النعيم ود اخت الزين جاء في اجازة اسبوع من الخرطوم عشان يستعيد ذكريات رمضان في الحوش العامر.. الريح جاب مرتبة ختاها فوق البرش لزوم ضيافة وكدة.. النعيم شرد من شفع الحوش الأمين في اللاب توب بتاعو بلعبوا في لعبة زوما او الكرات الملونة.. الريح كوَّع يعاين لي النعيم وهو مشغول باللاب توب بعد شويه نهرو.. يازول هي انتا جاي عشان تقهي في الداهية بتاعتك دي انتا موش في اجازة طيب القصة شنو؟ النعيم الذي كان مازال مقهي في اللاب توب رد.. أنا مع اصحابي في الفيس بوك.. اعتدل الريح جالسا شنو؟ فيس شنو؟ اغلق النعيم الجهاز وهو يقول الفيس بوك.. دا محل تخت في صورتك وتلاقي اصحابك والناس البعاد كلهم.. اعمل ليك حساب؟ ضرب الريح صدره وهو يهز رأسه ويقول ابوك يا صهيب في زول في الحلة دي ما عامل لي حساب وانتا ذاتك تقدر ما تعمل لي حساب.. ارتمى النعيم ضاحكًا هيق هاااااااااااااااق يازول يعني صفحة.. الريح زعل من صحكات النعيم فرد بمساخة.. ياتا فيهم اليمين ولا الشمال الله لا خلى ليك صفحة بلا طعنة.. النعيم ارتفعت ضحكاته اكثر ههههههه هااااااااق الريح شوف انا حا صورك واعمل ليك حساب!عند أذان المغرب لم يستعجل الريح الفطور وظل جالسًا خلف اللاب توب الى ان جاءت سمية زوجته راكضة.. الريح يا راجل انتا وين الناس فطروا؟ دون ان ينظر اليها الريح رد يا وليه فزي انا مفسفس!
