فلسفتي.. الممكن تودين التوج.. أو التونج.. هي أن كل حاجة مخلوقة في الدنيا دي عندها فائدة وعندها مضار.. يعني مثلا الزول الحاسد.. مضارو الحسادة.. لكن حسادتو دي ممكن تنفعك في حالة ضعف قوة حسادتك.. وانتظرو يحسد ليك زول إن غلبك تحسدو كلو كلو.. يحسدو ليك ويجيب آخرو وانت تكون بعيد تتفرج.. أو شافع مضر تكون انت حاسد جارك في عربيتو الجديدة وخجلان لأنك كبير وعيب تكسر ليهو قزاز العربية.. يجي الشافع دا ويقوم بالمهمة من غير ما يكون ليك فيها أي حاجة.. وتقعد زول فرجة ساكت وتقعد تلوم في الشافع وفي تربيتو الزي الزفت.. هنا أصبحت الحسادة ذات منفعة.. وذات ضرر.. منفعة ليك وضرر لي سيد العربية.. كتبت قبل كدا عن منافع الضُبان.. وفي كواستي لمنافع من نعتقد أن لا منفعة منه.. ركزت على النمل.. قلت النمل دا حايم معانا في الدنيا ويقرص فينا.. وهرا شفعنا بالقريّص.. لا زمن يكون فيهو منفعة.. ومن لطف الله لقيت إنو قرصة النملة لها منافع عدة.. بعيدا عن الوجع و الحيحية.. إذا الجسم أتعرض لأكثر من قرصة في مكان واحد.. ح يحصل تليف للجلد.. والتليف معناهو الجلد ح يقاوم البكتريا ودرجة الحرارة المرتفعة زي الايام دي.. والزول الراضي من زول يدعي ليهو ربنا يسلط عليهو نمل الدنيا ويقرصو في الايام الزي نار الكماين ديل.. واللا اقول ليكم في كل صلاة ندعي ربنا يسلط علينا النمل بكل أنواعو من هنشل.. ونمل سكر.. وابريش.. ويقرصنا كلنا شعبا على حكومة.. ويقرصنا في اي محل تطأه قدم النملة.. ولا يشاورنا.. اللهم كبر نمل السودان النملة تبقى قدر الخروف .. واللهم رخص اللحم.. الفائدة التانية للنمل قالو "في ضمة الزول الجاب لي النضم".. انو النملة الانتاية لما تقرص زول بتفرز لعاب ايوني.. اللعاب الايوني دا قاعد يدوب الدهون.. شايل للدهن مقلاع.. يعني الدهن في حتة القرصة سيييييييت يسيح ويروح.. اها مع تطوير تقنية شفط الدهون عن طريق قرصة النملة.. ممكن نفتح محلات شفاطات.. ونربي نمل.. ونجي نشتتو فوق كرش زول مضايق منها.. أو زول مدرم كلو داير شفط عام ندفنو في كوم نمل.. تلاتة جلسات نملية.. ويمرق واهلو يعلقو ليهو يافطة في خشم الباب (الغزال حاسدك عشان فيك الضمير) ويتفتح باب رزق جديد وتكتر الشفاطات في البلد (مدام سوسو شفاطة وحنانة.. تشفط الدهون وترسم الحنة) (الهنشلة للشفط) ومحلات (المضمّر مشفوط وكاحل).. طبعا دي طريقة بدائية.. لكن ممكن نربي نمل ونسحب منو اللعاب ونعبيهو في قزاز.. وصورة مرا سمينة قبل القرصة.. وصورتها وهي زي رايكل وولش بعد القرصة.. نعمل مصنع راسو عديل كدي.. وندرس طريقة تربية النمل للعاب في الجامعات.. وطريقة سحب اللعاب وتعبيتو.. أهاااااا جيت للنضم البصح.. أقول أنا كاتب المقال وصاحب هذه الدراسة.. لو سمعت لي بي زول ساكت بالغلط شال لو بصاق نملة من غير ما يشاورني ،يحلو مني الحلة بلة.. الباب البجيب الريح- صحيفة اليوم التالي
