اجتاحت الامطار والسيول مناطق الجموعية جنوبام درمان مخلفة اضرارا بليغة حيث انهارت كثيرا من مساكن المواطنين واصبحوا يقيمون في العراء تماما وخلال جولة لتلك المناطق تبين ان حجم الضرر كبير وان المساعدات والمؤن التي قدمتها جهات الاختصاص لاتتعدي بضع خيام لاتشفي غل وكشفت الجولة ان المواطنين الذين حاصرتهم مياه السيول قامو بكسر شارع الاسفلت الرئيسي حتي تمضي المياه لمستقرها ومن جانب اخر افاد المواطنين بان السد الذي انشيء لحفظ المياه للمطار الجديد تخطته السيول القادمة من جهة الغرب الامر الذي زاد من حدة الاندفاع حيث غمرت المياه المندفعة القري ومشروع الجموعية الزراعي وازالت طريق الاسفلت المتجه حتي منطقة التريس والذي تم تشييده حديثا كما غمرت كل زروع المشروع من الخضروات والاعلاف واتلفتها تمامل مما قد تسبب في ارتفاع اسعار الخضر حيث ان مشروع الجموعية يعد من المشاريع الرئيسية التي تمد الولاية بالمنتوجات الزراعية وقد رصدت الجولة بالصورة والقلم معاناة المواطنين الذين قالوا :- * (( انا عبد الرحمن احمد البنا اصلا من طيبة الخواض وناسبته الجموعية وسكنت هنا في الحلة دي وادي السدير لي زمن .. المشكلة ياولدي زي ماشايف البيوت انهدت فوق روسينا ونحن راضين بي قدر الله لكن المغصة كل دقيقة بجوا ناس بقيفو في الظلط وبيصورونا من بعيد وما بجوا علينا حتي المعتمد ماكلف نفسو يصلنا وزي ماشايف بيتي فاتح علي الظلط البصورونا منو طوالي ... انا الحمد للله متيقن لكن المصيبة كبيرة وانا عندي الاطفال.. وزي ماعارف الايجار والبنيان وتكاليفو ..؟ )) * (( نحمد الله علي كل حال المطر كلوا خير .ااي انا ما نسيت اسمي صديق علي صديق من منطقة الشقيلة الجموعية داير اقول لاخوانا المسئولين شارع الزلط الرئيسي السيول اكلتوا بالجنبات لانو الكباري العملوها ليهو ضيقة جدا وماعملوها كبيرة والحالة دي بتحصل كل سنة مفروض يضعو ليها حل جذري واتسببت في حوادث كثير خاصة بالليل ومن المفترض ناس المرور يضعوا في كل حته انهارت علامة مضيئة للحد من الحوادث لكن للاسف الشديد زي ماشايف الناس بتجتهد وبتخت حجارة قدام الحفر الكبيرة والعميقة العملته السيول في نص الظلط وزي ما عارف الحجارة السواقين بالليل ما بشوفوها ومفروض اي شارع اسفلت الناس قطعهو يختو ليهو عبارات ويردموهو سريع لانو برضو الناس بالليل بتجي ماشه سريع وبتقع فيهو ... ااي المعتمد جانا وزارنا وجاب لينا خيام لكن بسيطة وبناشد المسئولين يسرعوا في دعم المواطنين وزي ماعارف قري الجموعية الناس كلها قدر حاله ومفروض ناس شرطة الدفاع المدني يكون عندهم قوة مرابطة في منطقة الجموعية لانو السيول بتجي من فوق وزي ماشايف لحدي هسع شغالة وانتهت من البيوت والمشروع تماما . * حسين ابوالقاسم احمد محمد منطقة التريس الجموعية قال : (( اول التبادي بنشكر نايس الحكومة علي شارع الاسفلت العملوهو لينا بس المشكلة انو الشارع داخل مشروع الجموعية ماعملو الردمية بتاعتو عالية خلوها تحت مع مستوي الزراعة ودي ارض طينية زراعية والعبارات العملوها ليهو ضيقة جدا مابتطلع كديس مش مويه !!! وزي ماشايف الموية ماشة بحر بمستوي متر من الاسفلت مغطية الشارع كلو وشالت الترع معاها ونازلة البحر ودي كلها خسارات واخطاء فنية مفروض يحققو فيها والمشكلة الموية جاتنا مندفعة من سد المطار الجديد الشالو السيل ومشروع الجموعية الغطس في الموية مفروض يعلوا ليهو السد الوراني لانو كل سنة السيل بياكلو وبغرق الزراعة كلها زي ماشايف .. هسع عليك الله الموية الغطت المشروع ده وماشة مندفعة الزول البشوفه مش بقول ده بحر ماشي ... * (( انا المواطن عثمان بابكر سليمان من منطقة وادي السدير الجموعية .. نحن الموية غطت حلتنا كلها والظلط الرئيسي كان حاجزة اضطرينا كسرناهو وكل يوم بنقعد فوق ليهو عشان العربات الجاية من امدرمان ماتقع فيهو .. اااي جانا المعتمد بتاع ام درمان وفتحت خشموا قال لينا انتو بنيتو عشوائي قلنا ليهو نحن قرية قديمة من ما الله خلقنا فيها .. نحن ياخوي جيتك فرحنا بيها وقالوا ولدنا بدل تقول لينا كلمة سمحة ترضينا تقول لينا عشوايين اريتك اكان ما قلتها !!))
