اي حاجة في الدنيا دي اتغيّرت ...اتشقلبت ...حصلت (شقلبة) كدا ما مفهومة. ما تكتر لينا الكلام في الحتة دي ..(عليك الله خارجنا من بدري). ورانا الف حاجة وحاجة. زمان الجمعة دي كان فيها (غداء كارب)...بلدي ..وسلطات ..وبطيخة مقيلة اليوم كلو تحت الزير. هسع (البطيخة) اختفت من غدا الجمعة. شالتها (المحلية). ويا ريت لو وقفت على (البطيخة)...لو بقت على دي ساهلة. الغداء ذاتو اختفى (في ظروف غامضة). غداء الجمعة ..من سرعة ايقاع الحياة ..وقصر اليوم ..بقى يجيك في فطور السبت. هسع عليكم الله ما بتفطروا يوم السبت بي (بامية مفروكة). انت (البامية المفروكة) الماسكها لينا الايامات دي شنو؟. موش مرات بتكون ماشي في شارع ..تلقى نفسك فجأة كدا في شارع تاني. عاوز تمشي ناس عمك ..تلقى نفسك عند ناس خالك. الغريبة انك بتكتشف الموضوع دا بعد (3) ساعات ..تلقى نفسك جيت غلط. ما عارف الحصل شنو؟. في حاجة غلط. اليوم بقى قصيّر شديد يمكن عشان كدا غداء الجمعة بقى يتلب في فطور يوم السبت. والفطور بقى عشاء. يمكن ناس البيت اتحرفنوا ..ورحلوا غداء الجمعة الي فطور يوم السبت...رفعوا الغداء للفطور. انا غايتو ما عارف ..عشان ما تقعدوا تسألوني ساكت...ما عارف الحصل شنو؟. ولا عاوز اعرف ...(ما بحب الكلام الكتير). شرعوا براكم. خلوا دا كلو. زمان نشرة تسعة في التلفزيون القومي ..بتجي الساعة تسعة. تسعة يعني تسعة. عارفنها هسع بتجي متين؟. نشرة تسعة ذاتها هسع بقت بتجي عشرة. يا ربي اخرتها (المواصلات). الخرطوم زحمة ...والكوبري مقفول. اي حاجة زادت. زمان كنت بمشي سوق اربعة ...(بتاع بري)...طبعا سوق اربعة ذاتو في برى رحلوه لي (خمسة)...وبرضو بقولوا عنه اربعة. المهم زمان بمشى سوق اربعة دا ..عشان اشتري لي لوح تلج ...(ايام التلج كان تلج). قبل ما تظهر ثقافة (الكسيّر) دي. في سوق اربعة كانوا بدوني لوح تلج معاه (نشارة). هسع بمشي للسوق نفسو ..وبطلب لوح التلج ..بعطوني (النشارة) بدون اللوح. يقولوا ليك (اللوح) شالتو المحلية. عليكم الله ما تسألوني وتقولوا لي (محلية) شنو؟. انا ما عارف اي حاجة. شرعوا براكم ..ونظروا زي ما عاوزين. قلتوا ليكم الجماعة البي (عيون حمر) ديل غيروا اي حاجة ..ما صدقتوني ..قعدتوا تغالطوا فيني. ديل ..جروا الساعة. جروا الزمن. غالبهم يجروا (اللوح). زمان السودان دا كان مساحتو مليون ميل مربع. هسع احسبوا براكم. خسارة (الجغرافيا) الدرسناها في الفاضي. يا خسارة التاريخ. والله لو كنا عارفنو ح يتقسم كدا ..كنا مشينا علمي ..وارتحنا من دوشة (الادبي) دي. قراية في الفاضي ساكت. في شندي ..زمان جانا (خواجة)..طرش لينا انجليزي ..زي الطلقة...قعدنا نتلفت زي (المنشات) في المطر. نمشي شمال ويمين...وما فاهمين اي حاجة. جنس انجليزي ..يمين الانجليزي الطرشو لينا ..(جالية) ما تطرشو. كب لينا جنس (انجليزي)...ما فهمنا فيه اي حاجة..قاعدين نتلفت زي الزول الرادفنو في عجلة. الانجليزي وقت ما تعرفو ...بقى ليك زي قرش البصل. شيتا كتر ...كتر. في واحد مننا (مفتح)...قميصو (زرارة) ما فيه ..قال لينا ..الكلام البقول فيه الزول دا ما (انجليزي). الزول دا بقطع ليكم من رأسو ..في انجليزي فيه (حرف جر). في انجليزي في الدنيا فيه الف واو الجماعة. نحن لو ما بنعرف انجليزي بنعرف عربي. من قمتوا كدا ..شفتوا ليكم (انجليزي) فيه (صرجت). صرجت دي في (العربي) بس. الانجليز ما بصرجو. واحد فينا مفتح اكتر من الزول القميصو ما فيه (زرارة)..قال لينا اجروا جيبوا ليكم (سمكة). قلنا ليه (سمكة) لي شنو؟...انت يا زول ما تفكر إلا في بطنك. قال لينا جيبوا ليكم ...(سمكة)..عشان نسألو منها ..لو قال ليكم السمكة دي (fish) يبقى الزول دا بتكلم انجليزي ..ولو قال ليكم كمان حاجة غير (fish)..يكون الزول دا فاكيها فينا ساكت. طبعا نحن جبنا (السمكة) عشان عارفين اسمها بالانجليزي شنو؟...لذلك (السمكة) بنختها (قياس). بنمتحن بيها الخواجات. زي الزول المشى بريطانيا ..ما بعرف كلمة في الانجليزي غير (fish). زولكم دا قاعد (6) شهور في بريطانيا ...كلمتو دي ما زاد عليها حاجة. يمشي مطعم ..مطعم ..ما بقدر يأكل حاجة غير (السمك). عشان شنو؟. عشان ما بعرف يقول غير (fish). زولكم دا زهج من ال (fish) ... وريحتو ذاتها بقت سمك ..سمك ..من اكل السمك. كره السمك لي يوم الله. يوم مشى ليه مطعم ..لقى ليك الجرسون الانجليزي قال ليه انت تعال هنا (فشكم) دا ..ما بتقلبوا فيه حبة عدس ..شوية فول ...ما بتصلحوها بي (كمونية) ساكت كدا. ان شاءالله (بامية مفروكة). نحن هناك في السودان ال (fish) بجيبوا لينا معاه شوربة كوارع. قلت ليكم اي حاجة اتغيّرت. حتى السمك. السمكة الزمن دا ما بتفرزها من (الفول). في زول عزمنا (سمك)...وجاب لينا (بامية مفروكة). قلنا ليه ..عليك الله السمك والبامية المفروكة ديل البلمهم شنو؟. ديل في (شارع الغابة) ما بتلاقو. زولكم قال لينا (البامية المفروكة) ما تابوها ...والله فيها (فتامينات) اكتر من السمك. قلنا ليه فتامينات البامية المفروكة خليها ...نحن بنعرفها كويس. ديل غيروا (السمك). زمان كان عندنا شباك بفتح (شرق)..دي فيها حاجة. بفتح شرق عديل كدا. اي زول بقول الكلام دا. تصوروا ..نفس الشباك في نفس البيت ..في نفس الغرفة.. الليلة بفتح (غرب). انا ما عارف الحصل شنو؟. الحاجة الوحيدة العارفها ..ناس المحلية كانوا (لافين) في الغرفة. او كانوا قاعدين (شرق). ديل يلفوا الموية في قرطاس. ما تقولوا لي محلية شنو؟. خلوه الشباك. انتوا زمان موش كنتوا بتسمعوا بي (ملوخية بالارانب)..الما اكلها بكون سمع بيها في المسلسلات المصرية. هسع الملوخية بالارانب دي ..عارفين بقوا يعمولها بي (مرقة دجاج) ساكت. واحد مشى مطعم ..طلب ملوخية بالارانب ..قال النشوف الحاصل شنو؟..المصريين ديل كرهونا ب (الملوخية بالارانب). زولكم قاعد في المطعم ..جابوا ليه (الملوخية). ملوخية (سادة). ارانب شنو ...(حمامة) ما فيها. ملوخية النوع الكل (ملوخاية) بتلقاها قاعدة في غرفة وبرندتين براها. صاحبكم كورك للجرسون ..قال ليه انا موش طلبت ملوخية بالارانب. قال ليه : ايوا. طيب وينها الارانب؟ ..جايب لي ملوخية من (الحوض) ..بصلة ما فيها. الجرسون قال ليه : انت من زمن الملوخية بالارانب بعملوها بي الارانب. الموضوع دا انتهى. هسع ما رفعوا الدعم!!...الملوخية بالارانب ...يمين (طماطماية) ما فيها. معقولة ..الجماعة (الشتر) ديل ..رفعوا الدعم من الملوخية برضو. انت قاعد وين؟. طيب ما كان تغيروا الاسم ..يعني طول ما الملوخية ما فيها ولا (ارنبة) واحدة ...ما تسموها ملوخية بالارانب...(عشان نكون عارفين بس ..ما اكتر من كدا)...سموها ملوخية بالبصل ..ملوخية بالطوة ..ملوخية بدون ارانب ..عشان ما نتلخبط ساكت. الجرسون قال ليه لو غيرنا الاسم ..تدفع قروش (الارانب) كيف؟...نحن يا استاذ بنجيب ليك الملوخية بدون ارانب ..لكن انت في الواقع دافع قروش الارانب. بعدين اهم شيء في الموضوع دا (الاحساس)...الارانب دي تتخيلها (خيال) ساكت كدا. ارانب شنو؟. هسع نعمل الملوخية بي الارانب ناس (الحياة البرية) يظهروا ليك ..وناس الرفق بالحيوان يطلعوا ليك. وفجأة كدا تلقى نفسك انت زول ارهابي وما انساني ..بتأكل الملوخية بالارانب ...وبتهدد (الارانب) للانقراض من الحياة. اي حاجة اتغيرت. ايام موضة صحف التسلية ..وانتشار صحف نبض الكاريكاتير وصحيفة الاوائل وغيرهن من الصحف المتخصصة. الحاجة نفيسة شافت اي زول شايل ليه (قلم) وقاعد يحل في الكلمات المتقاطعة وضيف العدد. اي زول بكتب في جريدة. الحاجة نفيسة قالت قادر الله ..زمان الجرايد كانوا بقرأوها ..هسع الجرايد بقوا يكتبوها. يعني القاريء ..بكتب الجريدة ...وهو شريك اصيل فيها. ودا ممكن نعتبروا تقدم (صحفي). حتى في المواقع والمنتديات وتعليقات الاعمدة ..بقى القاريء بقول رأيه بكل صراحة ووضوح في الموضوع. يعني عادي جدا ..تلقى ليك قاريء مفتح كدا ..يقول ليك الزول دا ما عندو موضوع. عادي ...(اي واحد ينظر على كيفو). او يعلقوا ليك في الفيس بوك او الواتساب ..ويقولوا ليك الزول دا بناقض نفسو. يعني واقفين ليك بالثابتة. اصلوا ما بتتلفتوا. والحياة اتغيّرت. اتشقلبت. طيب اقول ليكم مثال ..انتوا شركاء فيه. خلوني انا. ما تشتغلوا بالموضوع دا. اعتبروا الكلام السابق داك ..كلو كلام فارغ. ما في مشكلة. ارانب شنو؟. وشباك ايه؟. زمان ..زمان شنو؟. قبل فترة قصيرة جدا..الناس كانوا بمشوا للدهب في الشمالية ونهر النيل. الناس كانوا بمشوا (قبقبة) عشان ينقبوا عن الدهب. اي واحد عمل ليه (جهاز) ومشي على اتجاه العبيدية وابوحمد. اجهزة البحث عن الذهب بقت اكتر من اجهزة الموبايل. اي واحد قبل ما يعمل ليه موبايل بعمل ليه جهاز البحث عن الذهب. بعد شوية ..تلقى صاحبك راكب ليه بوكسي. تسأل منو؟. يقولوا ليك مشى الدهب. البلد كلها مشت الدهب. كان بحصل تعب وتنقيب وبحث ..وحفر ..وهجيرة في الشمالية ونهر النيل بحثا عن الدهب. الواحد بمشي يتقطع في الخلا (3) شهور عشان يلقى ليه سبيكة. هسع الموضوع دا مافي. الدهب بقى يجي للزول في سريرو. الدهب بقى في قناة النيل الازرق. انتوا ما شفتوا جوائز (ام تي ان). قالوا ليك الزول لا ايدو لا كراعو ممكن يفوز بي (5) سبائك دهب. لا قبقبة ..ولا تنقيب ..ولا هجيرة. شفتوا الدنيا دي اتغيرت كيف؟. عليكم الله في راحات اكتر من كدا. في واحد قاعد منتظر (الجائزة). قاموا صاحبو ضرب ليه في نفس وقت (فرز) الفائز. زولكم طوالي قال لي صاحبو اسمع اقفل برجع ليك ..عليك الله الساعة سبعة ونص ..ما تشغل لي تلفونو. ما تضرب لي. الوقت دا انا بكون مركز فيه في حاجات تانية. صاحبو بس بنتظر الساعة سبعة ونص ..عشان يضرب ليه. يا ود الناس قلت ليك الوقت دا ما تضرب لي فيه ..عشان بكون بتابع في (ملكة جانسي). صاحبكم عشمان بالعربية. كلو يوم هو بالطريقة دي. الساعة سبعة ونص ..تلفونو ضرب. قال : اه ..دا بكون صاحبي. لكن زولكم شوية كدا شاف ليك رقمو في (النيل الازرق)..وما فى رد. جرى على الموبايل. اهلا. اهلا وسهلا. نحن شركة الاتصالات ..انت فزت معانا. اصلو ما معقول. اصلو ما ممكن. والله انا ما مصدق. مبروك ...مبروك ...مبروك ...انت بالجد فزت معانا. طيب انا فزت معاكم بي شنو؟..ان شاءالله (عربية)..والله انا محتاج للعربية شديد. انا بموت في العربية. طيب اختار رقم من واحد لي عشرين. بختار الرقم تسعة ...(ان شاءالله تطلع لي عربية). الرقم تسعة. الرقم تسعة يا فيصل!!. مبروك ..انت فزت معانا بي (جالون بنزين)..يلا كدا انت طلعت المهم ..وباقى ليك العربية. اصلو ما معقول. اصلو ما ممكن. طيب ممكن اعرف وقت الاستلام. معليش اقفل ..الشركة ح تتصل بيك بعد البرنامج عشان توريك الطريقة التى سوف تستلم بيها الجائزة. يلا ادينا رقم تاني ..وفائز اخر. الو ..الو... (المشترك غير متوفر الان). اضرب تاني. الو.. ايوا ..معانا منو؟. معاكم ..عثمان ود الحاجة فتحية ..ساكنين نحن في محطة العمود جوار (ست الطعمية). يا عثمان مبروك ..انت فائز معانا. اصلو ما معقول... لا معقول ..اختار رقم من واحد الي عشرين عدا الرقم (9). بختار الرقم (20) ذاتو. الرقم (20). الرقم (20). الرقم (20) يا فيصل. انت شايفني الان في (النيل الازرق). ايوا شايفك. الرقم عشرين ..مبروك انت فزت معانا بي (رغيفة). يا استاذ ..معليش. عاوز اسأل سؤال. اسأل يا عثمان انت فايز معانا ..اسأل اي سؤال. الرغيفة دي محشية ..وإلا ساكت. تشششش...(معليش يبدو ان المكالمة قطعت). ملحوظة : يقطع (اضنينك) العاملات زي (الكواريك) ديل. هوامش مجلس الهلال سوف ينتهى اجله يوم 27 نوفمبر. يعني بعد (31) يوم. بعد شهر. التسجيلات بعد شهر واربع ايام. والوزير ..ما جايب خبر للهلال. انتوا يا جماعة الهلال دا فريق في دولة تانية. الممتاز ..والكأس والتسجيلات ...ومجلس مدته تبقى لها (31) يوم. مفروض الصورة تكون وضحت. يعني مجلس البرير دا مفروض يدعم بشخصيات قوية ..عشان التسجيلات وعشان التجهيز للجمعية العمومية. والحاجات دي مفروض تكون من الان. يعني لا بد ناس البرير ديل يكون عارفين رأسهم من كرعيهم. يا جماعة اصحوا. ويا وزيرة ..ما تنومي. الغريبة الوزير ..وقت المجلس كان باقى ليه شهور ..كان بطلع كل يوم في جريدة ..ويقول عاوز نشكل لجنة تسيير. هسع صاحبكم اختفى. ما في زول عارف حاجة. اتمنى لجنة تسيير محايدة ..عشان التسجيلات. واتمنى فارس عبدالله ومالك اسحق وباسيرو في الهلال. يا صلاح ادريس ...لو عاوز تبقى مريخابي ..ابقى. بس بعد ما تجيب لينا فارس ومالك وباسيرو. الهلال في الموسم القادم ..لازم يجيب كأس الاندية الافريقية. ......... عاجل : شكل صلاح ادريس في المريخ زي (كمال دحية). وإن طال السفر - محمد عبد الماجد صحيفة قوون
