الفنان الجماهيري "كمال ترباس" شكل غياباً عن الصحف السياسية في الفترة الماضية، رغم أنه لا يزال – من وجهة نظر كثيرين - سيد الغناء الشعبي في السودان، حيث فشل الكثيرون في تقليد صوته. و"ترباس" من الفنانين الذين يقيمون أنفسهم ويرفعونها مكانة سامقة، بتقديمه كل يوم عملاً جديداً، ولا ننسى أغنياته الرائعة (أنت المهم والناس جميع ما تهمني، بحبك يا جميل جداً.. وحبك يا جميل فرهد) وأغانٍ أخرى جديدة كثيرة سادت الساحة وطغت عليها سنوات طويلة. وكانت آخر مشاركات "ترباس" الفنية في مهرجان السياحة بولاية البحر الأحمر، بدعوة من الدكتور "محمد طاهر إيلا" والي الولاية، وقد استمتع الجمهور بأغنياته الشعبية الرائعة. وها نحن نلتقيه في هذه المساحة لنقلب معه صفحات الحاضر والماضي ونتحدث إليه بصراحة عن ما نسب إليه في صفحات التواصل الإلكتروني (الفيس بوك) والمواقع الإسفيرية، فكانت إجاباته صريحة في الحوار التالي فإلى المضابط: { ترباس .. ما الجديد لديك؟ - ضحك، وقال: أنا كل يوم عندي جديد وآخر أغنياتي (بحبك جد، وحبك يا جميل فرهد، وطن رائع، جميل ممتد، لو خليت هواك في يوم، أكون ناكر جميل مرتد) من كلمات الشاعر العظيم شاعر (أبوي إن شاء الله لي تسلم، وكلما سألت عليك يقولوا مشغولة) الشاعر الصحفي "عبد العال السيد" شاعر (أنت المهم) وهو شاعر فحل يحترم الفن والفنانين. { أنت متهم بأنك فنان حكومة؟ - أيوه أنا فنان حكومة، وأنا أول من غنيت للإنقاذ وقلت (هبت ثورة الإنقاذ) وعلاقتي بالرئيس سكر، وما حصلت عندو أي مناسبة إلا ودعاني لأغني فيها. { عملت اتحاد فنانين براك، عندما اختلفت مع "حمد الريح"، ووضعت كراسي في الحديقة المقابلة لدار الاتحاد، وقلت لي "حمد الريح" أنا ما داير اتحادكم ده عندي اتحادي براي؟ - "حمد الريح" فنان محترم وأنا احترمه وأقدره، والكلام ده ما حصل ودي إشاعات أنا عندي اتحاد فن الغناء الشعبي ما محتاج لكلام زي ده. { ورد على شبكة الإنترنت بأنك قلت العازف (الشُرابوا وسخان ما بعزف وراي)؟ هل هذا صحيح؟ - أقول ليك كلام.. أنا ما بحب الوساخة وجني وجن العازف الوسخان، أعاين للعازف من (شُرابو) لى لبستو كلها، فالهندام مهم والعازف لازم يكون أنيق، وأنا كل العازفين معي نُضاف والحمد لله. { الفنانين الشباب سلبوا أغنياتك فهل تسمح بذلك لكل من هب ودب؟ - بعض الفنانين (ما بختشوا)، مرة فنان شاب قاعد معاي طلع المسرح وغنى أغنيتي بدون ما يستأذني، الزمن دا أي فنان عايز يظهر، وأنا شخصياً ما عندي مانع زول يغني أغنياتي لكن بإذن. { رأيك في الغناء الهابط؟ - الفنانين الشباب عايزين يظهروا بسرعة، والغناء الهابط بيوصل بسرعة، وأنا أفتكر أن الكلمة ممكن تكون هابطة لكن الأصوات ما ممكن تكون هابطة. { هل صحيح أنك قلت.. أنا زي البصمة ما بتكرر؟ - شوف.. أي فنان بيتقلد، لكن الإحساس ما بتقلد والصوت بصمة، والبصمة ما بتتكرر، والفنان قبول وكاريزما، وفي فنانين كبار ما عندهم كاريزما. { ترباس بدون (عمة)، حدثنا عن هذا المشهد؟ - العمة عندي شيء مهم وهي بطاقتي الشخصية، وعِمتي (9) أمتار، وعِمة ترباس بقت موضة، والعمة بغسلها بالبخار، وعمتي دي بتوريك الناصية من تاني ناصية، وحصل مشيت عرس ببدلة، العريس رفض أغني، قال لي الناس ما بعرفوا أني جبت ترباس، رجعت لبست العمة، ومرة مشيت البنك أصرف قروش بدون عمة، الصراف رفض وقال لي أنت ما "ترباس" أمشي ألبس لي عمة وتعال، وفعلاً العمة كانت في العربية لبستها ورجعت البنك قعدوني مع المدير وجابوا لي القروش. { وقع رحيل الفنان "محمود عبد العزيز" عليك ؟ - محمود ولدى وعرستو ليهو بتى "حنان بلو بلو"، تأثرت كثيراً لوفاته وهو فنان ما بيتقلد، فنان عندو قبول كبير، وكان بناديني يقول لى " أبوي " اترحم عليه ولا يوجد في الساحة الفنية من يحل محله، وكنت أتابع حالته منذ مرضه الأول، ربنا يرحمه ويغفر ليهو. { ومشاركتك مهرجان السياحة ببورتسودان ؟ سافرت إلى بورتسودان بدعوة كريمة من الوالى الأخ الصديق الدكتور "محمد طاهر إيلا" والوزير "الصادق المليك" ومعي أسرتي فهو مهرجان ناجح بكل المقاييس وربنا يحقق الطموحات لأهل بورتسودان. { الجهمور ماذا يعنى لترباس ؟ الجمهور أقدرة وأحترمه جداً، ولولا الجمهور لما أتوجد "ترباس"، ربنا يحفظ الشعب السوداني، ولولا جمهوري العزيز لما خرجت الدكتورة والمحامي، كل الشعب السوداني على رأسي من فوق، وأشكر صحيفة (المجهر) العملاقة والأستاذ" الهندي عز الدين " هذا الشاب الطموح على الجهد الكبير في مجال الصحافة.
