في ال18 عمر الطيب الامين يشيل ويخت في الهزائم ولسه الكيس فاضي ..!!! # تاريخيا كترت الأيادي بتكسر رقبة الشافع … # وحاليا كترت المدربين كسرت رقبة الهلال .. # بقينا بدون رقبة بسبب العشري وطاقمه المعاون .. # غادر الهلال كغير العادة من الدور الاول ويبدو ان الامر مره مرور الكرام … # غادر الهلال والكاردينال يجدد الثقة في العشري … # هو اصلا في ثقة عشان تتجدد … # فكونا ياخي … # والله العشري بتاعكم دا سيخة ما عندو .. # العشري الذي ارتكب جريمة في حق الهلال لم يقوى مجلس الهلال على ابعاده … # عينهم في العشري وبطعنوا في ضلو … # زمان كنا الواحد لمن يرسلو الدكان بالليل بمشي وبغني براهو … # بتغني عشان تثبت للناس انك اخر من يخاف .. # وانت من جوه بتكون راقد سلطة .. # منتهي .. # لو كيس ساي شألوا الهوا ممكن تروح فيها .. # بس هسي الكاردينال شغال بغني … # بغني عشان يقنعنا انو العشري كويس … # بغني عشان يوريكم انو هو ما بخاف . # والله لو بقيت ود الامين يا الكاردينال العشري دا كيسو فاضي … # ياخي زولكم دا شدة ما كيسو فاضي ..يشيل ويخت في الهزائم والكيس حلف كان بتملئ .. # دا العشري .. # لا فائدة لهذا الكم الهائل من المدربين عزيزي الكاردينال .. # بامكان مبارك سلمان فقط ان يقود الهلال .. # مش ياهو الدوري بتاعنا دا … # اصلا ما بحتاج خمسة مدربين .. # بلغ الهوان بالهلال لدرجة ان العدد الموجود في بنيش التدريب اكتر من لاعبي الوسط … # صدق او لا تصدق بالهلال خمسة مدربين ومهاجم واحد .. # الكاردينال الذي تحدث له اكثر من مدرب سابق عن حوجة الفريق لمهاجم رفض مصلحة.الهلال ليردد بداخله اغنيته" زول بريدك زي مافي" التي تشبه لحد كبير " بيضة الديك" وهو يعيد هيثم مصطفي مدربا . في الوقت الذي لا يوجد فيه مهاجم بالفريق . # استمع الكاردينال طوال الفترة الماضية لمن "يضحكه" وكان خروج الهلال من البطولة الافريقية من دور ال 32 فلذلك عليه من الان وصاعد ان يسمع الكلام "الببكي" .لان الضحك يبدو انه لن يستجلب البطولات .. # لو كان الضحك يحقق الانجازات لتفوقت فرقة تيراب على الهلال عزيزي الكاردينال. . # اسباب خروج الهلال ظاهرة واعتقد ان الحل الاول والاخير هو ذهاب العشري ومواطنه وهيثم مصطفي على ان يستمر سلمان فقط وهو الاحق بتولي المهمة … # العشري مدرب ضعيف من حيث الشخصية واعجابه بهيثم مصطفي جعله اخر من يعلم بالتشكيل وهنا تأتي تصفية الحسابات التي ارهقت جسد الهلال لاكثر من 83 عاما .. نزع خلالها ولا نحصد سواء الفشل الذي توأم مع الهلال … # بذات القدر الذي انتقدنا به الكاردينال لابد ان نعترف بان هناك عمل يستحق عليه الثناء ولكن ذلك ليس من أولوياتنا . . # كؤنوا يكون عندها اضاءه عالية دي ما اولوية .. # اضاءتنا شينة وبنغلب ونصل المجموعات دي اولوية .. # فتح عينك يا كاردينال.. # وو .. الكنت قايلو وصل المجموعات .. طار من ال32 . # قبل الطبع : بنزرع تفاح وبسبب عدم بياض النية بنحصد لالوب …
