من فريق الزومة كانت بداية مسيرته الرياضية التي تخللتها عدة محطات فانتقل للأهلي العاصمي ولم تخطئه أعين كشافي المريخ العاصمي ليصبح بعدها صمام أمان الفرقة الحمراء، وبعدها حزم حقائبه شرقاً مدافعاً عن شعار هلال الساحل ثم حزم نفس الحقائب هذه المرة محترفاً في النصر العماني ثم أخيراً عاد ليتجه غرباً حاملاً نجمة مريخ السلاطين.. إنه المدفعجي حسبو محمد يوسف الذي التقته «الإنتباهة» في ونسة رمضانية فحكى الكثير والمثير. ٭ بطاقة تعريفية؟ حسبو محمد يوسف من مواليد سوبا غرب متزوج وأب لطفلين. أكتر فرقة إرتحت فيه؟ المنتخب الوطني. ٭ مستواك ثابت رغم انك اكبر لاعب في الجيل الحالي؟ أنا ما أكبر لاعب يمكن أكون من القدامى لكن في أكبر مني كتااااااار !! والمحافظة على المستوى تتطلب إنو الواحد يكون مُستقراً في حياته عامة ويبعد عن السهر ويواظب على تمارين اللياقة. ٭ لاعب تمنيت تلعب معه في فريق واحد؟ اللاعب الخلوق ياسر رحمة والمهذب حمد كمال. ٭ لاعب شاب تتوقع له مستقبلاً في السودان؟ مهاجم فريق الزومة حسام. ٭ في فرِق بين رمضان مع المريخ العاصمي ومع بقية الفرق؟ كيف مافي فرق انت عارف رمضان مع القمة عموماً ما ليهو أي طعم لأنو دايماً هناك معسكرات وراء معسكرات، وما بتقدر تفطر في البيت ولو يوم واحد، أما مع بقية الفرق أنا هسي وإنت بتكلمني واقف في المطبخ مع المدام وبجهز لشراب المويات وتقول لي ما في فرق. ٭ مواقف لا تنسى في حياتك الرياضية؟ هم ثلاثة مواقف، الأول رحيل ابن المريخ سامي عز الدين لإنه كان معاي في السوق وبس فارقتو ثانيتين لقيت أخوانا المصريين يكوركو «إلحقو زميلكم تعبان» وده كان موقف صعب بالنسبة لي. والتاني في مباراة كانون ياوندي بالخرطوم ونحنا فايزين بأربعة وباقي من الوقت دقيقة ودايرين قون واحد، وبعد نهاية المباراة وخلاص نحنا ودعنا البطولة اختلط الفرح بالحزن والحسرة يعني ما كنت عارف اعمل شنو لكن اهم شي اليوم داك انو الجماهير كلها ساندتنا بعد المباراة ووقفت معانا. والثالث في بطولة سيكافا الحالية مع فريقي الحالي مريخ الفاشر والمباراة كنا لاعبين فيها بعشرة والجماهير تساند والوالي يساند الوقت داك ظهر معدن أبناء الفاشر الأصلي. ٭ لاعب بالمريخ العاصمي كان مقرباً لحسبو؟ نجم الدين أبو حشيش وجندي نميري ٭ وبمريخ الفاشر؟ كلهم أخواني وكلنا بتربطنا علاقة قوية ببعض. ٭ موقف طريف؟ كل مواقفي مع فيصل العجب داخل الطائرات. ٭ الضغط على العجب حتى اعتزل ؟ خطأ كبير، وانا من رأيي العجب كان يخلوهو براهو يعتزل لكن ما بالطريقة دي!! ٭ أكتر وجبة مفضلة لديك في الإفطار؟ العصيدة بملاح الروب. ٭ أكتر مشروب مفضل؟ التبلدي. ٭ القنوات السودانية في رمضان؟ أنا أحرص على لمة الأسرة بعد الإفطار لذلك لا أتابع القنوات السودانية إلا قليلاً. ٭ شكراً ليك يا حسبو؟ شكراً ليكم إنتو يا ناس «الإنتباهة» ورمضان كريم، وتحياتي لكل الشعب السوداني، وكل فرد فيهو يصوم ويفطر على خير إن شاء الله.
