عاش صوت ضحكتك.. حزنك.. أساك.. وفرحتك.. لطفك.. مناك.. ونشوتك.. فكر معاي في حل سريع.. وأنا بقتنع بي فكرتك.. أرسم ملامح لى طريق.. ما بين مساري وسكتك.. حدد مواقع لي هواي.. داخل مسارب دنيتك.. يا أبقى جنبك وبي وراك.. يا أستقيل من مهنتك. أيوه امتهنتك ريد وشوق.. وادمنت شخصك وروعتك.. متفاني قلبي شديد معاك.. مصلوب على حد لوعتك.. أنا دايرة أبقى طبيب أساك.. واحفظ غيابك وسمعتك.. وأكون من الأيام عزاك.. وفي عز دجاك أنا شمعتك.. أسمع نصايحك واستجيب.. والكلمة دايما كلمتك. مبهورة بي فهمك كتير.. مغمورة في فيض حكمتك.. محتارة في هذا الوصال.. لحظة حنانك وقسوتك.. هيمانة بجري ورا السراب.. ما بين سفوحك وقمتك.. مندهشة في هذا المزيج.. عاجبني خيرك وسطوتك.. أنا بدعو ربي يطول هناك.. يحميك.. ويعدل خطوتك.. وكفاية إني أكون قصيد.. أو نغمة زانت غنوتك.. ولو حظي في الأيام بسم.. أنا ببقى دارك وصفوتك!! *** جوايا عاش هذا الحنين.. وأنا في انتظار عينيك تهل.. إتأخرت جيتك سنين!! كم عشت قبلك في ضياع.. وجواي صدى الخوف والأنين وهسع بعد نورك سطع.. بدد ظلام ليلي الحزين وبقيت معاك زول مختلف.. بيناتنا حبل الريد متين لو مرة جارت بي ظروف.. انا بي حنانك بستعين وبقيت معاي في كل مكان.. في أي لحظة وكل حين شايلك على الراس والعيون.. وانا لي وفاك مخلص أمين وعارفك علي حاني وعطوف.. ما كنت أبداً يوم ضنين شكراً على هذا الحضور.. ولي ربي حمد الشاكرين * تلويح: كل الأشياء المتأخرة.. صادقة!! إندياح - صحيفة اليوم التالي
