الشمار خبر لابد ان يكون فيه آثاره مشكلة .. فضيحة .. إشانة سمعة وهكذا .. المشكلة ان الناس لتحلية الشمار يعمدون إلى الخيال والاضافة وهو على كل حال إبداعٌ مُضر وفن سالب ولتوضيح ذلك احكي هذه الحكاية طبق الأصل ودون إثارة حتى لا يكون الموضوع ذاته شمار.. خرجت من البيت ضحى ذلك اليوم ذاهباً إلى كشك الجرايد.. وكنت أتمشى من البيت إلى الكشك فالمسافة ليست بعيدة وليست قريبة.. عندما دلفت إلى أحد الشوارع.. سمعت صراخ فتاة بدأ متقطعاً ثم أخذ يتواصل.. فتح الجيران بيوتهم لاستطلاع الصِّراخ.. هنا فتحت امرأة هي(ست البيت) الباب.. وأخذت تردد: ياخوانا دي مصيبة شنو؟ فغر الناس آذانهم.. وهي توضح مكامن الصِّراخ.. قالت: دي الشغالة معانا (الشغالة من شرق أفريقيا) قاعده شغاله في أمان الله.. (بينما هي تحكي تتوقف برهةً ليستمع الجميع إلى صوت الصِّراخ بنقاء) بس جات داخله علينا صاحبتا.. وطوالي رطنت معاها.. بعد شويه مسكتا من شعرا.. ترطن وتشدَّها من شعرا وديك تصرخ تطوع شيخ وقال مقترحاً: أضربوا للنجدة.. وجد الاقتراح قبولاً لأن حضور عربة النجده بصافراتها المميزة ستزيد الشمار حلاوة.. خرجت الموبايلات وتطوع أكثر من واحد بالاتصال «بتلات تسعات» فالأمر ساهل جداً.. بعد عدة دقائق حضرت عربة النجدة.. ونزل منها شرطيان اقتادا الشغالتين.. ويبدو إنهما وجدا مخالفة في أوراقهما الرسمية الإقامة.. أو غيرها.. تحركت عربة النجدة بالفتاتين ذهبت واشتريت الصحف.. (وهترشت) مع بتاع الكشك وبعض الزبائن.. تحدثنا قليلاً في الكورة ثم عرجنا على «ساس يسوس» وكالعاده انتقدنا الحكومة والمعارضة معاً.. وعدت أدراجي.. مررت على بائع الخضار وتذكرت إنني في حاجه إلى شراء ليمون (الليمون مهم اليومين ديل عشان البطن طوالي طامة)..توقفت عند بتاع الخضار.. وجدت امرأة تحكي القصة التي كنت شاهد عيان عليها من بدايتها حتى نهايتها وقلت حينها لو كان دي حاضرا نجم الدين قناوي كان عمل منها خبر ممكن يطلع مانشيت!! وجدتها تحكي القصة الأنا حاضرا.. بس جاتا صاحبتا.. قالت ليها: ياحيوانه مالك ومال خطيبي.. دايره منو شنو.. (لاحظ إن الحوار بتاع الشكله كان بالرطانة.. ولم تكن هناك ترجمة على الشريط) وحكت عن إنها حذرتها من مواصلة العلاقة مع خطيبها لكن تلك تحدتها وقالت لها: انتي التسيبيهو.. أها قامت لزتا من سدرا .. لزه كان شفتو يابنات أمي.. تقول طقشها لوري.. ديك أدتا كف..! دي قامت مسكتا من شعرا.. وبقن يتخابتن:جوا الجيران.. يحجزوا.. ويدفروا.. لمن واحد اتضرب في عينو.. قال ليك طوالي« ورمت».. لي هسي بعمل ليها في المكمدات.. بس الخبر وصل لى ناس «البوليص».. أها جات عربية نجده.. ومعاهن سواري.. فيشان الصراخ كان شديد.. واللبع كتير.. أها قاموا هنضبوهن.. وساقوهن على المطار طوالي.. قالوا يسفروهن عشان الأيدز وكدي.. ونسأل الله السلامة. أعجبتني القصة فهي أجمل بكثير واكثر إثارةً مما شاهدته وحضرته.. مشيت في طريقي الى البيت.. سألني ناس البيت.. جيت بي وين؟ جيت بي جاي ليه؟.. شفت(شكلة الشغالات)؟ تحت هذا العنوان أصبحت تروى الحكاية.. تساءلت في بعض الخبث المشوب بالغتاتة شكلة الشغالات دي شنو كمان؟ .. وكان ياما كان..