العتب مرفوع هيثم كابو (فول) النصيحة ! * في البدء لا بد لنا أن نقول إن الهلال لا يلعب باسمه ولا يمثل نفسه، لذا الواجب علينا مناصحة رئيسه أشرف سيد أحمد الكاردينال ومعارضيه، فأمام الفريق مباراة مصيرية أمام اتحاد العاصمة الجزائري والوقت الآن لا يسمح بتبادل الهجوم حتى ولو قام كردنة بتحويل (سيخ) الجوهرة لمنزله، فهو صاحب السيخ بمثلما أنه صاحب المنزل، لذا فقد رد عليكم الرجل بتصريح استفزازي قال فيه : "الفول فولي سأزرعه وحدي وساكله وحدي" ..! * بصراحة : ما يحدث في الهلال هذه الأيام من تراشق وما نسمعه من تصريحات وسخرية أسوأ من دفن الفريق داخل مقبرته بثنائية ..! * يا جماعة التور كان وقع كترة البتابت عيب، و(السيخ) كان انقلع ما بنفع الجقليب ! * العلاقة بين الهلال والكاردينال علاقة حب وانتماء وتاريخ، والموضوع أكبر من (الفول والسيخ) ..! * لا يعقل أبداً أن يكون الناس ببلادي قلوبهم مع الهلال والمريخ، و(ناس الهلال قلبهم مع السيخ) ..! * يا جماعة استهدوا بالله موضوع السيخ ما أولوية، وإذا كردنة حوّل السيخ لمنزله فهذا تأكيد على أنه لا يفرق ما بين بيته والجوهرة، و(كفاية ملاسنات لانو الموضوع دا بخليكم مسخرة) .! * بيت زعيم أمة الهلال لا فرق بينه وبين الجوهرة الزرقاء و(هسه لو لاقيتو سموحة السنة الجاية واحتجتوا لتفعيل التوأمة و"عشاء عمل" حتعملوه في الجوهرة ولا في بيت كردنة) ..؟ * وتيب ..! * غايتو ربنا يدي (سيد الفول) العافية الراجل شغال ليكم وللهلال، و(انتو شغالين تكسروا في المقاديف ودا شغل بطال) ..! * ثقتنا في (سيد الفول) كبيرة فالرجل صاحب قلب واسع، ولن يقف كثيراً عند نقل السيخ لأنه لا يهتم بسفاسف (الفول) ويسعى لصناعة تاريخ .! * لمصلحة الهلال ما تستفزوا (سيد الفول) أكتر من كدا لانو بصراحة الزول دا بعمل في مجهود خارق، وممكن لو زعل يشيل (القدرة) ويبقى مارق ..! * صاح السيخ ودوهو بيت (سيد الفول)، وصاح الهلال في المقبرة انضرب، لكن يا الرشيد كمان القال (فولي) غلب ..! * يا جماعة ركزوا مع النقلة التي سيحدثها (سيد الفول) لكم حتى تصبح الجوهرة منارة شامخة على مر التاريخ و(سيبكم من البطاحات الشالت السيخ) ..! * انتو (ناس عودية) شالوا منكم النقاط وما حركتوا ساكن من أجل الهلال، خلاص يا مزمل القصة بقت على شيل السيخ المشى بيت الكاردينال ..!؟ * إستادكم (مقبرة) وللخصوم (معبرة) دايرين بالسيخ شنو، إلا عايزين تعملوه (شاهد) ..! * ثنائية أخوان (عيدية) ماهي إلا (شاهد والضحية) ..! * يا جماعة السيخ ما أولوية في المقبرة ومفروض الناس ما تستعجل وتفهم الحاصل قبل ما تهاجم الواحد ..و(يا (سيخ) ابقالي شاهد) ..! * هسه بصراحة كدا أشرف دا بِخِل عليكم بشنو .. حرمكم من شنو عشان تقيفوا ليه في حلقو زي السيخ، و(بيت أشرف ما بيت الهلال عشان كدا مافي داعي تدوا الموضوع أكبر من "سيخو" وتزعِلوا الكاردينال) ..! * الكاردينال لو زعل بشيل الأسمنت مع السيخ وبخليكم في (الصفر) ..! * يا أشرف شيل القدرة وفولها و(خليهم صفرنجية كدا خالي بطولة) ..! * أشرف لو زعل وشال القدرة ممكن الاتحاد يديكم (كمشة) أقصد (خمسة) ..! * يا وصايفة خلونا في الكورة ومستقبل الهلال وسيبونا من مسلسل (السيخ والفوال) ..! * يا جماعة ركزوا مع التأهل ونضِّفوا دواخلكم، وزيلوا ما علق بالنفوس..! * زيلوا المرارات .. زيلوا الإحتقانات .. زيلوا كل حاجة، و(لا تنسوا أن رصيدكم (زيلو) كبير) ..! * إتزيلي ..! * وغداً نواصل (التفويل) مع (كمشة) جديدة ..! نقش أخير * (فول) النصيحة كلمني مالك بالصفر مؤلمني قول يا حبيب قول لي من جاب ليك (فول) بدور يفرق بين عقول القال هواي ما مقبول نهايتو شقى نهايتو أفول عذاب يا حبيب (فول) النصيحة كلمني مالك بالصفر مؤلمني قول يا حبيب
