تقول الحكاية إن أحد الظرفاء ذهب إلى إحدى المؤسسات الحكومية «المحتلة»، المعروفة اصطلاحاً بمؤسسة «سعادتو»، وهي مؤسسة حكومية عريقة جدًا وقعت تحت هيمنة وسيطرة عائلة «سعادتو» من الخفير إلى «المدير»، حتى شُفّع روضة المؤسسة هم من أحفاد وأبناء وبنات عائلة وأسرة سعادتو، دي السعادة ياكدي يابلاش -.. صاحبنا الظريف، ذهب إلى هناك سأل موظف الاستقبال: وين سعادتو؟..والله سعادتو دا ماجا لي هسع، لاكين أمشي أسأل السكرتيرة، داك مكتبا.. أجابه موظف الاستقبال.. سأل السكرتيرة.. أجابت: والله خالو دا ماجا «عطشت الجيم دي لامن طلَعت روحا»، لاكين أسال مدير مكتبو داك «أشارت إلى مكتبه»، سأل مدير مكتبه: لوسمحت سعادتو دا بجي متين؟... والله ماعندي فكرة، لاكين أقول ليك حاجة عمي دا مرات ما بجي من البيت!!.. لاكين كدي للضمان أسأل عنو في المكتب رقم «3» على اليمين... سلام عليكم يابتي، لو سمحتي سعادتو دي بجي متين؟...بابا دا والله ماعندو زمن معين كدي.. متى ما يجي يجي!!! لا يا بتي أنا أقصد السيد الو... أيوا ياحاج ما هو زاتو بابا!!!.. طيب يابتي تاني أسأل منو؟؟؟..أجابت تاني والله إلا تسأل جمال أخوي ولو مالقيتو إلا تسأل ماما..!!! سأل بدهشة: يعني حأمشي البيت؟ لا ياحاج شفت المكتب داك رقم«2» داك، مكتب جمال ومكتب رقم واحد داك مكتب ماما.. خرج صاحبنا وترك مذكرة بالاستقبال وفيها اقترح:أولاً تحرير هجليج ثم تحرير هذه الوزارة من المحتلين من أسرة وعائلة وأقارب سعادتو.. وإلى حين التحرير أقترح تسميتها وزارة الأسرة السعيدة.!!! -------------- عجلاتي زهجان من ولدو النائم لا من الشمس طلعت فيهو. جات أمه تصحيهو قاليها: خليهو تحت الشمس فيهو رقعة دايرا تطير!! أحد الأغبياء وزنه زاد.. مشى للدكتور.. الدكتور نصحه يمشي كل يوم «3» كيلو.. بعد أسبوع ضرب للدكتور قاليهو أنا في الحصاحيصا أواصل ولا أرجع.. واحد خيالو واسع جدًا بنى بيته في شكل دائري لمن سألوهو عن السبب قال: عشان مرتي ما تقول لي حابسني بين أربعة حيطان.. واحد حمش جدا ركب الطيارة حلف على بناته بالطلاق يساعدن المضيفات.... أحد الظرفاء توفيت زوجته، قالوا ليه: نديك أختها قال ليهم: ليه نسابه ولاَ شركة تأمين. واحدة بتغير شديد على زوجها فتحت جواز راجلها لقت مكتوب رجل أعمال مسحت أعمال وكتبت: عوضية ---------------- ثلاثة من أردى وأفشل أنواع الوزراء: - وزيرصاحب كوارث وما بستقيل. - ووزيرعايش على التطبيل. - وواحد قاعد في نفسنا عديل. الولاة الإقطاعيون الفاشلون ثلاثة: - والي واقع شراء في الأراضي. - ووالي عنو« الشعبي» ما راضي. - ووالي كيسو فاااااااااااضي. ثلاثة من أنتن أنواع المعارضين: - معارض إيدو في جيب النظام. - ومعارض ماعندو إلا الكلام. - ومعارض موجود بس في الإعلام. ------------- تعريفات عصرية جداً الغضاضة هي: أن تغض الطرف عن الاحتلال وتمسك بس في «الحشرة».! الوداعة هي: أن تودع قوافل المجاهدين بدموع التماسيح. اللطافة هي: أن تلطِّف أجواء الحرب بكلمات مايعة، منكسرة. الشجاعة هي: أن تشجع المحتلين بالدعوة للتفاوض. الرشاقة هي: أن ترشق العدوبكلمات أرقّ من مناديل الورق.
