في البداية: حسام الدين محمود استيقظت صباحا،لأجد زوجتي تجهز أبنائي للروضة والحضانة،وبعد إجراءات الإستحمام والصلاة والذي (منو)؛خرجت وأنا أحمل (بستلة) الفول متجهاً نحو دكان عبدالوهاب،طلبت منه فول ب(قرش)،فقال لي عبدالوهاب :(الليلة مالك شايل فول بي قرش..! عازم ليك ضيوف فطور ولا شنو..؟!)،قلت له :(خلاص أديني ليهو بي خمسين مليم كان بي القرش كتير..!).. وضعت البستلة عند صاحبنا عبدالوهاب،لأتجه بعدها نحو شارع (الزلط) لشراء ال(عيش) البلدي الحار،واللحم و(الخدار)؛وكم (فرخة) وكده... فعلا وصلت المخبز؛طالبا من عثمان أن يعطيني (كوتتي) المعتادة من الخبز وهو يعلم بها،فملأ لي الكيس عن آخره،لأعطيه قرش ونصف .. من عثمان ذهبت على الفور ل(أخونا) مرتضى الجزار،فوجدته قد جهز لي كيلو لحم عجالي (صافي)،ومعه بالتأكيد نصف الكيلو الضأني؛وهو ثابت يومياً،فمنه تكون (الشية) والبقية لل(ملاحات)،فهنا في السودان من العيب أن تأكل طعاماً (بايتاً)،شكرت صديقي مرتضى ،ومنحته (18) قرشاً (حق) اللحمة..وأنا أنبهه بأن يحجز لي غدا كيلو كبدة ضأني،ونصف كيلو كبدة عجالي... رأني عيسى (بتاع الخدار) فإستقبلني ب(جلكساته) التي يشتهر بها..وهو يقول لي:(والله الله بريدك ياعمك.. الليلة عندنا (الخس) والكرفس ،والقرنبيط،والخيار بتاع (أبرووف)،وطماطمتنا بلدية مافيها حبشية ولا طماطم بلي)..قلت له :(خلاص ياحاج أديني كيلو من ده،وده،ومعاهو ده.. ونص كيلو من هنا وهنا وهنا..)،وبعد تعبئة خضرواتي،طلبت منه أن يعطيني كيلوان من الموز،وكيلو تفاح أخضر ? عشان السكري ? وكيلو تفاح أصفر،وكيلوان ونصف من العنب النباتي الذي يحبه أطفالي،ونصف كيلو كمثرى،وبطيخة كبيرة من ذوات الحجم العائلي..فقلت له :(أها كم الحساب ياحاج..!؟) ضحك عيسى وهو يقول:(يا أستاذ الحاجات دي سعرها مااا ثابت،ومافي حاجة الزمن ده بتزيد بالهين..! الحساب كلو (طرادة) خمسة وعشرين قرش..). نظرت نحو الشارع الإسفلتي،كما اعتدت يوميا؛ لأطلب (ركشة) وأحمل عليها أكياسي وحاجياتي اليومية..! توقف بندر (ود الحلة) بركشته أمامي وهو يقول:(شنو ياخال..؟!ماشي على البيت ولا شنو..؟ وأمبارح وين الدافوري..!؟ ماشايفنك..؟! والله ناس عبدالحليم و(وجَّك) (إتجرسوو) جرسة..أديناهم أربعة مع الرأفة..)لنضحك أنا وبندر ونحن نحمل الأكياس لداخل الركشة الخضراء،وأنا أقول له:(حقو تاني الجماعة ديل يجوا الميدان ويطلعوا طوااالي،والله التيم بتاعهم ده آوت مايجبوا..). عند مرورنا ب(بقالة) محمد أنصار السنة،طلبت من بندر أن يتوقف قليلا عنده؛وبعد السلامات والتحايا،حملت كيس الفراخ والسجك والبيرقر،وطبق البيض،سألته عن السعر،فقال صاحبي محمد:( بس ستة وعشرين قرش يا أستاذ..). وضعت أكياسي في المطبخ لتبدأ زوجتي في ترتيبها في الثلاجة (ام بابين)،وهي تسألني:(اها جبتها بي كم..؟)،فرددت عليها قائلاً:(ياهو زي سعر كلو يوم..! كلها بي (71) قرش بس،وأديت بندر قرشين،يعني تلاتة وسبعين بس..). جلست أنا وزوجتي للإفطار،وكانت الصينية (حدادي مدادي) وبها مالذ وطاب من اللحوم والسلطات وشوربة الفرخ الساخنة،والقطة (ناوة) تتمسح بأقدامي..وبدأنا الأكل ونحن نتحدث عن السودان زمان و(هسه)،فأيامنا هذه أيام خير وبركة،وكنا (وين) وبقينا (وين)..فقالت لي زوجتي:(الشوربة دي ماعاجباك ولا شنو..! شايفاك ماشربتا منها..؟!)،فمدحت طعامها وأنا (أتمجغ) قبل أن أرفع ملعقة الشوربة،لتأتي (ناوة) وهي تتمسح مرة أخرى،لتصيبني القشعريرة (ديك) وتهتز المعلقة وتنسكب الشوربة علّى..! عندها فزعت لأستيقظ من نومي مرعوباً؛وأنا أقول :(خير اللهم أجعله خيراً). بعد قراءة صحف اليوم وكل يوم وجدت وغيري.. أننا في واد؛والعالم في واد آخر...