مكنة ربطوها الجماعة لتطمين جماهيرهم ودارت الشائعات حول كسب أبو الهل لشكواه ضد فيتا قالوا فيتا عندها لاعب بلعب مع فيتا بي اسم وعمر معين وبلعب في منتخب بلدو بي اسم تاني وعمر تاني وقالوا حكاية الصعود مع مازيمبي بقت بين ابو الهل والزمالك قول الكلام ده صاح لو بقت كده تفتكروا الزمالك حايخسر ؟؟؟ مجرد التعادل في الخرطوم يأهل للزمالك لان المواجهات المباشرة تكون قد حسمت الامر للزمالك ولان الهلال كما وصفه كاتبه الكبير محمد عبدالماجد بموت في آخر دقائق زي الزول العملوا ليهو عملية كبيرة ونجحت وخرجوهوا البيت وعملوا ليهو الكرامة غداء بالليل مات ده وصف محمد عبدالماجد لفريقه المحبب الهلال أيها الناس فيتا دخلو شنو في لاعب بلعب في بلدو بي اسم وعمر مختلفين عن البلعب بيهم مع فيتا ؟؟؟ وهل السيستم صنعوهوا ناس فيتا وسجلوا بيهو اللاعب ده ؟؟ أيها الناس الامر كله تخفيف لحزن الاهلة بتأهل المريخ في سيكافا سيكافا الغالباهم العمر كلو دي وسترة للمستوى المتواضع امام هلال كادوقلي ونصرة للكاردينال ومحاولة لدفن اثر الكجوجية الكاردنالية أيها الناس تتذكروا بيتر جيمس ؟؟؟ اتحادنا رفض الشكاوي فيه والاتحاد الافريقي كذلك ولكن العقوبة يمكن ان تقع على البلد البتلعب بالورق مساوي ده هل خسر الهلال نقاط نظير مشاركة مساوي المطرود افريقيا ؟؟ خسر المنتخب النقاط النادي ما ليهو دخل في الحاجات دي حقوا تشتلوا بي حكمة شوية البقت بقت والطار طار والصفر الدولي صفر دولي مهما الزمن طال وان طال الزمن يا محمد عبدالماجد أيها الناس الاربعاء قريب وحانوصل مصدر الخبر لي خشم الباب وعندها سيضحك الارباب وسيضحك خشم الباب وحتى الصفر سيضحك لن يزحزح الصفر شيء ولا حتى الاخبار المفبركة صفر بركة لا راضي يفوت ولا بموت المهم حاجة فاطنة في حلتنا هلالابية اتجرست شديد بعد طيران الهلال الاخير جيت اصبرها قلت ليها خيرها في غيرها يا حاجة فاطنة السنة الجايه حاولوا تاني وقالت وهي تبكي انا ضامنة اعيش للسنة الجايه ؟؟؟ سبعة وتمنين سنة وما شفت شي عندي حاجتين عشت ليهن وما شفتهن كنت دايرة اشوف بتي عروس واحضر جديدها واشوف الهلال بطل واحضر استقبالو في المطار بتي ضفرت الزرقاء مع البيضاء والهلال طيرانو اقدم من طيران الخليج وقعدت تجعر قلت ليها حاجة فاطنة اتصفري اقصد اتصبري البت بعد البيضاء مع الزرقاء دي يمكن تتخارج قالت لي قول البت اتخارجت، والبخارج الهلال شنو ؟؟ قلت ليها يسيب الكورة بس أيها الناس ماشين كويس في سيكافا وماشين تمام في تحقيق اهداف المشاركة ولي قدام لان سيكافا هي نقطة الانطلاق وعلى الذين يبخسونها يورونا انجازاتهم فيها أيها الناس سيكافا اقوى من اي فريق سوداني عدا المريخ فهو الوحيد الذي قهرها كم مرة كده ولكنها قهرت جميع فرق السودان الشاركت فيها مليون مرة يبقى الفرق الشاركت وما طالت ما تسيئ ساي طرف السوط بفوتها بهناك غادي أها نجي لي شمارات والي الخرتوم كان شفت يا والينا الوطن بقى ما بكفينا يا زيدوهوا لينا اصلكم في الزيادات ما بتبخلوا علينا يا فكوهوا لينا نجبدوا ونمطوا زي العجينة يمكن يكفينا سلك كهربا ننساك كيف والوطن ما بثق فينا والى لقاء