بينما كنت فى الإجازة السنوية العام الماضى بالسودان كنت اسكن فى أحد أحياء العاصمة وبالقرب منا عمارة جديدة تحت التشطيب وكعادة اهل السودان يجلسون امام المنازل وتحت أشجار النييم او احد المساطب أمام المنازل ليتبادلوا اطراف الحديث وما أكثرها فى السياسة . بينما نحن جالسين أشار الينا أحد الذين يكبرنا بعشره سنين أو أكثر ووجه كلامه لى لانه يعرف أنى خارج السودان منذ عشرات السنين وقال لى : تعرف يا إبنى العمارة دى حقت منو ؟؟؟؟ قلت له : لا ليس لى علم ، قال : هى حقت فلان وهو يعمل فى وزارة........... وهو نهب البلد دى كلها وفى كل حى عنده عمارة . رديت عليه الله يرزقه قال : أنت ما عارف شىء وخليك فى اغترابك احسن ولو جيت راجع ما تجيب معاك قروش لانهم يأكلونها منك وانت فى المطار . قلت : دى كلام ساى يا حاج . اهو أنا فى السودان وما شفت حاجة . نط احد الجالسين وقال : أنتوا ناس الحكومة وما حد بكلمكم وخلاص بقيتوا اصحاب البلد دى ياجماعة الحكومة. قلت له : يعنى شنوا اصحاب الحكومة . قال : يعنى عربيه بدون جمارك وشنط كلها جوالات للبيع بدون تفتيش ودولارات بدون تحويل وبدأ يعدد لى . قلت : طيب ليه ما تكون من ناس الحكومة أنت ويكون عندك عمارات ذى دى . قال : ديل حرامية . قلت يأخى كيف حرامية . قال ما شايف العمارة دى . قلت : طيب دى واحد يعنى معناها كلهم حرامية . قال : ايوه انت رايك شنو ؟؟؟ قلت : طيب انا قلت من ناس الحكومة وما حرامى وياهوا انا قدامك وبيتى ذى ما شيافه عشرون سنه مغترب وما قادر أكمل بنيان غرفتين فيه حتى الآن. قال : أكيد عندك مشاريع فى البلد ( بقصد القرية الاصليه ) قلت : لا يمنع ان اصلح بيتى لانه محل استقرارى الآن ، سكت الاخ وقال انت الظاهر عليك تعبان زينا . الحمد لله أثناء جلستنا حضر أحد الاشخاص وسلم على الجالسين وأنا من ضمنهم وقال : يا جماعة مسكين صاحب العمارة المقابلاكم دى . قلنا خير ، قال صاحبها مغترب فى الامارات وليهوا خمسه وعشرون سنة واخوه ضرب منه القروش واداها الى محامى صاحبة ولما بنى عليها العمارة الشايفنها دى ( تحت التشطيب سنتان) طلعت الارض دى حقت ورثة ومرفوع عليها قضية ويمكن تنزع منه لكن الورثة قالوا عايزين ارضهم وما ليهم بالخسارة . واخونا راح فيها من اخوه للمحامى صديقه للمحاكم ويمكن تُخسره قيمتها مرتين تعويض. فجأة تنرفذ عمنا الحاج وقال ليه : يأخى ما العمارة دى ؟؟ انت عارف دى حقت فلان ....... قال ليهوا يأخى بطلوا نكات وتهم كاذبه وخليكم صادقين والراجل انا بعرفه وبعرف اهله وهو جاء قبل يومين من الامارات والاوراق معاه ولو عايز تقابله يالله معاى وانا اوديك ليه هسه . قال الحاج : والله تاريك ياود عامر ما عارف حاجة وكل يوم تقول لينا شىء نحن نصدقك ويطلع كذبه .