بالعربى الكسيح محمد الطيب الأمين البلد راااايقة والخضار مرشوش !! * من الأقوال الحكيمه : (الباب البجيب الريح سدو وإستريح) .. * لكن مرات (الشُباك) بخذلك .. * تسد الباب يقوم الريح يخش ليك بالشباك .. * ولعل هذا ما إنطبق على المريخ .. * وفد المريخ إنتظر أبوعاقلة في (باب الشارع) قام أبوعاقلة طلع ب(الشباك) .. * في الوقت الذى كان فيه وفد المريخ (بيدق) في باب ناس أبوعاقلة كان أبو عاقلة بيدق في باب ناس الكاردينال في قاردن سيتي .. * ناس المريخ دقو الباب في الثورة قام طلع ليهم (أخو أبو عاقلة) ، وأبو عاقلة في قاردن سيتي دق الباب قام طلع ليهو الكاردينال .. * والحصل لوفد المريخ مع أبو عاقلة حصل قبل ثلاث سنوات مع نزار حامد .. * البرير سافر عطبرة ليلا وجاب نزار حامد .. * والبرير ونزار لما كانو جايين من عطبرة نزلو شندى يشيلو (موية صحة) لقو وفد المريخ (بيضرب شيه) .. * والله صحى .. * وفد المريخ قرر يضرب (الشيه) بعد داك يمشى عطبرة يفاوض نزار .. * (ضربو شيتهم) ولما وصلو عطبرة لا لقو نزار ولا لقو حامد .. * فعلا والله حناطير .. * خلو (الشيه) دى تضوى ليكم .. * المهم .. * نبارك لجمهور الهلال إنضمام النجم (السوبر) أبو عاقلة وهو إضافة كبيرة للازرق بأذن الله .. * وعلى فكره .. أبو عاقلة (مهندس تحت التشييد) فهو يدرس (هندسة) جامعة النيلين .. * يعنى يا حبيبي كشف الهلال فيهو (اتنين مهندسين) محمد أحمد بشة وأبو عاقلة .. * مع المهندسين ديل (الهجمة) تانى بتكون (ثلاثية الأبعاد) .. * الهجمة بيكون عندها (رقم هندسي) .. * والله صحى .. * إذا كان الرقم المفضل بالنسبة للمدرب مازدا هو الرقم (3) فأن أحمد بابكر وعلى ما يبدو من عشاق الرقم (2) .. * ونتتظر بعد خمس سنوات (يستقيل) أحمد بابكر ويستلم مدرب اخر من عشاق الرقم (1) .. * هكذا تدور الساقية حتى نصل لمدرب من عشاق (الصفر) فنضمن التعادل الذى هو أفضل مليون مرة من الخسارة .. * غايتو جنس غايتو ؟؟ * صلاح ادريس ربما يكون هو الهلالابي الوحيد (الزعلان) بسبب (الجوهرة الزرقاء) .. * ولذلك ما يكتبه الارباب مبرر لان الرجل لا يريد للهلال تقدما إلا هو رئيسا للنادى .. * صلاح ادريس واقف ضد الإنسحاب فهو ربما كان يتمنى ان يكون هذا القرار في عهده وليس في عهد الكاردينال .. * مرات يا جماعة في حاجات كده انت بتتمنى تكون من نصيبك .. * مثلا .. وردى لما سألو عن أغنية بحبها قال : (أنا بحب أغنية العزيزة الما بتسأل عن ظروفنا .. وإتمنيت تكون حقتي) .. * هسه صلاح ادريس كان بتمنى قرار الانسحاب يكون من نصيبه ، ولما القرار طلع من نصيب الكاردينال الارباب إتعامل بنظرية الكديس الذى قال قولته الشهيره في (اللبن) .. * عموما الأرباب لو وافق سيكون هو من ضيوف شرف مهرجان إفتتاح الجوهرة الزرقاء بأذن الله .. * في العادة الذى يتناول (لقيمات) بكميات كبيره سيظهر اثرها في (الخدود) او (الجضوم) .. * وللأمانة بعد حديث الكاردينال الأخير بقينا لما نقابل زول من ناس الإتحاد بنعاين ليهو في (خدودو) .. * والله صحى .. * بقينا لو شفنا اى زول من الاتحاد اول حاجة بنعاين ليهو في جضومو .. * لقيمات تقيلة .. * حاجة تكسف .. * من باب الذوق (سيولع) الهلال (الكشافات) اليوم حتى يقوم مريخ الفاشر بعملية (التسخينة) ومن بعد ذلك يورونا عرض أكتافهم .. * بنديكم (ربع ساعة) يا ناس مريخ الفاشر تعملو التسخينة وتبقو مارقين .. * والربع ساعة دى ذاتها بنديكم ليها عشان إنتو غلبتو الحنطور الكبير بهدف حسن كمال .. * لو ما كده على بالنعمة كشافة واحدة ما بنولعها ليكم .. * ونتمنى من الأخوة في عطبرة برضو يولعو (كشافات الاستاد) ربع ساعة بس عشان حنطور العرضة يعمل (تسخينتو) ويتخارج .. * عشان تعرفو … الهلال لو قال فعل يا معتصم .. * إنسحاب يعنى إنسحاب يا مجدى .. * والحشاش يملأ شبكتو .. * وفي موضوع الإنسحاب انا عايز أقول حاجة .. * مرات (المرض) بيظهر في (مرافق المريض) أكتر من (المريض) .. * تشوف الزول العيان شكلو بيكون أفضل من شكل الزول المرافق للزول العيان .. * لدرجة إنو ممكن ما تعرف العيان منو والمرافق منو ؟؟ * والحاجة دى في الحزن برضو وفي الفرح كذلك .. * في (وزير عريس) فرحتو بتكون أكبر من فرحة العريس نفسه .. * والحقيقة الثابتة الآن في الساحة الرياضية تؤكد ان (أعراض) الإنسحاب ظاهرة في المريخ أكتر من الهلال .. * مع ملاحظة ان (المُنسحب) هو الهلال وليس المريخ .. * في الهلال الحياة تمر الان بشكل اكتر ممتاز .. * تسجيلات الهلال مدوره ومفاوضاته شغاله مع اللاعبين المحليين والاجانب .. * (8) أيام مرت على إنسحاب الهلال ولا يزال الفريق متصدرا البطولة .. * كل شي في الهلال الآن مستقر .. * البلد رايقة والخضار مرشوش .. * والكاردينال اثبت بالفعل انه إستفاد كثيرا من السلبيات وما يقوم به الآن من عمل على مستوى التسجيلات يعتبر ضربة معلم دون شك .. * كما ان (المخالصات المالية وإنهاء العقودات مع المحترفين) يعتبر عمل إحترافى كبير ومنظم .. * يعنى تانى حكاية محترف يشيل حالنا ويشتكينا زي ما كان بيحصل زمن الارباب مافى .. * اى محترف بيأخد قروش ويمشى مشكور .. * وده عمل كبير لا نشكر عليه رئيس الهلال لانه واجب ولكن نقدر له ذلك .. * فقط الآن امام الهلال ملف اللاعب أمير كمال .. * وحسب علمي ان الهلال كان بامكانه يحسم صفقة أمير كمال بالامس ولكن لاسباب كثيرة لم تتم الصفقة .. * نجدد القول : الهلال يجب ان يمارس ضغوطات كبيرة على امير كمال واسرته من اجل التوقيع للهلال .. * والعرض المقدم من الهلال لامير كمال لابد ان يكون عرضا خرافيا .. * نقدم له عرض خرافى ليس لانه (سلطان زمانه) بل لان المريخ يحتاج لضربة مؤثرة حتى يعلم ان الهلال هو القوة الضاربة في البلد دى .. * حتى لو نفتح باب تحويل الرصيد يجب ان نقدم عرض كبير لامير وفي هذه الحالة سنضمن ان امير إذا لم يوقع للهلال فأنه سيجعل المريخ يدفع دم قلبه من اجل التجديد له .. * وبيني بينكم في الحالتين النار ح تولع في المريخ .. * لو امير جانا النار بتولع في المريخ ، ولو امير جدد للمريخ يبقى ح يجدد بمبلغ لا يقل عن (4) مليار .. * وده شغل ادراى .. * شغل ادارى خبيث ولكن طالما المريخ هو الذى بدأ اولا عليه ان يستحمل هذه الضربة من الهلال .. * البادئ أظلم .. * والعملو جمال الوالى بنردو في لجنة التسيير بتاعتكم دى .. * واوع تقول لي امير ما ح يفيد الهلال ولا ح يفيد .. * موضوعنا مع امير ما موضوع كورة يا الكاردينال .. * ما موضوع كورة .. * ده موضوع كرامة ورد اعتبار .. * ان شخصيا بفضل إنو نُخسر المريخ (4) مليار في امير كمال .. * يعنى بدل إحنا ندفع في امير (4) مليار نخلى المريخ يدفع المبلغ ونكون إحنا سبب في هذه الخسارة المالية الكبيرة .. * ولو المريخ ما دفع نقوم إحنا نسجل امير وبرضو النار ح تولع في المريخ .. * والسنة دى يا حناطير يا إحنا يا إنتو .. * بمناسبة الحناطير دى .. * قال ليك في السوق ظهرت ريحة جديدة اسمها (ريحة الزلابية) .. * ريحة الزلابية دى هى في الحقيقة (ريحة تركيب) .. * تمشى السوق العربى تركب ليك (ريحة زلابية) ب(15) جنية تتعطر وتبقى مارق .. * ريحتك تبقى لقيمات لقيمات .. * لو سلم عليك زول (جيعان) ممكن يأكل القميص حقك .. * يشم ريحة اللقيمات في قمصيك يقوم يأكل (اكمام القميص والزراير) .. * زراير ب(الغاء) .. *و..و.. * منايا ليك ما وقف وإتمنيت أنا …(لقيمات على الريق) .. � � حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore � � � � � � �
