بالعربي الكسيح محمد الطيب الأمين السمسار يقنع عبد اللطيف هارون بان الطاهر حماد محترفا أجنبيا !! * أهلنا بيقولوا : (إذا عرسو خطيبتك يبقي العيب في نسيبتك) .. * وإحنا بنقول : (لو الخرطوم الوطني إتعادل معاك يبقي العيب في اللقيمات) .. * التعادل (خسارة للخرطوم) ومكسب للمريخ .. * ورد في الأخبار ان مدرب الهلال بيلاتشي قد طالب بزرع كاميرات في الإستاد لرصد اللاعبين في التدريبات .. * واضح من خلال هذه (الفكرة) إنو المدرب ده (كيسو كويس) .. * يعني إعتبارا من الدورة التانية الهلال لو فاز بالخمسة بنعتبروا خسران .. * الفوز ما بنحسبوا فوز إلا بعد القون الخامس .. * وإن شاء الله في الدورة التانية نكمل نواقصنا ونعذب منافسنا .. * بعد مباراته أمام الخرطوم الوطني وضح تماما إن الإتحاد العام قام بتأجيل مباراة القمة لأسباب تتعلق بالمريخ .. * واقع الحال يقول ان التأجيل من مصلحة المريخ .. * الهلال ومنذ ثلاث مباريات دخل الشبكة وأصبح يلعب بقوة وإجادة .. * وعلي العكس تمام المريخ يتراجع للوراء ويلعب كل مبارياته من أجل ان يخرج (مرفوع الرأس) .. * في الجزائر (طاروا بشرف) .. * وفي إستاد الحكومة (إتعادلوا بشرف) .. * وبكرة في الأبيض بأذن الله (سيخسروا بشرف) .. * وفي كل الأحوال كسبان (شرف شيبوب) وخسران أسامة ونسي .. * بالمناسبة .. * مسؤول الإنتدابات بفريق شبيبة القيروان قال ان صفقة شرف شيبوب فاشلة .. * وهذا جزء من الإتفاق .. * إتفقنا معاهم علي كده .. * الإتفاق بينص علي الكلام ده .. * عشان بعد (15) يوم لما القيروان يصل مع الهلال لاتفاق بخصوص إعارة شيبوب للهلال يكون موقف القيروان في السليم .. * القيروان بيقولوا اللاعب ده فاشل وإحنا ما عايزنو .. * ده كلو إتفاق ومنصوص في العقد .. * وأفتكر إنو شيبوب عمل فترة (نقاهة) ممتازة جدا بعد الشفاء من (داء الوصافة) وسيرتدي شعار الهلال بعد أسبوعين وهو سليم ومعافى .. * وبأذن الله شهر (12) القادم سنرى مازن شمس الفلاح بشعار سموحة المصري .. * وده كلو في إطار علاقاتنا الممتدة مع الاندية العربية .. * وإنتو خليكم ده .. * سجلوا في مشاطبنا لحدي ما نسمع بيكم في دوري الدرجة التانية .. * حاجة تكسف .. * في كل مرة نسمع ان مجلس الادارة قد أوكل مهمة إختيار المحترفين الأجانب لمدرب الفريق .. * وهذا أمر جيد وفيه ثقة كبيرة من المجلس تجاه المدرب المعني .. * ولكن في موضوع بيلاتشي ده بالذات يبجب ان لا يكون اختيار الاجانب من نصيبه .. * بيلاتشي إبتعد عن التدريب لفترة ثلاث سنوات ومن الطبيعي ان يكون غير متابع للاعبين والفرق خاصة الأفريقية .. * الكاردينال عليه ان (يدق صدره) ويستجلب لاعبين معروفين بمبالغ كبيرة حتي تكون عندهم المقدرة علي الإضافة .. * يجب التركيز علي اللاعبين المبرزين في دوري الابطال والكونفدرالية .. * قد يكون من الصعب موافقة الأندية المشاركة في الابطال علي إطلاق صراح المبرزين بصفوفها ولكن المال يستطيع ان يلعب دورا كبيرا في الإقناع .. * فشل الهلال في ملف الاجانب هذه المرة سيكون غير محتملا لان خروج الفريق من الدور الاول هذا العام هو صدمة كبيرة لعب فيها (أجانب الكاردينال) دورا بارزا .. * من هذا الجحر يجب ان لا نلدغ مرة اخرى .. * افريقيا زاخرة بالمواهب فقط تحتاج لعين فاحصة .. * والعين الفاحصة ما بتتلقي عند السماسرة .. * السمسار عينو بتفحص (الجيب) ولا تفحص المواهب .. * لو تابعت السماسرة ديل يا الكاردينال ممكن شهر خمسة يجيبوا ليك أبيكو ويقنعوا إنو ده ما أبيكو .. * والله صحي .. * السماسرة زمان كانوا بيعملوا لجمال الوالي كده .. * يجيبوا ليهو محترف ويفشل وبعد ثلاث سنوات يقوموا يجيبوا ليهو نفس المحترف الجابوا قبل كده .. * ومرة من المرات السماسرة ديل حبوا يعمل تنويع .. * قاموا جابوا لجمال الوالي محترف من البوسنا إسمو (نجاد) .. * ونجاد ده قالوا كان بيعملوا الشاي في جامعة الدول العربية .. * ما عندو علاقة نهائي بالكرة .. * وجمال الوالي سجلوا وفي النهاية نجاد جاب قونين عن طريق الخطأ في شبكة المريخ وتم شطبه بعد (34) يوما من تسجيله .. * وإحنا الحكاية دي ما عايزنها تتكرر في الهلال .. * دايرين محترفين زي بتوعين الترجي والأهلي ومازيمبي .. * محترف بعد ما يجيب القون يضرب الحارس كف .. * أهم حاجة الكف .. * محترف ما بضرب الحارس كف ما بينفع .. * مهاجم مهجور وما عندو تلفون .. * المحترف مما تلقاهو شايل ليهو تلفون جلاكسي قدر (الصحن) طوالي تقنع منو .. * والله صحي .. * والحاجة دي أنا لاحظتها في مدافع المريخ كريم الحسن .. * كريم الحسن شايل ليهو تلفون قدر (طبق الدجيتل) .. * وهو في الحقيقة كورتو كورة (ربيكا ساكت) .. * الكرة البيلعبها كريم الحسن دي والله العظيم ما دايرة ليها جلاكسي .. * تلاتين عشرة كتيرة عليها.. * ناس المريخ لو ما شافوها شينة كانوا بيقولوا للكاردينال كريم الحسن ده شيلو وديهو (الملكية جوبا) .. * غايتو جنس غايتو !! * المهم .. * أهم عنصر في التسجيلات هو (السرية) .. * الكتمان .. * الصلاة فيها الجهر والسر .. * وأول حاجة يا الكاردينال لازم تفهم الحاجة دي لمحمد عبد اللطيف هارون .. * أصلا محمد عبد اللطيف هارون (فرحان جدا) وممكن يبوظ لينا شغل التسجيلات .. * إحنا عايزين نتفاجأ بنجوم التسجيلات في مكاتب الإتحاد العام .. * حتي الصحف ما تدوها أخبار التسجيلات .. * ده ملف حساس وبيستاهل السرية الكاملة ، خاصة وإنو جمال الوالي الشهير ب(عزو) راجع .. * وجمال الوالي ما بيعرف يسجل إلا اللاعبين البيختارهم الهلال .. * الوالي يا سجل مشاطيب الهلال ويا كمان سجل اللاعبين المرشحين للانتقال للهلال .. * يبقي السرية ثم السرية ثم السرية .. * زي محمد عبد اللطيف هارون ده ممكن تدوهو أسماء لاعبين وهميين .. * يعني مثلا تقول ليهو إحنا دايرين نسجل الطاهر حماد .. * قولوا ليهو كده وخلوهو عايش علي الحنك ده .. * لو محمد عبد اللطيف هارون إتكلم يبقي المريخ ح يجري جري لطاهر حماد .. * وفي النهاية بالطريقة دي بنكون خدمنا أخونا الطاهر حماد وفي نفس الوقت بنكون ركبنا المريخ في لاعبين إحنا اصلا ما دايرنهم .. * يعني يا الكاردينال من الليلة شوف ليك مجموعة لاعبين وهميين وأكتبهم في ورق واديهم لمحمد عبد اللطيف هارون .. * وزولك ده قطع شك ح يسرب هذه الاسماء للصحف .. * وصدقني في الحالة دي كسبان الهلال .. * و..و.. * والريدة بين الناس صله وريدنا …(الله يرحمها) !!