ممكن تكون قريت في المدارس (6) سنوات ، زايد (3) سنوات ، زايد (3) سنوات تاني ...زايد (4) سنوات ..يعني (16) سنة كاملة ...ويمكن يكون فيها سنوات اعادة محصلتها (5) سنوات ...المجموع الكلي للدراسة يصل الي (21) سنة قراية. و21 سنة قاعد تقرأ. الروضة خليناها ..ما حسبناها ليكم. ممكن تكون طلعت بعد هذه المحصلة الدراسية الي معلومة ما عاوزة ليها غلاط. الخواجات الواحد قبل ما يلدوه بكون عارفها. المعلومة دي هي. واحد زايد واحد يساوي (اتنين). طول عمرنا بندرس في الحكاية دي. اي زول عارف الاجابة دي ..بدون حتى ما تكون دخلت مدارس او قريت (21) سنة. ممكن عادي تفتح تلفزيون السودان حقنا (المطوفش) دا يقولوا ليك فيه... واحد زايد واحد بساوي (4). بالله. موش دا تلفزيون الحكومة. ممكن دا يحصل في تلفزيون السودان (القومي). عادي. ولا في زول بقدر يقول حاجة. ولا كلمة. تفتح خشمك انت مخرب. ال (21) سنة القريتها في المدارس بلها واشرب مويتها. خللوها ...على طريقة عادل امام. رياضيات شنو؟. وتاريخ شنو؟. وجغرافية شنو؟. ديل عندهم رياضيات وتاريخ وجغرافيا حقتهم براهم. عملوها وين ما تسألوني؟. جابوها من وين ما تسألوني؟. رياضاياتكم (المخلقنة) دي. شاطرين لي بس في (ايصالات) المرور ...ورسوم الدراسة وجباية الزراعة. موش ديل مرات بتزرع (قمح) في حواشتك ...بتحصدو (قطن). وما في زول بقدر يقول حاجة. قطن شنو؟. تحصدوا (ورق)..تقعد تضرب وتقسم وتجمع وتطرح ...وتطلع في النهاية مطلوب. عندنا واحد مركب ليه (حلة كوارع) في البيت. ظبط ليك ليها التوم والبهارات والبصل ...وعمل ليها ليمون وقرفة وهبهان. ظبط ليك (الكوارع) دي جنس تظبيط. زولكم وقت الكوارع (نجضت) وبقت على (الاكل) ...فتح الحلة ..لقاها ليك (عدس). الكوارع راحت وين ما تسألوني؟. العدس دا جاء من وين ما تسألوني؟. انا ما بحب الاسئلة. الفهم فهم ..والما فهم بي طريقتو. ديل ياكلوا مال النبي ..ما ياكلو (حلة الكوارع). ديل!!. موش ديل. الناس الشايفنهم ديل. مرات تشحن موبايلك (زين) ينزل فيه (mtn). تشحن (سوداني)...ينزل ليك (حبشي) عديل كدا. وروني اعمل شنو انا بس؟. احلها كيف؟. اضربها كيف؟. ديل حيرونا. تمشي للكهربة..يقولوا ليك ادفع حق الموية....(هسع في جن اكتر من دا). علاقة الكهربة بالموية شنو؟...عشان تدفعها في فاتورة واحدة. تدفع حق (الموية)...عشان تجيب (الكهربة). عليكم الله دي في العالم كلو بتحصل. غايتو نحن مساكين جنس مسكنة. تفتح الفضائيات السودانية الصباح ...تلقى (fm) شغالة. انتوا فهمتوا دي. عندنا طالب الاستاذ قال ليه بكرة لو ما جبت رسوم الامتحانات ما عاوز اشوف وشك دا ...وبالمرة كدا جيب لينا مع رسوم الامتحانات (حق اللبن). عليكم الله دي مدرسة وإلا رعاية اجتماعية البتشيل (حق اللبن) دي. غايتو جنس عالم. المطر ما تجي .. يقعدوا يبكوا ...ويقولوا الغلاء ...والكرب نزل بالناس..اي حاجة تطير السماء. تولع عديل كدا. عشان شنو؟. عشان المطر ما جات. يقوموا يصلوا صلاة استسقاء. المطر تجيهم. يقعدوا يتجرسوا ليك فينا ...الحقونا ..بيوتنا وقعت ...ومجارينا كعبة ..والبلد غرقت. يقولوا ليك شنو؟. يقولوا ليك السيول والفيضانات. يقوم تاني (الغلاء) يجي. عشان شنو؟. عشان السيول والامطار والفيضانات. الغاز دا يطير السما. الفحم يبقى ليك بالشيء الفلاني. الاتصالات تبقى غالية. مشوار الركشة يبقى ب (20) جنيه. تقول ليه ...ليه يا ود الناس؟. يقول ليك انا ما بدخل في (الطين) دا. خلاص اقلبها (طيارة)...وقت ما عاوز تدخل في (الطين). غايتو عالم. غايتو ناس. نوع ديل يعملوا ليهم شنو؟. انا غلبتني. وروني انتوا ....دي بتجي كيف؟. احسبوها لي. فهمونا ليها. انا غلبتني. خلوني انا. تب غلبتني. عندنا واحد جابو ليه (ولد)...مشى عشان يطلع ليه (شهادة الميلاد)..قالوا ليه جيب لينا (الرقم الوطني). قال ليهم يا جماعة انا عاوز (اسميه) ...ما عاوز (اجندو). رقم وطني لي شنو؟. عاوزين تصرفوا ليه (مرتب). العالم كلو عارف انو الليلة يوم واحد اكتوبر. اي زول عارف الحكاية دي. في الصين او في الضعين او في بنغلاديش. الليلة يوم 1 أكتوبر. ممكن (ناطق رسمي) يطلع في مؤتمر صحفي ..ويقول ليك لا...الليلة ما يوم واحد اكتوبر...الليلة يوم تسعة يناير. وما تقدر تقول ليه اي شيء. موش هو (ناطق رسمي). ممكن. (حمامتك) قدام عينك تأكلها (كديسة). الجماعة ديل يقولوا ليك لا. الحمامة دي ما اكلتها الكديسة دي. الحمامة دي اكلها (الارنب) البرة البلد. تقول ليهم دي كيف؟. يقولوا ليك (التقرير الطبي) اثبت ذلك. تقرير شنو؟. نحن نكضب عيونا. ممكن زول يموت بي (ملاريا) منهم ...يطلعوا ليك (شهيد). ويعملوا ليه عرس. وقومة وقعدة. وزول تاني يموت بي رصاصة في رأسو...يطلعو ليك (مخرب). ويقولوا ليك (الرصاصة) دي ذاتها ما رصاصة. دي (طماطماية) ساكت. تتخيلوا كيلو (الطماطم) وصل مرة ل (36) جنيه. طماطم (خواجية) ؟.... ابدا. طماطم (تركية)؟.... ابدا. طماطم جنسها شنو دي؟. بتولع (كهربة). وإلا بتتقلب بعد الساعة واحدة (لحمة ضان). عندنا زول عادي كدا. ما عندو اي اختلاف. مشى يأكل ليه فول. طلب ليه طلب فول...وقال لصاحب المحل ..عليك الله صلحو. على (صلحو) دي تعال شوف الحساب. سيد المحل ..وقت زولنا دا مشى يحاسبو ...قام اول حاجة نادي (الجرسونات) الشغالين في المحل. يا زول انت عاوز تعمل شنو؟. وقام طلع ليه (آلة حاسبة) من الدرج. وقعد يضرب ليك في الحساب. وكل مرة يصل ليك (جرسون) من الجرسونات الواقفين قادمو. واحد بيض بالطوة. جبنة. زيت زيادة. رغيفة. طعمية بي الف. الزول دا غايتو ساعة ونص يحسب ليه في الحساب. لمن خلاص المحل عاوز يقفل ...والجرسونات بدأوا يطبقو في (الكراسي)...زولكم قال ليه الحساب. لا حول. ولا قوة إلا بالله. يا زول معقولة حسابك دا كلو في (طلب الفول) دا. معقولة. انت كبيت لي مزانية البلد دي كلها في طلب الفول دا. اخر حاجة زولكم هبش جيبو...وقال لي صاحب المحل ...ممكن تمسك الجلاكسي فور دا ..لمن امشى الصراف الآلى وارجع احاسبك. اها اقول ليكم شنو؟. اوصلها ليكم كيف؟. انتوا مفروض براكم تعرفوها. والله الحكاية بقت صعبة. صعبة شديد. افتكر دي يمكن يحلها عاطف خيري. دي نحن ما عندنا ليها حل. غلبتنا. ما درسونا ليها. عاطف خيري عندو مقطع بقول ( واجعني في البحر السكات). ثم يكمل هذا المقطع بتفسير سكوتي ويقول (وسكتني في الوجع البحر). شفتوا كيف؟. دي جيبوا ليها (عاطف خيري). اتخيلوا ...(بلة جابر) دا. بلة جابر حقنا دا ..بي كورتو دي. يقوموا يقولوا ليه شنو؟. يقولوا ليه يا بلة جابر ..ابقى وزير المالية. بلة جابر يقوم يتلفت جاي وجاي ...يقوم يقول ليكم ما في حل ..غير نرفع الدعم من المحروقات. ياها قدرتو. يعني منتظرين منو شنو؟. طيب يا بلة جابر ...عليك الله لو دا حلك ...في داعي يعملوك وزير ..ويفتحوا ليك مكتب ...ويدوك عربات ..ونثريات ..ومرتب ...وانت ما عندك لينا حل غير انك ترفع الدعم من المحروقات. الكلام دا (الحبش) بعملوها بدون (وزير مالية). وزير مالية لي شنو؟. ما تخسروا الدولة (كرفتات) ومايكات ساكت. والله الموضوع دا لا عاوز ليه وزير مالية ولا حاجة. يقوم (ضفر) ينط ليك في الموضوع. ضفر دا شنو؟. ضفر دا نقول (وزير الاعلام). يقوم ضفر يقول لينا شنو؟. يقول لينا لا كدا غلط. نقول ليه (الغلط) شنو؟. يقول لينا ما تقولوا (رفع الدعم من المحروقات)..قولوا (اصلاحات اقتصادية). لكن يا ضفر دا اصلاحات. ايوا دي اصلاحات. اصلاحات ...الرغيف (3) رغيفات بقت بي الف. دي اصلاحات. اصلاحات جالون البنزين يبقى ب (21) جنيه. دي اصلاحات. ايوا اصلاحات. انتوا فاكرين الاصلاحات دي شنو؟. الاصلاحات دي يعني المواطن بدل (3) وجبات يأكل ليه (وجبة) واحدة. طيب (والبيتزا) كيف يا كوتش. البيتزا دي بالذات ...الناس كانوا ما بعرفوها. نعرفها ..نعمل بيها شنو؟. كان لبنا ..وقمحنا ...وكسرتنا مكفيانا..هسع بالله اي حاجة بتجي من (برة). البلد دي ما فيها حاجة بنزرعها هنا ..او بنصنعها برانا. كلو بجي من برة. عشان لو زرعت ليك (فجلة) ساكت ..يقاسموك فيها. المحلية تشيل نصيبها. والولاية تشيل نصيبها. وناس المدرسة يشيلوا نصيبهم. وناس (نظافة الحي) يشيلو نصيبهم. وناس المستشفى يشيلو نصيبهم. يعني (الفجلة) في النهاية تطلع مطالب فيها. طوالي يرموك في السجن. ديل. ديل صعبين شديد. غايتو انا اتحيرت فيهم. تفتح تلفزيون السودان ..تقول والله البلد دي ما فيها اي مشكلة غير (السيول والامطار والفيضانات). تقرأ جرايد ...تشوف العجب...تقول الخرطوم دي (باريس). المشكلة كلها في دي لبست (طرحة)...ودي لابسة (بنطلون). بالله دي كلام يا جماعة. انتوا عارفين. جالون البنزين في البلد دي اغلي من (برميل) الدم. عارفين...الطرمبة بتساوي كم زول. مات (210) شخص...والناس والفضائيات وجرايدنا الفارغة دي بتتكلم عن حرق (62) طرمبة. يا جماعة. يا عالم. خلاص. ملحوظة : وإلا ما خلاص. هوامش بعد دا كلو. تصوروا ح اقول ليكم شنو؟. ح اقول لليلة الهلال عندو مباراة مع النسور. تصوروا. الله يستر من (الكشف). اوعكم ناس النسور ديل يقولوا عاوزين يفحصوا للحكم. يفحصوا ليه مالو؟. سيحة دا قاعد لي هسع يحلل. يا زول انت بتقول في شنو؟. اشمعنا يا سيحة يا شاطر ما استعملت لينا نظرية (لون النجيلة) في هدف اديس الذي سجله في المريخ ونقضه الحكم. الغريبة المباراة كانت في استاد المريخ. يعني لون النجيلة قاعد. ليه بس لون النجيلة بتشوفو في هدف رمضان عجب. الاهداف التى يسجلها المريخ سيحة يؤكد صحتها ب (لون النجيلة). سنة يا انا. والاهداف التى تسجل في شباك المريخ ..سيحة يقول ليك الصورة ما واضحة. ما واضحة ...طيب نحن جايبنك (ترزي). ما تشوف لينا مبدأ (لون النجيلة) دي. يا رضا تاني سيحة دا عليك الله لمن تجيبو ...جاب ليه (ام فتفت). عشان يقزقز في (ام فتفت) وهو بحلل. شغلكم دا يا رضا عاوز ليه (ام فتفت). اصلو ما لقيت ليه حاجة انسب من (ام فتفت). بالله سيحة يحلل في الاهداف زي (الفحيص). دا شنو دا. دا شنو بالتعملوا فيه دا. نحن زهجنا من الكلام دا. شوفوا لينا حاجة جديدة. ان شاءالله باسطة. اقول ليكم حاجة. الليلة مباراة الهلال والنسور. تصوروا. تتخيلوا ..انتوا حكاية زي دا. اتخيلوا براكم. انا خلاص عاوز اقفل العمود. احمد الحاج بدأ يضرب. كمان عامل ليه ترويج. يعني يا غرق يا جيت حازمها. حازم شنو يا ابوالشباب. الحكاية انتهت. انتهت وين؟. الفهم فهم ..والما فهم بي طريقتو. يا احمد الحاج استلم. ........ عاجل : يا ناس النسور لو عاوزين تفحصو للحكم ..افحصوا ليه قبل المباراة تبدأ. وإن طال السفر - محمد عبد الماجد صحيفة قوون
