سودارس : كتروا (الشطة) وزحوا لينا بعيد

كاكا قال لدوائر فرنسية إنه يتوقع إنهياراً وشيكاً لقوات التمرد السريع تحديث ذكي جديد ل"واتساب" في آيفون نائب البرهان يفجّرها بشأن حل مجلس السيادة واتّهام قادة كبار في جوبا تشابه دماغ البشر والذكاء الاصطناعي يدهش العلماء القانون يلزم الشركات السياحية بسداد تأمين مؤقت عن رحلات العمرة لو ليك فى الرومانسى.. لا تفوت هذه المسلسلات فى دراما رمضان 2026 اكتشاف وجود علاقة بين الاكتئاب وهشاشة العظام دراسات: إوميجا 3 تحسن الإدراك وتعزز المزاج عقوبة مالية على الإتحاد وإيقاف عضو الجهاز الفني لنادي المريخ قرارًا جديدًا لوزير التعليم العالي في السودان والي النيل الأبيض يشيد بالليلة الثقافية الأولى لهلال كوستي الجيش يفشل هجومًا عنيفًا لميليشيا الدعم السريع (ده ماهلالك ياهلال؟؟) السعودية تدين بشدة الهجمات الإجرامية لقوات الدعم السريع على مستشفى الكويك العسكري وعلى قافلة إغاثية لبرنامج الغذاء العالمي مهارات يامال تعجز مبابي ونجم مانشستر سيتي شاهد بالصورة والفيديو.. الفنانة إيمان الشريف تشعل حفل زواج صديقها "حتة" بأغنية (الزعلان كلمو) والعريس يتفاعل معها بالرقص شاهد بالفيديو.. نجم السوشيال ميديا "حتة" يضع يده على عروسه ويحتفل معها بطريقة طريفة على أنغام (الما بحبونا والبكرهونا) شاهد بالفيديو.. نجم السوشيال ميديا "حتة" يضع يده على عروسه ويحتفل معها بطريقة طريفة على أنغام (الما بحبونا والبكرهونا) بالصورة.. دكتورة من مريدات شيخ الأمين تكتب: (الشيخ بجيب القروش دي من وين؟ داير تتأكد تعال مسيده في الثلث الاخير من الليل) بالصور.. الشيخ محمد هاشم الحكيم يحتفل بزواج إبنته الدكتورة من زميلها بالجامعة (قلت له لا أريد منك شيئا سوى أن تتقي الله فيها وتعينها في دراستها) الفنان محمد صبحى يعود إلى ماسبيرو بالمسلسل الإذاعى «مرفوع مؤقتا من الخدمة» أفراد من الشرطة يلقون القبض على السائق الخاص بالقائد الميداني لمليشيا الدعم السريع "جلحة" داخل "ركشة" بحي بري بنك الخرطوم يتعهد بإرجاع مبالغ «ضمان الودائع» ويتحمل التكلفة كاملة ذكرى رحيله.. قصة حب نور الدمرداش وكريمة مختار وزواجهما أبل تفتح CarPlay أمام تطبيقات الذكاء الاصطناعي الصوتية الهلال يتلقى أول خسارة بدوري المجموعات أمام مولودية الجزائري 8 علامات تنذر بمشكلات في الأمعاء لا ينبغي تجاهلها هلال كوستي يدشن برامجه الثقافية بليلة ثقافية كبرى وتكريم رموز النادي والمجتمع السودان يرحّب بالقرار 1591 شاهد بالفيديو.. سرقة محل مجوهرات بشارع الوادي بأم درمان وقيمة المسروقات تقدر ب(ترليون) جنيه شاهد بالصور.. سيدة الأعمال ونجمة السوشيال ميديا السودانية الحسناء ثريا عبد القادر تخطف الأضواء من معرضها ببورتسودان الجوهرة السودانية عامر عبد الله ينضم رسمياً لأحد الأندية الخليجية محاولة أوكرانية جديدة لإفشال مفاوضات السلام بعيداً عن ارض المعركة وزير الثروة الحيوانية: البنك الزراعي وبنك النيل يمولان صغار المربيين لزيادة الإنتاجية رفض الزوج شراء سجائر لها فقتلته.. جريمة زوجة مصرية تثير الجدل توصيات المؤتمر القومي لمعالجة قضايا الشباب بيان مهم لوزارة المالية في السودان المركزي يوجه بنك الخرطوم بإيقاف الاستقطاعات وإرجاع المبالغ المخصومة للعملاء لجنة أمن ولاية الخرطوم تؤكد المضي قدما في تنفيذ موجهات رئيس مجلس السيادة لبسط الأمن وفرض القانون ضبط اسلحة ومخدرات بكسلا حريق كبير في سوق شرق تشاد صعود الذهب عالميًا يرفع أسعار المعدن النفيس فى قطر صباح الخميس صلاح يتحدى مرموش.. موعد مباراة ليفربول ضد مانشستر سيتي بكلاسيكو إنجلترا رسالة أخيرة في بريد الرئيس البرهان قبل تمرد الحركات المسلحة الدارفورية تعرف على سعر الأسمنت اليوم الاثنين 2 -2 -2026 فى مصر ترامب يحذر إيران: الوقت ينفد والهجوم القادم سيكون أشد مباحث الخرطوم تعلن توجيه ضربة موجعة لمافيا السيارات..إليكم التفاصيل تلفزيون السودان يستأنف البث المباشر من مقرّه الرئيسي وزير الصحة: التبغ عدو الحاضر والمستقبل و فاتورته الصحية تفوق عائداته الضريبية هل قتل السحر الأسود الإسرائيلي عبد الناصر؟.. كتاب جديد يكشف خفايا خطيرة في مصر سباق اختراق الضاحية باكورة بطولات الاتحاد العربي لألعاب القوى شركة اتصالات في السودان تعلن عن توقف خدمات "مَا حَرَّمَ إِسْرَائِيلُ عَلَى نَفْسِهِ"! أحمد الشاكر: انا أعجز عن شكر جميع الإخوة الأشقاء في المملكة العربية السعودية ترامب للإيرانيين: واصلوا الاحتجاج.. المساعدة في الطريق إليكم السودان..حصيلة صادمة بمرض شهير في ولايتين إسحق أحمد فضل الله يكتب: (حديث نفس...) "كرتي والكلاب".. ومأساة شعب!

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

كتروا (الشطة) وزحوا لينا بعيد

قوون نشر في قوون يوم 20 - 08 - 2013

تعالوا نطلع شوية من الحتة دي القلوب إذا كلّت عمت ، عشان الموضوع ما يبقى لينا كلو مفوضية واستئنافات.

زمان نحن وقت كنا (طلبة) الواحد فينا ما بضحك إلا في (الحصة الفاضية).

ما بتشوف (سنون) الطالب إلا إذا كانت الحصة فاضية.

منيتنا في الحياة دي (الحصة الفاضية).

الحصة الفاضية دي ننتظرها زي (هدف) التأهل.

شفتوا هدف مساوي في (ناسارو)..شجرابي إلى الآن قاعد يصرخ...تقول الهدف دا جابتو بنتو (اشرقت).

ساعة الاستاذ يكون غايب الفصل كلو بكون قاعد (يقهقه) في باب الفصل.

مدفقين من الفرح زي (الغيم)...ونلقط في (الضحكات) زي القطن.

بتذكر أول مطرة شفتها في حياتها ..افتكرت (المطرة) دي (قطر) إلى الآن قاعد (امخمخ) في الحكاية دي عشان اشوف علاقة المطر بالقطر شنو؟.

زي علاقة وزير الشباب والرياضة بولاية الخرطوم بالرياضة.

في واحد من الجماعة الفوق قال لي ما تتعب نفسك ساكت العلاقة (القافية) واحدة.

قلت ليه أنا قلت ليك (قصيدة).

القافية اعمل بيها شنو مع (السيول) دي؟.

مالك عاوز تطلعني من شعوري والبلد كلها طالعة من شعورها.

بتذكر لمن (الحصة) تكون فاضية حالات (الفرح) التى تصل حتى (السبورة) المعلقة من سنة حفروا البحر قدامنا.

شبابيك الفصل ذاتها بتكون بترقص زي فرقة (البالمبو)...الشباك بدون ما يشعر تلقى بعرض برة الفصل.

نحن لمن نفرح (شبابكنا) بتعمل كدا بتتخلى من وقارها.

اتذكرت زمان كان عندنا استاذ لمن يتخلى من وقارو ..بضرب ليك (الشعيرية) ضرب صاح.

هسع (المنقا) لو ما اتخليت من وقارك ما بتقدر تأكلها تجربنك واخرتها كدا تقعد ليك بين سنونك قدر ما تتحرفن بتلقى في (سريحة) من أليافها ما طلعت.

أنا ما عارف الحصل على (الشبابيك) في الزمن دا شنو؟ المنقا خليها.

الشبابيك بقت كيئبة، ومملة زي الكورة البتكون مغلوب فيها صفر 1 والحكم الرابع يقوم يرفع الزمن البدل الضائع.

تضّايق في الدنيا دي جنس مضايقة ما فاضل ليك إلا تبلع الزول القاعد جنبك.

وعادة (الكج) جابو ليك الزول القاعد جنبك دا من الدقيقة الخامسة في عمر المباراة هو قاعد يعايّن في الساعة تقول (غفير مدرسة).

والله (الحكم الرابع) لو عارف الفريق لما يكون مغلوب واحد وهو يقوم يرفع الزمن البدل الضائع الناس بشتموه جنس شتيمة.

لو عارف والله ما بعمل حركتو دي كرعينو زي (الاملاء) المكتوب فيها (أعد).

أنت إن شاءالله يعيّدوك من الحدود.

في الوقت دا أنت بتعايّن للحكم الرابع بتشوفو زي (لجنة التحكيم المركزية) بتشوفو تسعة تسعة موش اللجنة فيها تسعة يا صلاح أحمد صالح.

غايتو زمن السر محمد علي كان فيها (تسعة) هسع ما عارف فيها كم؟...يمكن (اللوردات) ديل جمركوها.

ديل يجمركوا (بلد).

ما تقعدوا تعاينوا لي كدا زي (خامس يوم في العيد).

أي حاجة بتكون انتهت.

الحصة الفاضية زمان كان فيها ونسات خاصة ..وتجليّات وضحك ..واستعراض مواهب...واندياحات ما ليها حد.

أي زول عندو قصة حب فاشلة يقعد يقص ويحكي فيها.

الزول ما بخلى ليه (مسلسل) من زمن (ليلة القبض على فاطمة).

الحاجات دي هسع ما في.

زمان في مجموعة من الطلاب تلقاهم بغنوا لي إبراهيم عوض في (درج) قديم ليه بتسأل عني تاني.

غايتو (محجوب سراج) عمل فينا عمل بالأغنية دي خلى الواحد فينا يدخل في دواخلو ويطلع بي غادي من غير ما يشعر.

كوّمنا (حواسنا) تكويم في الأغنية دي واتكسرنا فيها عديل ضفورنا دي - لُكناها لوك من الخجل.

(ليه بتسأل عني تاني بعد ما بعت الأماني؟)...يا محجوب سراج أنت خليت شنو (للعذر) بعد النص دا.

ما اديتنا أي طريقة ما في أي مخارجة بقينا زي (لوري الفحم) الساعة خمسة مساء ....هموم الدنيا كلها في (فحمو) دا.

بالجد محجوب سراج من الذين اوصلوا (الشفافية وغلاة الاحساس) في الوجدان السوداني.

الواحد لم ما بحب مع نصوص محجوب سراج دي ببقى (كُثِّير عزة).

بشيل (البستلة) وبقيف اليوم كلو في الدكان ما عارف هو ذاتو عاوز شنو؟.

حالة من (التشعبط الوجداني اللا منتهى).

التشعبط الوجداني اللا منتهي دا أنا ذاتي ما عارفو لكن سمعت بيه بعد (ليه بتسأل عني تاني).

مرة سألت الفنان والملحن السني الضوي فردة ثنائي العاصمة عن أرق شعراء الاغنية السودانية فقال بدون تردد هو (محجوب سراج).

ومحجوب سراج قطعة من اللطف والرقة والحساسية المفرطة هو يذوب الآن في كتلة من الاحساس كأنه لا يحتمل الطبيعة البشرية التى فيها الكثير من الخبث والمكر والدهاء والقسوة.

محجوب سراج منحنا في الأغنية السودانية (الطهر) ففي كل أغنياته حالة من التفاني واللطف عندما يصل إلى أبعد مدى له.

بأغنيات محجوب سراج كنا نربّها في الفصل ..وندخل في ذلك الوحل من الغلاط والشكل العفيف.

ومجموعة تانية من الطلاب اتخصصت في (التقليد) ما بخلوا استاذ ما بقلدوه.

مدير المدرسة بي نضارتو المن سنة ستة ديك ما برحموه...يشيلوا ويقلدوا فيه.

يا أولاد أهم شيء تركزوا في (الأسئلة).

قعدنا نركز في الأسئلة لمن نسينا (الأجوبة).

الامتحان كلو نحن شغالين (تركيز) في الأسئلة.

انتوا موش بتقولوا فهم السؤال نصف الاجابة نحن ما عاوزين اكتر من نص الدرجة.

نحن شفوت بنفهم السؤال ...ونضمن نص الدرجة أول من ثم نشرع في الاجابة.

هسه ناس ولاية الخرطوم ديل ما بفهموا السؤال.

طوالي بدوروا في الاجابة.

عشان كدا الخريف دائماً بفاجئنا تقول بجيهم (متنكر).

الولاية دائماً بتغرق في الخريف وناس الارصاد ما بطمنوا ليهم زول طوالي يقولوا ليك بكرة في امطار غزيرة عشان الفاصل المداري بمر جنوب حلفا.

نحن زمان بنقسم غزارة الامطار على نحوي شخصي.

يعني المطرة المتوسطة بنقول حدها الركبة.

والمطرة المتوسطة حدها الصرة.

والمطرة الغزيرة بنقول للنخرة.

هسع الحاجات دي اتغيّرت ظهرت ثقافة جديدة بقوا يحسبوها بالملمترات ( يا حبيبي بالملمترات)...وبقوا يقولوا ليك (الفاصل المداري).

اها نحن زمان (الفاصل المداري) المجهجه دا ما كان عندنا.

حاجة آمنة وقت تطلع العصر ..وتقول ليك الليلة السما شايل ...المطرة دي الليلة ما فايتانا.

حاج أحمد بعد (5) دقائق من كلام حاجة آمنة بكون طالع في رأس الصالون براجع في الدرو.

ربع ساعة تاني ...والمطرة تجيك نازلة.

تنزل جت زي الليمون المصروه في (الشوربة) البلد أصلاً غرقانة.

هسع ناس الارصاد الجوي ديل كل يوم يكضبوا فينا عليكم الله (صوالينا) دي ما ناقصة.

هى براها واقفة بالبركة.

ناس الطيب عندهم (صالون) بسمع ليك (النشرة الجوية) زي الما حصل حاجة.

يومو البسمع ليك في النشرة تلميحات لهطول امطار الصالون بقعد يرجف زي (ضفر).

يتراجف متل (باب الزنكي في امشير).

قدر ما تلكزو وتقفلو ..بتفتح تاني.

في اللخمة دي ومع السيول والفيضانات الشغالة الآن ...لقيت لي زول راكب ليه في ركشة وشايلو السيل.

السيل شالو رماهو بعيد.

بعد كدا زولكم طلع من (الركشة) عاوز يحاسب بتاع (الركشة).

ثبتو ليك قلت ليه أنت هسع عاوز تحاسب منو؟.

ح تحاسب (الركشة) ولاَّ ح تحاسب (السيل).

يا زول أنت (الحتة) دي جابك ليها (السيل) ما جابتك (الركشة).

بتاع الركشة كلامي دا ما عجبو واعتبرو تدخل فيما لا يعنيني.

قال لي أنت مالك السيل دا كان جابو من بيتكم.

عاينت في خلفية (الركشة) طوالي عذرت صاحب الركشة.

لقيت ليه العذر.

عارفين الركشة كان مكتوب فيها شنو؟.

الركشة كان مكتوب فيها (وأنت عارف عيونك لما تسرح وين بودوا).

قلت ليه : يعني أنت الجابك هنا (سرحة) ...جابتك سرحة عيون ساكت ما جابك السيل.

بتاع الركشة قال لي (سيل) شنو؟..البجيبني أنت قايلني سايق لي (كارو).

قلت للزول النزل من الركشة أن بقى كدا حاسب ساكت الزول دا جايبك من آخر البلد.

في (سرحات عيون) بتودر الزول.

زي مرة كدا نحن قاعدين في أمان الله ما عندنا أي قضية.

وقف فى رأسنا زول.

الزول عاين لينا كدا ..وسألنا ليك من بيت ناس (هيفاء).

صاحبكم قدر ما وصف لينا ما عرفنا البيت.

آخر شيء في واحد فينا قال ليه يا حاج وصفك دا هنا مافي وصفك دا لو ما بخاف الكضب قابلني في (بيروت) أنت قالوا ليك البيت جنب ياتو (طرمبة).

زولكم طوالي اتخارج في ناس تسألهم يودروا ليك الحاجة الفى رأسك.

اتكشح من هنا.

في واحد تاني.

من غير أي مناسبة.

ومن غير موضوع كمان قال لي أنت تعال هنا الفرق بين محجوب كبوشية وحسين شندي شنو؟.

قلت ليه (التراجمة).

والتراجمة دي يا جماعة محطة جميلة بتقع بين كبوشية وشندي عشان ما تقعدوا تشرعوا فينا ساكت.

جنكم (تشريعات).

واحد ثالث ..مشى للدكتور (ضرسو) ينتح ..صاحبكم شايل (خشمو) في ايدو من الوجع.

الدكتور قال ليه : الضرس البوجعك ياتو؟.

صاحبكم قال للدكتور دقيقة النضرب للمدام أسألها من الضرس البوجعني.

عالم (جبانات).

زولكم عاوز يصلحها قال للدكتور : معليش يا دكتور قبل كدا قلعت الضرس القدامي دا الولية عذبتني عذاب قالت لي خشمك بقى زي (الساقية) فاتح من الاتجاهات الأربعة.

في ناس كدا خشمهم (ضرس) ما فيه زي (المحلية).

أو زي المكتب البتدخل فيه بتلقى فيه فد كرسي ...(دا إذا كان خشمك فيه ضرس واحد).

أو زي ..

أقول ليكم شنو؟.

أوصلها ليكم كيف؟.

شفتوا الزول وقت يكون خشمو فيه ضرس واحد ..بكون زي ولاد الحلة البلعبو قيّم واحد.

كلهم بشوتوا في مرمى واحد (عشان ما تقعدوا تتغالطوا).

مرة مشيت (حفلة).

حفلة في المطرة دي.

اتلملمت وقعدت لي في كرسي قدّام.

شوية كدا سألت ليك الزول القاعد جنبي..قلت ليه الحفلة دي بي منو؟.

قال لي ب (محمد وردي).

قلت ليه يا زول أنت قاعد وين؟...محمد وردي (اتوفى)...الله يرحمو ويغفر ليه ويسكنه فسيح جناته.

الزول القاعد جنبي قال لي : الوقت داك محمد وردي كان عايش يعني يا جماعة الحفلة كانت قبل وفاة محمد وردي.

قلت ليه إن بقى كدا معليش (ما تقول كدا من الصباح).

شوية كدا الفنان ظهر قلت للزول القاعد جنبي لكن دا ما محمد وردي.

الزول القاعد جنبي قال لي أنت مالك ضايق كدا أنت بتعرف محمد وردي اكتر من العريس (اسكت خلينا نستمتع بالحفلة).

كتمتها في قلبي ...(أعمل شنو؟).

الفنان نفخ ليك (المايك) تقول جزار.

قلت للزول القاعد جنبي : لكن محمد وردي ما بنفخ المايك بالطريقة دي.

زولكم قال لي كمان عاوز تغالط في (النفخة).

اضايقت في الدنيا دي جنس مضايقة لمن حسيت ليك (الجزمة) ضاقت عليّ.

الفنان دخل ليك في (سنتر الخرطوم).

قلت ليه يا ود الناس محمد وردي ما بغني (سنتر الخرطوم) انتوا كمان ما بتعرفوا وردي.

صاحبكم قال لي دي (تسخينة) ساكت أنا عارفك عاوز (الحزن القديم) وبناديها اصبر بس.

صبرت في الدنيا دي جنس صبر.

الأغنية التانية الفنان غني ليك (حرامي القلوب تلب).

قلت ليه أنت مجنون كمان وردي بغني (حرامي القلوب تلب)...والله الحركة دي (جمال فرفور) ما بعملها.

صاحبكم قال لي اصبر هسع بقلبها بي (لو بهمسة).

صبرت.

قلت ليه والله دي (قلاب) ما يقلبها كيف يعني من (حرامي القلوب تلب) يدخل في (لو بهمسة)...لو بالغ كدا بدخل ليه في (حيطة) أو في قسم بوليس ..لكن يدخل في (لو بهمسة) والله لو سايق ليه (همر) ما يقدر يعملها.

الفاصل الأول انتهى.

جابوا لينا (العشا).

فتحت صحن الكوكتيل لقيت فيه (موزة) بس.

تاني ما فيه أي حاجة.

طوالي مشيت للعريس قلت ليه اسمع تجيب لينا زول من (نجوم الغد) بتاع بنغلاديش وتقول لينا دا (محمد وردي) ما مشكلة.

بنفوتها ليك.

يغني لينا (حرامي القلوب تلب) وتقول لينا بقلبها ب (لو بهمسة).

برضو ما مشكلة.

ممكن نستحملها.

تقول لينا الحفلة البنحضر فيها هسع دي كانت قبل وفاة محمد وردي ..(ما مشكلة).

بنصدق!!.

لكن كمان الحكاية تحصل تجيب لينا في كوكتيل العشا (موزة) واحدة قاعدة في الصقيعة..وتقول لينا اتعشيتوا ...يبقى الحكاية ما مقبولة والموضوع ذاتو ممكن يجيب ليه دم للركب.

أنت عريس مستهبل ولاَّ شنو؟.

ويمين الفنان الجبتو دا يقيف قدامي تاني بي عشاكم دا إلا (الخوسة) دي تابه.

تفتكروا ما صلحوا العشا.

بعد كدا إن شاءالله يغني (لاعب معاي ضاغط).

واتخارجنا على كدا.

ملحوظة : العاوز يقعد اليقعد نحن مالنا.

هوامش

جمال الوالي قال في موقع (الكوتش): إن اتفاقهم مع (كروجر) ثلاث شهور ونص.

عليكم الله دا مدرب ولاَّ (الإجازة الصيفية).

ثلاثة شهور ونص ...دي بله جابر يفهم ليكم فيها شنو؟.

غايتو ناس المريخ ديل في كل يوم بورونا فن جديدة.

بدعة جديدة.

بقوا شغالين بالقطاعة ويقولوا ليك (لوردات).

ديل لوردات شنو؟.

كروجر ذاتو الظاهر كدا فكت منو.

في مدرب بقبل بهذا الوضع وهذا العقد.

الهلال يلعب اليوم مباراة الافتتاح للدورة الثانية أمام مريخ الفاشر.

نريد حضور جماهيري كبير خاصة وأن التلفزة غير مضمونة.

الحضور في الاستاد أفضل.

امشوا استمتعوا.

عاوزين نغلب كتير.

وما عاوزين أي تنظير من صلاح محمد آدم.

لو الحكاية صعبة عليك طلع (النضارة).

المباراة دي ما عاوزة ليها (نضارة).

ما تصعب المواضيع ساكت.

غدًا يلعب المريخ أمام الاتحاد مدني.

إلى الآن ما شفت حداثة مصرح.

عليك الله ما تملانا يا حداثة (تصريحات).

شوف شغلك وركز في الكورة.

الاتحاد مدني في أم درمان خسر بالستة من المريخ قبل أيام.

وحداثة مع ذلك قاعد يصرح.

أنا ما عارف الزول دا بلقى وقت وين للكورة والتدريبات مع تصريحاته الكتيرة دي.

تصريحاتك اكتر من كورتك.

نقل المباريات في قناة النيلين دائماً (مجهجه).

اصلو الجماعة ديل ما عندهم حاجة مضمونة.

مظهر الهلال وشكله جزء من المضمون ...وعنوان للجوهر.

اظهروا في أجمل زي ..وأروع شكل.

زمان قوة الهلال وانتصاراته بتعرفها من (التسخينة).

وقد كانت هناك جماهير مفتونة بالتسخينة.

بجوا من آخر الدنيا عشان يشوفوا (التسخينة) ويطلعوا.

رجعوا لينا روائع الهلال في اللبس والتسخينة والأداء والانتصار الكبير.

عاجل : لو جات مطرة قفلوا الشبابيك.

انقر هنا لقراءة الخبر من مصدره.