فترة طويلة ونحن نادي بضرورة عودة المريخ لجذوره ونستغرب من الانقطاع غير الطبيعي لهذا النادي عن اصوله (المصرية القبطية) .. لا نقول ان المريخ نادي غير سوداني ولكن جذوره ونشأته الاولي ارتبطت بالاقباط القادمين من مصر والذين سكنوا المسالمة واعلنوا الهدنة مع الخليفة عبد الله التعايشي .. كنا نستغرب من عدم احتفال اهل المريخ بعيد الميلاد .. وعدم توزيع (الفسيخ) في احتفالاتهم وعدم كتابة حتي اسم مؤسس النادي بالكامل وهو عبد السيد المسيح فرح ابوسيفين .. الصحفي المريخي الوحيد الذي يعود في بعض الاحيان بثقة لماضي المريخ هو الاخ ابوبكر عابدين سيد احمد ! طلبنا من الاخوة في المريخ ان يحددوا لنا تاريخ ميلاد ناديهم بالتحديد هل هو 1907 او 1908 ام هو عام 1927 .. طلبنا من اهل المريخ ان يعيدوا كتابة تاريخ ناديهم الملئ بعلامات الاستفهام ؟؟ بالامس اقترح الاخ مامون ابوشيبة ترك المريخ لمنافسة الدوري الممتاز السوداني والانتماء للدوري المصري وهو اقتراح جميل وندعمه بشده فالعوده للجذور تجد من اهل (الاصو) كل تأييد .. الدوري المصري مكان مناسب جدا لمريخ المسالمة الذي اختارت اسمه سيده عبد السيد المسيح واسسه عبد السيد المسيد فرح ابوسيفين .. ولكن المريخ سيكون مواجها ببعض العقبات حيث ان الجنسية المصرية لا تمنح لابن السيدة المصرية ولابد ان يكون الانتماء بالاب لذلك ننصح الاخوة في المصريين ان لا يركزوا علي السيدة فرح وحكاية الاسم وان يتحدثوا عن عبد السيد فقط ! كما ان المريخ سيكون عليه ان يبدأ من الدرجة الثانية حسب لوائح الاتحاد المصري وعندها سيصطدم بوجود فريق اخر اسمه المريخ وهو مريخ بورسعيد وفي هذه الحالة سيكون لزاما علي المريخ ن يبدل اسمه مرة اخري ليكون احد اكثر الاندية تبديلا لاسمه وممكن ان يعود لاسم نجمة فكتوريا ! وقبل ان يدخل المريخ المصري الي ارض الكنانة نحذر الاخوة الحكام من راجامات ابوشيبة وننبهم الي ضرورة احتساب ضربة جزاء في كل مباراة علي الاقل لصالح المريخ او الفريق صاحب الاسم الجديد القادم للدوري المصري او دوري الدرجة الثانية .. بالمناسبة سفير السودان في مصر الاخ عبد المحمود رجل رياضي مطبوع ومريخابي اصيل يمكن ان يساعدكم في هذا الامر لذلك من الافضل ان يكون قرار الانتقال لمصر سريعا قبل ان يتم تبديل السفير بسفير هلالي وعندها سيضطر المريخ للعب في منطقة (ابيي) علي الاقل هناك ممكن تلعبوا في دوري السودان وجنوب السودان في وقت واحد .. زي طونق ده .. قال ليك طونق في فترة ما بين الدورتين جيرجع يلعب مع مريخ الرنك عاااادي جدا ! والله ناس المريخ ديل حالتهم تحنن .. قالوا كيف مجدي شمس الدين ما يخاطب اتحاد الجنوب ويسألو من اللاعب الاجنبي (طونق) ياخي الزول ده سوداني .. جذوروا سودانية .. افريقي اسمر .. ما السودان ده بلد مترامي الاطراف من المسالمة لابيي ! الاخ العزيز مامون ابوشيبة قال انو اتاكد من رفض الشكوي لانني كتبت عن ذلك قبل يوم وذكرت عدم وجود مستند لدي اللجنة المنظمة بخصوص ايقاف لاعب الامل عمر عثمان ! يا ابوشيبة دي عايزه ليها خالد عزالدين .. ما اي زول في البلد دي عارف انو مافي مستند ! كلامي انا خليهو .. هسة مستندكم وينو ؟ القصة دي ما جديدة يا ابوشيبة ولا محتاجه تفكير من خالد عزالدين او اي شخص اخر ! اي زول متابع ولو بصورة بسيطة كان يعرف ان هذا اللاعب قد تم تصحيح مساره في اتحاد كرة القدم السوداني بخطاب من اتحاد القضارف الذي اكد علي ايقافه لمباراتين فقط ! بالمناسبة الكلام ده نزل في جريدتكم برضو ! اخي ابو شيبة المريخ لا يملك مستند في قضية عمر عثمان لاعب الامل .. مجدي ذنبو شنو ؟ لاعب الامل لم تتم معاقبته عندما كان في القضارف .الفتوا ليكم قصة وصدقتوها .. اللجنة المنظمة ذنبها شنو ؟ يعني عايزين تفتحو ليكم باب شكاوي جديد .. الموسم الجاي مريخ كوستي يجي يشتكي الهلال يقول والي الدين معاقب لسنة لما كان في اتحاد مدني و(القواله) جابها لينا رئيس اتحاد مدني ! والله (همد) ده انا ما عارفوا مسؤول كبير في ولاية الخرطوم كيف ! ياخي ده عليهو تصريحات .. قال رئيس اتحاد القضارف هو الكلمني ببصقة عمر عثمان ! يعني يا همد لا تقدم مستند لا تستر الزول الكلمك ! عيب عليك .. أهلي مدني هل استعجل ؟! شكرنا الاهلي مدني علي التعامل الراقي مع الهلال في انتقال والي الدين ولكننا من باب فكرة التسجيلات العامة نسأل .. الم يكن الافضل لاهلي مدني الانتظار حتي نهاية البطولة الافريقية ثم بعد ذلك يسوق اللاعب .. مش كان ممكن يجيهو ليفربول او شيلسي .. الولد ده بكسر زي مايكل اوين ! خالد شرف وزين .. اتصل علي الاخ العزيز خالد شرف مؤكدا علي انه لم يكن صاحب الفكرة في تكريم الهلال والمريخ وان شركة زين بقياداتها المختلفة هي من قررت ذلك .. ونحن نشكر الاخ خالد علي هذا التوضيح متمنين لزين مزيدا من التقدم ومزيد من التعاون مع الوسط الرياضي ..