شايل هموم الرجعة ليه لي زول جفيتو بلا ذنب جاييهو راجع تاني كيف جرحك معشعش في القلب غلطان عشان أعلن هواك أعلنت ضد ريدو الحرب شرّق شموسك وباختصار وديت شموسو علي الغرب دايرني أعمل ليك إيه أكتر من السويتو ليك غنيت هواك مسدار حروف شديت وتر ألحاني بيك طرزت فرحتي في قماش ختيتو مترقب مجيك وخسارة اتكفنبو زول قضى عمرو متهافت عليك لا تقول كفاك دمع الندم يا ريتو لو تجدي الدموع كان ممكن أبكيك فيض بحار تضمن طريق سفن الرجوع كان ممكن ألبس توب حداد أكتل وراك ضي الشموع أو كان بشل أنفاسي ليك شان تستقر جوه الضلوع كايس دروب الرجعة ليه أنا من زمان خليت هواك بعتك مشاعري بلا تمن ضيعت أيام في رجاك داير بعد مُرّ العذاب من تاني يتردد غناك حرمان عليهو يغني ليك قلباً قدر رادك نساك ريدك مرق من جوفي فات يوم ما هديتو بلا الضياع غناك علي وتر الفرح غنيتو في زمن الوداع رحلتو في فصل الربيع لبستو من ظلمك قناع وريتو في عز الحزن إيه يعني معنى الالتياع