وطني سعد الدين ابراهيم يا صحوة تناسب روح العصر يا قوة تعيد أقواس النصر يا أماني وساع ما ليهن حصر يا ليل بيغازل نور الفجر وطني: يا موسم أخضر يا نامي يا منور خلفي وأمامي أحزانك على صدري وسامي وهواك أتغلغل في مسامي لون بالأخضر أيامي يا فرح العز المتنامي يا وهج الروح المتسامي متحكر إنت في إلهامي وطني: الأحرف كيفن توفيلك لو أفضل عمري أغنيلك ومن عشقي فصولاً أرويلك ما بوفي كتيرك وقليلك العنق مطوقو بجميلك والدمع بيحصدو منديلك والقلب يطمنو تأويلك والروح الهامت في نيلك في عشبك وقمحك ونخيلك بتحلق عالي تشابيلك جواي تكبيرك وتهليلك وطني: يا أحلى الغرس يا صرخة بكل الهمس يا حاضر رويان بالأمس يا باكر يا يوم العرس وطني: يا ضاحك في وش الدُنيا يا صانع إيقاع الغُنية تُم تُم ودليب زاد التطريب وابتهجوا شعوب وإن شاء الله قريب الحرب تخيب والسلم يسود وحمايمو تصيب وطني: يا داخل منطقة الإشراق لا مسغبة لا إملاق يا خطوة مارد عملاق بي رقة عاشق مشتاق وطني يا حديقة ورد وبحيرة شهد وضفاف الود ونداوة الصهد وصيانة العهد في جزر ومد مهموم بالغد وتغني بجد يا بكرة عليك الرك المارد يقوم ينفك واقع ملموس ما شك جَرَبك ما بفيدو الحك والفكرة الأسمي محك الفكرة نعيش حرية والشمس تكون محرية والأرض تكون دُخرية وبلد لي كل الناس.. المخلصة والدوغرية بتغرد زي قمرية لكن رقصت صقرية وطني!
