير من الناس تجد أعمارهم صغيرة ولكن تصرفاتهم كبيرة .. * والعكس .. هنالك من هم في عمر النبوة ولكن تصرفاتهم صغيرة جداً .. * زي صلاح ادريس مثلاً .. * تصرفات الارباب و(المكايدات) التى تبدر منه لا تتماشى وعمره ..
* العمر يفترض يكون عندو هيبة يا أرباب .. * التصرفات وردة الفعل هى وحدها التى تجعل الناس تحدد (فلان ده كبير وألا صغير) .. * ناس كبار لكن صغار في نظر الناس .. * تلقى الزول طاعن في السن ولكن تصرفاته (تحبو وتلعب بالتراب) .. * حسن التصرف والحكمة هى (رأس مال) .. * وهذا الشعب الكريم يكن كثير من التقدير ل(المظلوم) ولا يتعاطف مع الظالم وهذا أمر متفق عليه .. * الذي قادني لهذه المقدمة هو (عمر بخيت) .. * وعمر بخيت هو صديق قديم واخ حبيب نكن له كثير من التقدير ونحفظ له تلك التضحيات والوفاء والادب .. * ولعمر سنوات مضيئة مع الهلال بذل فيها كثير من العرق وبعض الدم فصار من المهمين جدا في تشكيل الهلال .. * واستغناء الكاردينال عن خدمات عمر بخيت ومهند ومعز تمت بطريقة أقل ما توصف بها انها(بايخة وسخيفة جدا) .. * غدر الهلال بالثلاثي المذكور في اللحظات الاخيرة بعد ان جدد عقد بشة وبوي وبكري الذي غدر بالهلال وذهب للمريخ .. * وبما ان الكاردينال رفض تجديد عقودات الثلاثي كان من الواجب ان يدفع متأخراتهم واستحقاقاتهم المالية .. * هذا حق .. * وأدب الهلال كان يفرض على الكاردينال منح كل صاحب حق حقه .. * سيما وان عمر ومعز ومهند لم يقصروا مع الهلال وقد خرجوا من الكشف دون تكريم او مهرجان .. * انا اقول ان الكاردينال (تلوم) كثيرا في عدم دفع استحقاقات اللاعبين الذين انتهت فترتهم مع الهلال واللاعبين الذين تم شطبهم .. * تلومت يا أشرف عديل .. * ولكن هذا إطلاقا لا يبرر ما اقدم عليه عمر بخيت .. * انا عارف يا جماعة إنو الحق حق .. * وما في زول بخجل من حقو .. * الحاجات دى انا عارفه كويسه .. * ما فايته علي .. * عمر بخيت او اي شخص اخر من حقه ان يطالب بحقه .. * ولكن سنوات عمر بيخت مع الهلال اكبر من ال(150) مليون .. * يعنى لما الكاردينال طلع كعب المفروض عمر بخيت ما يبقى كعب .. * كان تكون احسن منو .. * برجع وبقول انا عارف الحق حق .. * واي زول من حقو يطالب بحقو .. * عااااارف .. * لكن برضو عمر بخيت ما كان له ان يشتكي الهلال .. * عمر بخيت الذي تدرج حتى بلغ مرحلة قائد للهلال غلط وهو يشكو الهلال ويطالب ب(150) مليون .. * لولا الهلال لما كان عمر بخيت .. * ولولا جمهور الهلال لما كان المعلم الصغير .. * طبعا ما في زول بيقدر يقول : (لولا عمر لما كان الهلال) .. ما في زول بيقول كده لأنو عمر ما جاب الابطال للهلال ولا جاب كأس الاندية .. * أنا اكاد اجزم ان عمر بخيت غير محتاج لهذا المبلغ في الوقت الراهن .. * عمر الذى سجل لاهلي الخرطوم قبل (15) يوما من الارجح انه قبض (700) مليون وهذا يعني انه غير (مزنوق) في مبلغ (150) .. * ما مزنوق .. * وشهر ستة سينتقل عمر للمريخ بمبلغ مماثل (700) مليون .. * يعني بالبلدي كده ما كان يخرب عمر وجهه مع الهلال بهذا التصرف المشين .. * تاني برجع وبقول : انا عارف الحق حق .. * ونحن لا نطلب عمر بأن يتخلى عن حقه للهلال .. * ننتقد عمر في تصرفه هذا حبا في عمر . * كنا نتمنى ان تكون صورة عمر افضل في نظر جمهور الهلال .. * دايرين عمر يكون هو المظلوم .. * دايرنو يطالب بحقه بعيدا عن الاعلام وبعيدا عن المحاكم . * قد يكون عمر طالب بحقه مرارا وتكرارا دون ان يستجيب المجلس .. * قد يكون .. * ولكن بعد هذه الشكوى خسر عمر بخيت خسارة لا تعوضها هذه ال(150) مليون .. * ممكن القانون يمنح عمر بخيت حقه كاملاً بطرف الهلال .. * بالقانون عمر ح يشيل ال(150) مليون .. * ولكن هل بالقانون يستطيع عمر بخيت ان يعيد صورته الزاهية في اذهان الجماهير ؟؟ * تاني ما في قوة بتصلح صورة عمر في نظر الجمهور بعد هذه الشكوى . * كنا سنجد لعمر بخيت العذر لو ان المبلغ هو (مليار جنيه) . * ولكنها (150) مليون . * تخيل لو ان عمر بخيت خرج بتصريح قال فيه : (قروشي بطرف الهلال تبرعت بها لصالح تعمير مسجد الهلال) ؟؟ * تخيل لو عمر بخيت خرج بتصريح قال فيه : (قروشي بطرف الهلال مساهمة مني لاعداد الهلال) ؟؟ * يا جماعة والله العظيم انا عارف الحق حق .. * عارف إنو عمر محتاج يأكل ويشرب عشان كده لازم يشيل حقو .. * الكلام ده كلو انا عارفو والزمن صعب والظرف الاقتصادي وتأمين المستقبل و.و. .. * عاااااارف والله .. * لكن الحياة دى ما كل حاجة فيها قروش . * في حاجات لو إتكسرت القروش ما بتصلحها .. * حاجات لو اتكسرت ال(150) ما بتصلحها يا عمر بخيت . * عمر زعلان عشان كده اشتكى .. * وعمر خسر نصف جمهور الهلال وسيخسر النصف الثاني شهر ستة عندما ينتقل للمريخ ..