العبدلله ليهو حوالي اسبوعين عندو (قرفة) وزهجة شديده وإحباط ولما الحاله دي تجيهو بيقوم يقفل عليهو الأوضة بتاعتو وما عاوز مفاهمة مع أي زول .. الدقن تعشعش .. وطفايات السجاير تتملي .. (مع القلب ده) .. ناس البيت عارفين الحتة دي .. وعارفين يتعاملو معاها كيف . قضية النفايات دي جات مع (القرفة دي) وما عاوز أقول (الفلس ده) وهو بالمناسبة واحد من الاسباب .. وواحدة من اسباب الفلس للمواطن السوداني إنو الحكومة رفعت أيدا من كل شئ ومش كده وبس كمان بتطالبك بدفع حاجات كتيرة .. العتب .. النفايات .. الموية مع الكهرباء .. الشنو مع الما تعرف شنو .. وفي خضم (القرفة دي) جاء للعبدلله (إستدعاء المحكمة) بسبب النفايات .. بوليس لابس رسمي في مسألة (أبلد قانونى) في الدنيا لا يمكن أن يصنفها بانها مسألة جنائية .. (هسه ناس النفايات) ديل كان ما جو شالو النفايات بقدر أشتكيهم (جنائياً) طيب هم يشتكوني جنائياً وأكون (مجرم) ويجرجروني وهم (لا) ليه ؟ لكن طبعن هنا ممكن .. حيث للقوانين (ترزية) و(مكوجية) وغسالين ! الملابسات بتاعت (بلاغ النفايات دي) إنتو عارفنها .. طيب نجي للملابسات بتاعت أخوانا بتوعين الأمن (البجرحوا ويداووا) . اليوم الساعة أطناشر كان موعد إنعقاد الجلسة بتاعت النفايات بمحكمة النظام العام بسوق أم درمان .. عشان الناس تعرف حقها طلبت من أعضاء المنتديات التي بإسمي أن يقوما بعمل بوسترات تحث المواطنين على عدم الدفع إلا بأورنيك 15 كما يقول القانون وسمعاً وطاعة للسيد رئيس الجمهورية والسيد نائبة (آدم الحاج) وكل المسئولين الذين ما فتئوا يرددون لنا أن عدم التحصيل باورنيك 15 هو جريمة لا تغتفر وإثم عظيم . اول الواصلين إلى المحكمة تحمل بوستراتها كانت الأخت (بت وراق) والتي لم تعرفني لأول وهلة بسبب (الدقن الأبيض الكث) جلسنا وأنا أرتدي الزي السوداني إضافة للسديري نتحادث في إنتظار أن (يندهنا) حاجب المحكمة أخذنا نتحدث إنتظاراً للمحكمة وقد تجاوزت الساعة الثانية عشر بقليل وفجأة هجم علينا شباب غلاظ تحسبهم من أقارب (جون سينا) او (هوغ هوجان) على اقل تقدير .. كانوا أربعة .. أمسك احدهم (بالبوسترات اللسه ما فتحناها) والتي كانت تمسك بها الأخت (بت وراق) - نحنا الأمن جيبوا الورق ده وقوموا يلا معانا ! الفاتح جبرا ساخر سبيل [email protected]
