هاشتاق الخميس هناء إبراهيم # لو اتأخرت (5) دقائق تجد (50) اتصالاً بغرض الاطمئنان.. الواحد بقى يخاف من خوف الناس من طلس الخطف أكتر من إنو يخاف من حقيقة الخطف والاختطاف.. والله جد.. # تجرح مشاعر زول بي كلامك وتؤذي بي كلامك قلبو وروحو والناس تضحك قائلة (قصف جبهتو).. اتفرجتوا؟! # عندي سؤال واقف لي هنا: ال(5) يعني كم ساعة بالسوداني؟! # في زول في الحياة دي إنت بتكرهو عشان صاحبك بكرهو.. غير كدا ما عندك أي مبرر كُره. والله جد.. # (46) جيلاً عملوا على إدارة (هوشي ريوكان) وهو أقدم فندق يعمل حتى الآن.. تأسس عام 705م في اليابان وتديره عائلة واحدة منذ تأسيسه وحتى الآن.. # أكثر المشاعر سوءاً وإزعاجاً أن تكون غاضباً ولا تدري ما الذي يغضبك وليست لديك فكرة عن ما الذي يُمكن أن يرضيك ويُهدئك فبتقفل معاك قفلة كعبة خلاص.. والله جد.. # في المواقف في ناس بتضحك مرة واحدة وبتسكت وناس بتضحك وتسكت، ثم تاني تضحك وتسكت، وتالت تضحك وتسكت، ورابع.. وهكذا كل شوية تتخيل المنظر وتضحك لحد ما ربنا يبتليهم بمصيبة أو نسيان فيسكتوا.. # الدورة الأنفية تمنح كل فتحة أنفية راحة من الروائح والأتربة والجفاف وما إلى ذلك حتى يأتي دورها مجدداً، لهذا عندما نصاب بنزلة برد نشعر أن هناك فتحة أنف مسدودة.. وتقريباً (85%) من البشر يتنفسون عبر فتحة أنف واحدة تتغير كل بضعة ساعات وفقاً لسياسة الدورة الأنفية أعلاه.. # قيل إن تعرضنا للسع البعوض يتزايد بسبب عوامل كثيرة من ضمنها فصيلة الدم.. حيث قالت الدراسة إن الأشخاص من فصيلة الدم (o) يجذبون البعوض بصورة أكبر من الأشخاص أصحاب فصيلة الدم (B)، وناس ((A هم الأقل جذباً للبعوض. ياخ البعوض ذاتو بتاع ناسات.. # الحقيقة في زول بمثل وحده (90%) من الناس البتحبهم. والله جد.. # في ناس وجودهم في حياتك يعتبر نعمة من نعم الرحمن أحمد ربنا عليهم كتير.. عشان نعمة وجودهم دي لو زالت ح تبقى ميت حي.. و..... حيثما ملت قلبي مال لدواعٍ في بالي
