الفيفا طبعاً هي رأس الهرم نحنا شدة ما عينا قوية الفيفا ذاتها ما سائلين فيها نلعب مباريات كأس السودان اثناء المونديال برغم انو الفيفا قالت كتشينة ما تتلعب اثناء المونديال لكن مخالفة القوانين واللوائح الدولية والداخلية حقتنا طبعاً نخالف طوالي خالف تذكر والغريبة عمك قوقل ما متذكرنا فارغة لي بهناك هي الطريقة التي ندير بها امورنا ولا ندري سبباً او حكمة لما نتخذه من قرارات المهم نقرر بي شتارة نقرر بدون استراتيجية نقرر نقرر وبس واذا كان اتحادنا الهمام يريد ان يحابي الهلال محاباة في تقديم او تأخير مباريات دورية فهذا شأن يدعو للضحك والتندر فلو الغى الاتحاد جميع مباريات الهلال الدورية او قدم الاتحاد جميع مباريات الهلال الدورية او اعطى الاتحاد الهلال جميع نقاط مبارياته الدورية فان الهلال لن يستفيد افريقياً شيئاً لانو البقت بقت ومشية الهلال للكنغو زي مشية اسبانيا للبرازيل خسارة سفر وستة نقاط في اسبوع ساااااي محاباة الاتحاد للهلال تخلق منه فريقاً «مدلع» وعشان الدلع ده ما بجيب شي لانك لو دلعت ولدك مرقتو الشارع بنجلد وبحقروا بيهو الشفع لذا دلع الاتحاد للهلال هو السبب في دقة الهلال افريقيا ستة وتمنين سنة سنة تنطح سنة المهم حتى توجيهات الفيفا منكورة عندنا لما يوم الفيفا تنكرنا وتريحنا الفيفا قالت النشاط يقيف اثناء كاس العالم البلعب كاس السودان شنو ؟؟؟ ايها الناس مجلس المريخ قام بواجبه في التجديد والاستعداد والاعداد تماماً يبقى واجبنا نحنا في التشجيع والمساندة لازم نقوم بيهو طولة البال التكاتف والاقتناع بان المريخ فوق الجميع وهو الهدف الوحيد السامي جداً لكن جماهير كاس العالم يجننوا جماهير زي الازاهير متين كاس العالم يتلعب عندنا اها نجي لي شمارات والي الخرتوم كان شفت يا والينا امس قلنا نجيب الخضار ومشينا في حلتنا لقينا كرتونة الطماطم بي خمسمية والكيلو بي تلتين في حلتكم كيلو الطماطم بي كم يا والينا ؟؟؟ خمسة ليمونات بالفين يا اخينا في حلتكم الليمون بي كم يا والينا ؟؟؟ في حلتنا الخضرة الربطة قدر شنبي ده بالشي الفلاني في حلتكم بتاكلوا خضرة يا والينا ؟؟؟ في حلتنا ربع اللحمة بي خمسطاشر في كافوريكم ربع اللحمة بكم يا والينا ؟؟؟ سلك كهربا ننساك كيف ورمضان لو جا احتمال يتعاقب معانا، ما بنقعد ما بنقعد والى لقاء