محمد عبد الماجد دق الدلجة اول مرة اشوف لي زول بجيب ليه هدف (دبل كيك) بي رأسو نحن ما لعبنا في برشلونة. ولا قعدنا في كنبة الريال. إلّا حافظين برشلونة ..وشاربين الريال. نفتهم ليكم زي (الضمنة). نيمار بطرف ..ميسي بخترق ..وانسيتا بجي من الخلف. بالنسبة للريال رونالدو (بجيك عديل) لا بلف ولا بتلولو. ولا بلعب. عارفنهم نحن. نحن ما دخلنا الكشوفات ..لكن نقشنا (الفيلم). كمان نحن لو ما قرينا ..براينا الطلبة…(من حفلة لي حفلة). ما متنا ..كن شقينا المقابر …(في انصاص الليالي). القبور دي نجي فايتين فيها ولا بنرمش. عندنا (كرت). وقبل (الكرت) كنا بنحضر المباراة في الدكان. اصلو ما فايتنا حاجة. وكنا بندك المذاكرة يوم تكون في مباراة. وبكريتها عادي نتجلد في طابور الصباح. ولمن تكون بكريتها تاني في مباراة. تاني كنا بندك المذاكرة. لو علقونا في باب حوش المدرسة ..ما بنخلي عادتنا دي. ولا بنتراجع منها. ولا بنجامل. هي عليكم المدارس دي فيها شنو غير (الدك). الواحد لو ما اتعلم (الشيطنة) في المدرسة ..شن فايدة تعليمه؟. شن فايدة قرايتو. تابعنا ماردونا وقت كان بشيل لي امو (طبق الكسرة). وبجيب القون بي ايدو ..وبيشيل بيه (كأس العالم) ما كأس دورة الفقيد. ماردونا بختلف عن بيليه وعن ميسي وعن رونالدو انو جاب (كأس العالم) بي (ضارعو). جابو بي (ايدو). تاني يعمل للارجنتين اكتر من كدا شنو؟. وشفنا بيليه لمن كانوا برسلوه للبن ..بدفقوا برة ..وبجي شايل (الجك) فاضي. امو تعلقو ليك فوق (المزيرة). ينوم بي دقتو ونخرينو جارية زي خور ابوعنجة. الحاجات دي كلها شفناها. وحفظناها. وعرفناها. حكوا لينا بالغولة. وبنات السلطان. وفاطمة السمحة. ما خلينا حاجة. حضرنا حفلات محمد وردي…وكنا وقت يغني (كدا اسأل قلبي عن حالي.. اسألو ..ينبيك عن سؤالك اشواقي.. اسألو)…وقت وردي يغني الاغنية دي..اللابس ليه (عمة) بحرقها. والعندو (كرفتة) بجدعها. والحضر بي عربية بيرجع (كداري). والعاوز ليه قروش من زول بخليها ليهو. كنا بنقيف في صف (نادي الضباط )عشان نخش حفلة محمد الامين. الواحد فينا كان لمن يدخل حفلة محمد الامين ..بطلع من الحفلة زي (العريس). بشعر انو الدينا دي كلها بتبشر فوق رأسو. الفرحة تقاسمو الشارع. حضرنا حفلات (عقد الجلاد)…وقت حفلة عقد الجلاد بحجزوا ليها قبل (21) يوم. ولمن تلقى ليك (تذكرة) لحفلة من حفلات (عقد الجلاد)..بتمشي تشوف ليك (عنبلوك) عشان تكرم للتذكرة. اكلنا الفطير باللبن. وقرّضنا (الفطير) بدون لبن. واتفننا في الدنيا دي جنس تفنن ..شربنا (اللبن) بدون فطير. الواحد ينتظر ليك (طرقة) الفطير من الصاج ..وقبل ما تمشي على (الطبق) تلغفها في (خشمك). وامك ولا بتقول ليك حاجة. والفطير باللبن يخليك اليوم كلو تمصمص في اصابعينك. وتمسح في شلوفتك. مرة الفوق. ومرة التحت. وانت فرحان ..ما سائل في زول. عملنا اي حاجة. وشفنا اي شيء. طلعنا العصر ..ومشينا البحر ..وغرقنا (71) غرقة في البحر والواحد لمن اهلو يزرزرو يقولوا ليه يا ولد انت كنت وين؟..مالك اغبش كدا…متل (شوال) الطاحونة بتاع الدقيق. كنا بنقول ليهم كنا في (الخلوة). ولو قعدوا يغالطونا بنقرأ ليهم (يس). يس بتمرقنا بي غباشتنا. عملنا اي شيء. اتعلقنا في فروع الشجر ..والفرع اتكسر بينا. الواحد يقع ليهو من شجرة ارتفاعها (7) امتار ويقوم زي الحصان ما عندو اي حاجة. وقعنا من رأس البيت ..وقمنا بي دوشتنا ..عشان ما يدقونا. عشان ما في زول يسألنا. ما خلينا لينا (طيرة). شايلين لينا (نبلات) ..من شجرة لي شجرة. القمرية البنشوفوها بتقع معانا. لو بقت (منظمة دولية) تاني ما بتمرق مننا. مشينا الحفلات ..ووقفنا في اخر صف ..لكن شايفين اي حاجة. البعزمونا ليها والما بعزمونا. بكريتها نتلفز (الحفلة) كلها. الكانت بترقص ..والكانت قاعدة ساكت ..والكانت واقفة ليها مع زول. ما بنرحم. ولا بنجامل. حصص (الكيمياء) بي صراحة كنا ما بنفهم فيها حاجة. وكنا بنعتبر (الفيزياء) دي كلام فارغ ..ولا في داعي ليها. كل الحاجات دي عملناها. وحددنها لي للخلا. اتشكالنا. واطالعنا. واتفلقنا. ودفنا (العصا) في كوم الرمال. وسكينا (ابودنان). اكلنا (القطا). وغنيننا لي (ام قردون يا الحاجة). لكن والله يا جماعة هدف زي هدف (بوبكر كيبي) دا ما شفناه. ولا سمعنا بيه. يا جماعة شفتوا ليكم زول بيجيب ليه (هدف) بي الصفحة. بي لفتة. تقول نقاش. انا لو ما شفتوا الكلام دا كنت قلت طلع ليه في (سقالة). او على الاقل نزل ليه بي (برشوت). شفتوا ليكم هدف ب (الهيد) ويكون (دبل كيك). دي (كيمياء) بتاعة شنو؟. الفيزياء دي جنسها شنو؟. الكلام دا في (كابتن ماجد) ما شفناه. الحاجات دي ما قابلتنا. ولا سمعنا بيها. ولا حكت لينا بيها الحبوبات. ولا شفناها في قصص الف ليلة وليلة. ولا في افلام الكرتون. ولا في الواتساب. الكلام دا كلو ما حصل. ولا كان. ولا ببقى. بوبكر كيبي دا (اطهر الطاهر) عكس ليه كورة ..وكيبي كان متقدم ..الكورة وقعت وراه. الزول دا خلى جسمو قدام ..ورجع بي رأسو. قام كدا قلب ليك الكورة في الشبكة. انا اول مرة اشوف لي قون بالطريقة دي. قون بتاع (غرف). زي الزول العاوز يغرف ليه (دمعة). عمل كدا ..وجاب ليك الكورة بشعور خلفي منسبق من العصب الوجداني. في اللحظات دي الملعب كلو قال الزول دا ما نصيح. الزول دا جنّا. الزول دا عاوز يعمل شنو؟. الزول دا ما هنا. اتاريه الزول دا كان عندو فهم. اتاريه كان عندو احساس براهو. جلب ليك الكورة زي (الصورة)..ومحورها ليك في الشبكة. حارس كي ام كي ..قدر ما بلع (ريقو) ..بلع ليه صفيحة بتاعة (ريق) برضو ما قدر يعمل حاجة. قدر ما اتمطّى ليك في (الجو) عشان يجيب الكورة ..ما قدر يجيب حاجة. زي الزول العاوز يتغطى بي (بطانية) مقصرة. يقعد الليل كلو يجابد فيها. يغطي الرأس ..الكرعين تظهر. يعمل العكس ..الرأس يظهر. كدا فتشوه. كدا اتبنوه. كدا اسألوه. شوفوه ..الزول دا بكون على الاقل في الحركة دي فقد ليه (13) سن و (4) ضروس. نحن القاعدين برة هبشنا (سنونا) لقيناها ناقصة. لو كمان ما (الجقور) دي كان قمنا عملنا بالغ .. لكن خفنا يقولوا لينا يا جماعة انتوا ما عندكم عقل؟. الكوبري البي اسمنت وسيخ وطوب ..اتصدع بي سبب (الفئران)..انتوا قون (كيبي) دا ما عاوزني يخلع ليكم سنونكم. غايتو قون كيبي دا ذكرني ليك بالضباح الحريف. الجزار المفتح. الجزار الاول حاجة بشرب الخروف مية. وبعد كدا بيضبح. ريحة الشية ظهرت. اها لو ما ساي ريحة الشية دي جات من وين؟. ح تقولوا لي من (عزام). عزام دا شغلو براهو. …. و عندي فكرة. جيبوا ليكم (حمام) ..واعملوا ليكم منو (شوربة). اشربوا الشوبة واضربوا الحمام. اعمل ليكم شنو لكن؟. عزام يضربكم اتنين. نحن عزام دا ما حذرناكم منو؟. ما قلنا ليكم. اقول ليكم حاجة. جيبوا ليكم (ديك). قصوا اجنحتو. وفكوه في الحوش. اقول ليكم شنو عاد؟. تتغلبوا لي من (عزام). والله لو ما قون (كيبي) دا شرقني ..ما كنتوا الليلة بتمرقو مني. مرقكم قون كيبي الدبل كيك. لكن ما بينا. جيبوا ليكم (عنبلوك). احشوه (رز) قبل ما تضبحوه. واعملوا شية جمر. اسوي ليكم شنو تاني؟. الكلام غلبنا عديل كدا. … و…. السيدة (ل)…(الاتنين) الليلة وين؟. وقرّض على كدا.
