«والله البلد دي ما فيها خير بدوم كلو كلو.. هكذا دخل الوزير«x» غرفة نومه وهو يطنطن ويلعن عجز الموازنة.... المدام تدخل عليه ويدور بينهما هذا الحوار: مالك الليلة جايي مكربن كدي وحالك بالبلا. كارثة... كارثة يا مدام «z»...!!! في شنو ياراجل، وقّفتا قلبي.. تصوري ديل دايرين يخفضوا مخصصاتنا لي الحضيض!!! يخفضوها كم يعني؟ ما حيكون تاني في بدل لبس، ولابدل سكن، ولابدل قُفة، مش كدي وبس، حيشيلو مننا بدل الحج العمرة، ياخي ديل دايرين يوقفوا حج الدستوريين كمان.. ما مشكلة نحنا ماكلو سنة قاعدين يحججونا، كفاية الفات.. - مش كدي وبس ديل دايرين يوقفو تذاكر السفر والعلاج بالخارج و... ما مشكلة نتعالج قبلنا هنا.. يامدام «z » ديل قالوا الأولادو بقرو بره بالدولار لازم يجيبُم يقرو هنا في البلد التعيسة دي.. ما مشكلة نقريهم هنا في النهاية ياها دي بلدُم.. إنتي أصلك ما فاهمة حاجة، ديل يا فالحة، عايزننا نعيش زي المواطنين لحدي ما الوضع يصّلح..!! ما مشكلة ما نحنا أصلاً مواطنين وأولاد مزارعين كمان.. إنتي عارفة بالصورة دي ما حأقدر أجيب ليكي حتى شغالة.. ما مشكلة حأغسل برآآآاي وحأدبخ براآآآآي.. وإنتي عارفة إنو كمان عربية الأولاد حيشيلوها.. مامشكلة نأجر ليهم امجاد. وعربيتك إنتي برضها.... مالا عربيتي ؟؟؟؟!!! قالو أي مسؤول حيخلو ليهو عربية واحدة بس، يعني عربيتك إنتي وعربية الأولاد، خلاس بح... لا دي فوضى دي، خلاس يعني بقت علي عربيات نسوان الوزرا!!.. تعال كمان النوريك الكلام الصحي صحي، قسمًا عظمًا في البيت دا يا أنا والعربية مع بعض، يا العربية تمشي بي جاي أنا أمشي بيت أبوي جاي... الدستوري «x» احتار ضرب أخماسًا في أسداس، ولم ير مخرجًا من الورطة سوى التنازل لها عن منصبه الوزاري علّها توافق وهو يستجديها: خلاس إنتي أبقي في منصبي وشيلي العربية بتاعة الوزارة، وأنا بقعد ليك في البيت..!! «يعني هي مشت الوزارة رئيسًا وهو قعد في البيت حبيسًا»... أبو الزفت.
