رمضان مشى خلاص على النص وسخن والناس اتجرست.. عم الزين قاعد يسبح ويقول يا حليلك يالشهر الفضيل.. خلاص الضيف قرب يودع.. صهيب راقد في مصطبة المزيرة وقاعد يترشرش بي نقاع الزير ويقول لسه فاضل عشرين يوم! سمية وزهور قاعدين في الراكوبة.. الريح دفر الباب ودخل شايل بطيخة ختاها تحت الزير وجاء قعد زهجان.. رمى الطاقية ناداهو عم الزين.. خير يازول استغفر ربك.. صفق الريح كف بكف وهو يقول.. بالله أنا ماشي في الشارع عصرني ليك زول قلتا اشوف الحاصل طلعتا راسي اشوف ليك بوكس دبل قبين زي السهم بعد شوية سيد البوكس وقف وقال لي الريح كييييييييييف.. صدمتا لقيتو ليك ود بخيت فاطر رمضان داك قال شنو سافر الدهب وبقى ملياردير.. همس عم الزين أقسام وبعدين الدهب راقد عندك في البيت بس إنتا ما عارف.. صفق الريح يديه قائلاً بس ما تقول إنك قاصد الولية سمية.. هدرت فيه زهور دي دهب دي ألماز يا بوم.. نهض عم الزين وامسك بيده وأخذه إلى المخزن فتح جوالاً كبيرًا من القمح وحمل منه قبضة وقال في دهب أحسن من دا.. يلا امشي راضي المرة المسكينة ديك!