بالعكس في آخر مقعد في طائرة النقل الداخلي التي لا تختلف كثيرا عن أي بص سياحي في الشكل والحجم والخدمات ، جلس بجواري رجل غربي .. لا أدري هل هو أمريكي أم أوروبي لأن لهم نفس السحنة في نظري .. القميص غير المهندم والبنطون القصير القريب من الركبة واللحية المشعسة غير الحليقة ، والكاميرا الرقمية التي تتدلى من رقبته ... قلت في نفسي إنه لو إرتدى رجل سوداني مثل هذه الثياب لمزقته الألسن تمزيقا ، ولكننا لا نندهش مطلقا لو رأيناها على أجنبي ... بجوارنا كان يجلس رجل أمن ... كيف عرفت إنه رجل أمن ؟ هذا الأمر متروك لخيالك الخصب ، وإختصارا أقول إنه رجل أمن .. وبيني وبين الخواجة دار هذا الحوار تحت أنظار رجل الأمن ... كان يتكلم عربية ركيكة مخلوطة بالإنجليزية وأنا أتكلم إنجليزية ركيكة مخلوطة بالعربية ، لذلك كان حوارنا مثمرا .. ولأنه حوار مثمر في حضرة رجل أمن لذلك من فضلك إقرأ الحوار بعناية حتى نهايته من أعلى لأسفل ثم أقرأه من أسفل لأعلى مرة أخرى ... وفي الحالتين .. أنا ضائع ... قلت له : - سلام - سلام - رأيك شنو في السودان ؟ - بلدكم جميل بس ما عندكم حريات رأي وتعبير - والله عندنا ...وأسأل أي زول - والفساد عندكم كتير شديد - كلام فارغ ... ماف اي حاجة زي دي طيلة 23 سنة - وحكومتكم ناوية تطبق الشريعة الإسلامية - ده المفروض يحصل من زمااااان ، وعز المنى والطلب والله - والمسئؤلين بتاعينكم ممكن تحت أي لحظة يتقبضو لأنهم مطلوبين - نقول شنو .. حسبنا الله ونعم الوكيل ، ربنا يجازي الكان السبب - دولتكم تحتل المرتبة الثانية في الدول الأكثر فشلا في العالم - ده كلام جرايد ساي - حكومتكم قالت انها عملت تنمية بس ما شايف اي حاجة - ما شايف الكباري والسدود دي ؟ - إذا كان يوميا بهاجروا من الشباب تلاتة الف من الأطباء والمهندسين والأساتذة والعمال المهرة ، حيفضل ليكم شنو بعد كم سنة ؟ - حيرجعوا .. صدقني كلهم حيرجعوا - ووين مشت الديموقراطية والعدل والأمن وحقوق الإنسان ؟ - موجودين بكثرة عندنا - وماذا عن الفقر والجهل والمرض ؟ - ما عندنا الحاجات دي ، ولا سمعنا بيها أساسا - حصل قبل كده عندكم مسئول إتقدم لمحاكمة أو تم سؤاله من أين لك هذا ؟ - حاصل كتير بس الأمور دي بتفضل سر زي ما عارف .. - ناس البي بي سي قالو إنو مسئوليكم عندهم حسابات سرية في سويسرا وقصور في ماليزيا .. الكلام ده حاصل ولا ما حاصل ؟ - والله ديل شوهو سمعة البلد وسيادتها في الخارج .. ربنا يجازيهم الملاعين.. نحن عملنا ليهم شنو ؟ - طائراتكم ممنوعة من الهبوط في مطارات أوروبا ، وديونكم الخارجية أكتر من بتاعة أمريكا ، ناس حكومتكم ديل دايرين يودوكم وين ؟ - يا زول ماف زول وطني بيرضى بالكلام ده ... بس حسبنا الله ونعم الوكيل - عايز أسألك بصراحة .. إنت راضي عن البيحصل في بلدك ؟ ما شايف إنو جو خانق وطارد؟ - بالعكس يعجبني شديد - أتمنى حواري معاك ما يضايقك ؟ - إنت ضيفنا في السودان ونحن بنكرم الضيف - سلام - سلام الكاتب الساخر : د.حامد موسى بشير