ومشيت بلا كلمة وداع ولا حتى دمعة ريد سجين ورحلت لا زاد لا متاع لا لهفه لا شوق لا حنين لا رجعه للزول الزمان كانك نبض إحساس وجين وخلايا تنبض بالحنان والإلفه مما كان جنين لا سبت عنوان لا طريق نعرفبو إنت رحلت وين لا سبت توقيع حضرتك لو مره غاب الاوكسجين لا احتمال جيتك وطن بحمي الضعاف المتعبين لا فارقت عيني الدموع لا رجعتك تعني اليقين وانا حالي وريتك زمان؟ إنك طريق الرجعه لي شكل امتدادات الأمان وانك رسول آخر شهيق وآخر تفاصيل المكان وانك فرس آخر رهان واهو برضو عبيت الفرح والإلفه في شنطة سفر إذن انت ما راحل قدر إذن انت تافقت النجوم والكلمه والضو والقمر إذن انت حرشت السحاب بي عندي لا يجي لا يمر إذن انت عبيت دون قصد في شنطتك صوت البحر نقط المطر دمع الوتر ومشيت ولا خليت وراك للجايي لا حس لاخبر؟ أها يعني قايل قلبي فيهو مساحه تحتمل الأسى؟ وقايل بتاوق ليك عشم وارجاكا في بيبان عسى؟ وقايل وراك طفلة هواك ممكن أقبل اونسه؟ وقايل حروفي الكنت من عينيك بشيله وادسدسه أنا هسي تاني بدسدسه غلطان وحاتك يا وجع بت القصيده ومأتمه غلطان وماع ارف وراك طفل الألم كيفن نما وكيفن حفظ صوتي الوجع وادمن سهر عيني السما وكيف خاطر السفر الغشاك هد القصايد وعسما وهسع وكت يصلك غناي أبكيني ما شان حضرتي الفضحت غيابك في رؤاي أبكيني ما شان كبريائي وعزتي الكتلت أناي أبكيني شان كمل النفس وانت بتساسق فيني ساي وانشل في الروح الحراك وانت بتنورق في حشاي واتوقف النبض انتهي وانت بتقاوم انتهاي وانا بين مروق الروح أزح وانت بتزح لسع حداي وانا مت بالروح والجسد بس روحك اندست جواي ورضيت أعيش بي رعشتك قاعد ممدد في دماي بس فجأه اخترت الرحيل وحلفت ترحل من سماي يا زول فهم معني الوجع مشكور على تعبك معاي