الغريب إنك بتسأل.. إنى وين! وأنت عارف بيني بينك.. مافي بين أنا.. من عيونك.. خطوتين وأنا من زمانك.. لحظتين والضفاف بالفطرة تعرف جية الموجات متين ##### والغريبة معاي.. وغايب وقلبى في أشواقو.. دايب.. راجي جيتك من سنين.. وعمري عدا مع الحنين.. وبرضي واقف في انتظارك.. كأنو طالب الفرقه دين ##### والغريب في الكون لقيتك مرة بدري تكتب معاني الإلفة مرة.. ومرة تشرح معنى عمري وكم قريتك.. وكم سمعتك.. والسنين بالحسرة تجري وعمري ما فكرت لحظة.. إنو شوفتك.. تبقى قدري ###### والغريب لسع بتسأل.. ليه بريدك؟ أسأل الدم البيجرى.. كيف عرف سكة وريدك؟ وأسأل الكف البتكتب.. كيف بقت بالفطره إيدك؟ وأسأل الحرف المعنى.. كيف دخل أبيات قصيدك؟ وأسأل الحزن البيصبح.. دمعة سالت في خديدك وأسال اليوم السعيد.. الحضر لحظة جديدك وأسال البهجه البترسم.. معنى عيدك وأسأل أقدارك وحظك.. ولوح حياتك وأسأل اللحظه البتشهد.. يوم مماتك تعرف إنو الحب مسطر.. وإنو كاتبو المولى سيدك ### والغريبة تغيييييب وترحل وبرضو ترجع تاني تسأل!! عن دروب ريدنا القديمة.. وعن مضامينا الحميمة وعن غرام بيناتنا طول وحقو تسأل عن مصيرنا؟!.. وليه سكن أحلامنا غيرنا.. وكيف حياتنا حتبقى أجمل؟ بس نعيد في الريد حسابنا.. وتفتح الحنية بابنا.. وتبقى عنوان لي كتابنا.. ونمسح أحزانا وعذابنا.. وحقو نسأل.. كم بكون في العمر فضل ؟! تلويح: ليه بتسأل عني تاااني.. بعد ما شلت الأماني؟! إندياح - صحيفة اليوم التالي
