العفو والعافية من اي زول محتاجين ليهو بالنسبة للناس عافيين ليكم دنيا واخرى كيف ما نعفي والكريم بغفر في هذا الشهر الكريم ما تقدم من الذنب بل وما تأخر عافين ومسامحين ده الشهر الوحيد البحبو السودانيين موت بنحبو عشان الشهر الوحيد في السنة البنضمن ناكل فيهو بنحبوا عشان التسامح والوجوه بتنور والقلوب ترتجف من خشية الله والعبادة على اصولها هو ذاتو رمضان وينو يا حليلو فضل فيهو شنو الاحد الجاي ده خليهو الاحد دورو ليهو خمسطاشر يوم فضل فيهو شنو شهر الصيام اوحشتنا اللهم تقبل من الجميع واجعلنا اجمعين من عتقاء هذا الشهر الكريم كل الامة الاسلامية وبالذات السودانيين اللهم محتاجين عتق شديد يا ربنا دايرين نتفكفك دايرين نعيش زينا وزي المسلمين في دبي وفي الرياض وفي بيروت وحتى الفي امريكا اللهم بلغ المقاصد واجعل هذا البلد آمناً وأميناً يارب العالمين أميناً دي بالذات يا رب العالمين لانو لو بقى أميناً يبقى حايبقى آمناً بإذنك اللهم وبرحمتك والعفو ما تنسوهوا اخوتنا الاهلة بالذات وحكاية عدم بطولة جوية دي ما تخليكم تحقدوا علينا في الآخر الاشياء قسم وبتطولوا وتاخدوا مدة اعفوا لينا واتفرغوا للمدة ديك اللهم وافرح خمسة وسبعين في المية من الشعب السوداني يوم الكنغو يا الله خمسة وسبعين في كل مباراة يعني اللهم افرح مية وخمسين في المية من الشعب السوداني في الكنغو يا الله روشا قول آمين المهم بعض المريخاب زعلانين من نتيجة دنقلا اولا الفريق مشى بدون اعداد تانيا وجوه جديدة كتيرة شاركت ثالثا الفرص الضائعة كانت كتيرة جداً رابعا اولاد دنقلا ما حمام خامسا وهو الاهم مجموع اعمار سبعة من الذين شاركوا يساوي مجموع اعمار عمر بخيت ومهند الطاهر وده الطريق الصحيح اي منتخب في كاس العالم مشى قدام الاعمار صغيرة اي منتخب ودع بدري اعتمد على الاسماء وحتى التي شاخت شيخ عمر بخيت ما بقبل كلمة شاخت دي المهم انتخابات الهلال على الابواب المرشحين ديل كلهم اي واحد فيهم مكسب للمريخ ولكن نميل الى احدهم اللهم فوز احدهم يا الله اها نجي لي شمارات والي الخرتوم رمضان كريم يا والينا لكن قول لينا لو السعودية نظرها ضعف يا والينا ما حانصوم !!!! لو يوم التحري جاتهم سحابة متينة نكمل عدة شعبان ثلاثين يوماً ؟؟ سمانا ده مالوا يا والينا ما بورينا ؟؟؟؟ سلك كهربا ننساك كيف وبنصوم مع الناس ونفطر مع الناس، إن أحسن الناس أحسنا وإن ...ولا مافي داعي والى لقاء سلك