٭ رياح الأيام لم تترك السنجك سيد أحمد يهنأ في ليالي المولاص بالجزيرة، على الرغم من أن «بِتْ محبوبة» كانت تحجز له الركن والبنبر، وتقول بنبرة حاسمة لرواد بيتها :- هووي، دا محل السنجك..! ومع تمدد الخصخصة في مؤسسات القطاع العام، عرف السنجك أنه، و بعد فعلة الإنقاذ بمشروع الجزيرة، لن يطيب له المقام فى «صعيد الله الرسول» كما كان يسمي تلك النواحي، فأصبح كثيراً ما يهذي ويقول: (البلد بِقتْ مِقَحِطي، الله يسنح السِّناحي السوّاها فينا)..! ويكتفي بهذا المستوى من الدعاء ضد النظام ، لكون أن بعض المتوجسين من أهالى الجزيرة خوفاً وهرباً من نقد الحزب الحاكم يشتمون سناجكه ، فقط..! ٭ كان السنجك يسخر من حاله بعد الخصخصة ويقول إن «منوفلي»، أي الفلس، مُصَنْقِرْ فوق ضهرو، زي اللّستك الإسبير..! وهو فى ذاك الحال وصلته رسالة شفاهية من أمه مع إحدى الشايقيات.. داهمته الشايقية وسط السوق وقالت له: «سِيد أحمأ،، أُمك خَجيجي قالتْلك، الأصبع اليابِس ما بيتلحس»..! ٭ أهمل السنجك الرد عليها وقد فهم مضمون الرسالة.. لكنه طنطن بنبرة عالية ، كمن يُحِّدث نفسه وقال:- «زمن، والله زمن.. رعيناها زمن مِخَدِّري، يا ربي أخير الواحد يرجع كريمي»..؟ ٭ لم يمر شهر على ذلك البث المباشر، حتى جاءت شايقية أخرى من طرف أمه، و كانت شايقية قاهرة، وصلته عند بِتْ محبوبة، صاحبة أشهر محل بقنية فى حلة موسى.. قالت للسنجك قِدام الرجال:- آآ مايل الرُجال ،أُمك خجيجي (قالتْلك، إتْ ماك عارف أمر الشاي صَعيب)..؟ رد عليها:- «قوليلا إتي مَاكي عارفي، المَسَانيح ديل، باعوا السِّنَاحي دا»..؟ وأضاف: «آآ خرابة ، قوليلا نان أنا أجيب لِكْ من وين..؟ الحكاية دي جَات زانقِي من ورا»..! ثم أترع عباراً من مريسة بت محبوبة وقال مُطنطناً : (آآ سناحي،، أمُرقي من فوق راسي، لا تغُزي كيعانك فوقي تشربي دمّي.. قوليلاً كاتلِي كاتلِي بي شوية التِّمير لامن ربنا يفرِجا) ..! ٭ سمعت بِتْ محبوبة عبارة التِّمير على لسانه، فتدخلت فى لقاء المكاشفة وقالت له :- السنجك.. إنت عندك التمر في البلد، و يوم من ذات الأيام ما ضوّقتنا منو..؟؟ صفق سيد أحمد يديه حسرة، وقال : (آآخرابه، قولي بسم الله، تمُر شنو البياكلوهو، التمر بيشربوهو..و حات سيدي الحسن، أنا في كريمي ،عندي اكتر من مية عود بركاوي ، يوم من ذات الأيام ما دخلت لي حبة منو في خشْمي)..! ٭ وضاقت الأحوال أكثر على مؤسسات القطاع العام، وتمددت استثمارات التنظيم..ضاقت على السنجك الذي شوهد فى بيت البقنية كثير الشكوى و التذلل لبِتْ محبوبة.. و كثيراً ما كان يطنطن: (ضيَّقوها علينا، تضيق عليهم الوسيعي)..! كان عندما يأتى في الليالي الضّليمة فارغ الجيوب ، يقول لبِتْ محبوبة : (آآ خرابة، أنا الليلي مِعِّلم الله.. أسُكتِي شَخْبِتي في الحيطة، لامِن تجي التعويضات)..! وتكتب بت محبوبة الحساب في الحيطة.. ٭ لكن ضاق الحال أكثر وأكثر و بِتْ محبوبة هي الأخرى بدأت تطنطن وتقول له: (السنجك يا مايل الرجال، الحيطة دي بعدين، بتبقى راجلاً تليِّسا)؟ فيرُد عليها :- (آآخرابة، لِياس شنو..؟ إنتي دايري تشطُبي الدفتر العمومي)..؟! ٭ في ليلة من ذات الليالي جاءت بِتْ محبوبة غاضبة، ووقفت فوق راس السنجك وقالت له: (هووي يا راجل هووي..قوم أديني حقي).! ٭ أسند سيد أحمد ظهره على الحائط و قال: (آآ خرابة قولي بسم الله ، قطعْتي قلبي، الله يقطع قلبِكْ..إتْ ماك عارفي المَسَانيح ديل، باعوا المحالج والبالات، و ما خلّوا دي، ما خلّوا دي)..! ٭ وبينما كان السنجك يهرش أظافره بأسنانه، فوجئ بها تحاصره بالسؤال: «تقصد شُنو.. والمسانِيح ديل منو»..؟ هنا عرف السنجك أن بِتْ محبوبة «اللّيلة ما براها»..فهذه المرّة كانت صارمة وأبعد ما تكون عن الهزار والانتظار..! ٭ قالت: (السنجك هووي، أنا دايرة حقي هسّه، الليلة، تقوم تديني ليهو)..! قال: (الليلي..؟ نان آآ خرابه، أجيبْ لِكْ مِن وَين)..!؟ قالت: (ما بعرف، أكان ما أديتني حقّي بكورك وأفرِّج فيك ناس الكمبو ديل)..! قال: (آآخرابة، ناس الكمبو كلهم مافي واحداً فيهُنْ صَرَفْ)..!.. ٭ ومرقت بت محبوبة إلى الشارع وبدأت السكلبة.. كشفت عن رأسها وبدأت الكواريك، والسنجك يجري وراءها و يقول: (آآ سناحي أدُخلِي لى جوّة ، أدُخلِي، تدخُل فيكي الدَّخلتْ فى الكَنابي)..! و بِتْ محبوبة تكورك: (لا ما بدخُل، ما بدخُل..شكيتك علي الله يا السنجك..حق مَريستي دا، أشيلو منك يوم القيامة، يوم الخلايق واقفين صفوف)..! و طبعاً.. لن يفُتْ في عضد السنجك مثل هذه الخطاب الديني، فقد قال لبِتْ محبوبة مستخدماً كل جموع التكسير فى لغة الشوايقة:(آآ خرابة، عليكي أمان الله، فى اليوم داك، تلحقي لامِنْ تجيبي سيرة المَريسي دي في طرف خشمك، إلا يِتْفرجوا فيكي خلايق يوم القيامة.. إنِسْ و جِنْ، إنِسْ و جِنْ، إنِسْ و جِنْ)..! وظل يرددها، حتى حال بينهما الظلام..!