ريحة بسكويت المكنة طقت ملت الحوش نص النهار والشفع شغالين اكل وغميس في كوز مويه كبير.. نهى جات داخلة شايلة كيس كبير وجاره الشنطة قعدت في الراكوبة قاطعة نفس.. حاجة زهور عاينت لي الكيس وقالت اجي يانهى بقيتي دلالية انتي كمان؟ تثاءبت نهى بصوت عالٍ متقطع.. ومالو امي كان عملت كدا ما اخير ليها من هدوم حاجة الزينة التقول جايباها من سوق المستعمل دي! نجوى التي كانت في المطبخ حملت الكنش مهددة وهي تردح انتي يابت لسانك الطويل يعملوا ليك شنو؟ هسع ديك المرة طلعتيها مكسورة خاطر هي وبتها.. نهى لم تهتم للتهديد وفركت يدها بالاخرى قائلة اها وبرضك جبتا ملايات من السوق العربي رخااااااااااااااص حابيعن للجيران خليها التخارج ملايات التايقر الزي البطانيه ديل! هاجت زهور فيها يابت .. ملايات شنو كمان.. انتي جنيتي فرد ملاية مابتبيعيها سامعا والله دا الفضل.. نجوى اقتربت من الكيس.. نفرشن هنا دي تبيع شنو.. نهى خطفت الكيس غاضبة قبل ان تقول.. والله كان عملتا بيهم فستان زي بنات دعاية المكرونة ديك ما اديكم ليهن!!