* أيها الناس. * اللاعب بالنسبة للنادى. * إما لاعب يفيد النادى فى الملعب أو لايفيده فى الملعب. * وإذا ما بفيدو فى الملعب ما مشكلة. * لكن إذا بفيدوا فى الملعب واحد من إتنين. * يا إنقطعت فائدته عند الإعتزال أو ما إنقطعت. * وإذا إنقطعت فائدته بعد الإعتزال ما مشكلة. * ولكن إذا لم تنقطع فائدته بعد الإعتزال فواحد من إتنين. * لأما يفيد النادى فنياً ويندرج فى الأجهزة الفنية للنادى وإما يفيد النادى إدارياً ويندرج فى القطاعات المساعدة. * وإذا إندرج فى القطاعات الفنية للنادى ما مشكلة لأنه سيتأهل الى أن يصبح مدرباً كبيراً فى النادى. * مثل مازدا وفوزى المرضى وإبراهومة والبدرى وحسن شحاته. * وإذا إندرج فى القطاعات الإدارية برضوا ما مشكلة. * وممكن ان يتدرج ويكتسب الخبرات الى أن يصبح إدارياً كبيراً فى النادى. * وإذا أصبح إدارياً كبيراً فى النادى ما مشكلة. * مثل أبوالعائلة وصالح سليم وغيرهما. * أيها الناس. * المقدمة أعلاه القصد منها القول أن هيثم مصطفى كرار. * هو من نوعية اللاعبين الذين يفيدون النادى داخل الملعب. * ويفيدونه خارج الملعب بعد الإعتزال. * فنياً له خبراته وإدارياً له كاريزما القيادة وقوة الشخصية ومعرفة ما يريد. * فى الهلال فهموا قوة الشخصية غلط وسموهوا سيطرة. * فرطوا فيه. * ففرطوا فى مستقبل النادى فى المستقبل. * بل وشخصية مهمة فى إكتشاف المواهب وإقناع الجدد. * أفقدوا ناديهم إدارياً مهولاً ومدرباً شاطراً. * ما بتتذكروا لما صرح بأن وارغو مابنجح وما بنفع ونصح الهلال بعدم التدخل فى تسجيل وارغو؟؟؟ * ما بتتذكروا لما وفد مقدر من وجهاء المريخ مشى عطبرة وخلص موضوع نزار وصلاح الأمين. * تانى يوم سيدا مشى بالجلابية والطاقية بدون عمه. * موش غير وجهة اللاعبين للهلال؟؟؟ * يبقى الزول مؤثر وبأثر ولا يتأثر. * أيها الناس. * نحن لانرى تحت أقدامنا فقط. * بل نمد البصر أميالاً وأميال. * ونفتح الخيال نحو الخيال. * لذا نادينا بضرورة التجديد لسيدا. * بضرورة أن يختم حياته الميدانية عندنا. * ليفتح صفحات الإبداع ضمن الأجهزة الفنية والإدارية. * ولا تنسوا. * أبو العائلة جانا من هناك. * وفى نفس الظروف. * فتحنا له نادينا. * وفتح لنا قلبه. * إستجار بنا فأجرناه. * فأصبح قائداً مريخياً ندم عليه الأهلة ندم السنين. * لذا. * نادينا ونادى. * سنقابل وفاء سيدا بوفاء جماهيرى كبير. * وسندفع حافز إعادة القيد. * ليس فقراً ولا لأن المجلس لا يستطيع ان يدفع. * ولكن ليعبر اى قرش فى الحافز عن محبة سيدا فى شرايين الشفوت. * والشيخ بابكر بدرى جمع من اى سودنى قرش. * ليشارك جميع الناس فى بناء صرح الأحفاد التعليمى. * وكان فى مقدوره أن يبنى لوحده. * ولكنه فضل مشاركة الشعب. * لترتفع قيمة العمل والأمل. * وقيمة الأمل والعمل فى نفوس الشفوت تجاه هيثم كبيره جداً. * أيها الناس. * قلنا السهم خمسين جنيه. * وممكن عشرة يتشاركوا سهم. * وممكن زول يدفع عشرين سهم. * بس الأهم. * نقدر الفهم. * وقلنا عشان المشروع يبدا. * الداير يساهم يرسل سالة فيها أسمو وعدد الأسهم التى يريد أن يساهم بها للرقم 0913800449. * أمس الرسائل تشرف وتتشرف وتتطاقش. * حب سيدا الكبير خلى الرسايل تدخل إتنين أتنين وتلاتة تلاتة. * ومن أعظم المعانى فى الرسائل التى وصلتنا. * لما يرسل الأب رسالتو ويتبعها برسائل أولادو وبناتو. * ولما يرسل ليك نفرين مساهمتهما سهم واحد. * شيرنق. * يقتسمان محبة سيدا بين قلبيهما. * ونحن فى إنتظار المزيد. * عشان نسلم المجلس كشف الشفوت. * والمجلس يحدد رقم الحساب وكيفية الإيداع. * شفوت نحن يا وطنى. * بعض الجهلة يظن أن الموضوع لضعف المقدرة المالية للنادى. * وهذه سطحية وعدم عرفة. * ولا يغرنكم الغداء والعشاء فى القصر. * ما طوالى بعزموكم. * والضيف الثقيل يزهج المستضيف إذا كتر الطلة والشحدة وحاجات تانية حاميانى. * وناس غداء القصر ديل القايلين الموضوع بيستمر كتير. * ذكرونى قصة. * قالوا فى واحد قابل ليهو زول بعرفوا ليهو عشرين سنة ما شافوا. * صاحبو ده خلال العشرين سنة ربنا فتحها عليهو وبقى تاجر كبير. * وصاحبنا داك خلال العشرين سنة فى حالو إن لم يكن أسوأ. * المهم. * المغندل أصّر على صاحبنا يمشى يتغدى معاهو. * ووصلو البيت. * فيلا زى الفيلا. * دخلوا جوه. * سيد البيت قال. * جيب موية شراب يا ولد. * الولد جاب جك كبير مليان عصير مشكل. * والتلج نصو عايم ونصو حايم. * صاحبنا إتجوغر لمن قرب يلحق المال العام ويغرق. * رفعوا العدة وجابوا الغدا. * أى لحمة تخطر على بالك فى الصينية. * ضان نعام فراخ حمام تمساح غزال أرنب. * صاحبنا يكوضم لمن ندم الأرنب ذاتو على الضبح. * خنق. * قال جيب موية يا ولد. * أدوهوا موية باردة. * ضاقها لقاها موية الله والرسول. * رجع الكباية وقال. * ما دى. * موية شراب يا ولد. * دحين أنتو يا محمدعبدالماجد زيارة القصر الجاية موية شراب مافى. * موية أسكتوا. * أيها الناس. * أمس التحليل التحكيمى أثبت مضطراً. * أن هدف محمد موسى التانى فى الهلال صحيح. * وأن جمعة جينارو إرتكب ضربة جزاء لاغبار عليها. * وهذا يعنى ان التلات نقلط المشت رصيد الهلال مشت لى أخطاء تحكيمية بحتة. * وأن النتيجة الصحيحة هى فوز الخرطوم بثلاثة أهداف. * عرفتوا كيف الهلال بفوز بالممتاز يا ناااااااااااااس!!!!! * أتمنى أن يسمو التحكيم على أخطائه ويتسامى ويترفع أو يخطئ يوم دوريا ً فى حق الهلال. * عشان نقتنع انو الخطأ يقع على الجميع. * أيها الناس. * موضوع سيدا 0913800449 * أها. * نجى لى شمارات والى الخرتوم. * أكان شفت يا والينا. * النسوان بقن يبرشتن فينا. * كلو ما نخت قريشات فى الدولاب نلقاهم نقصن علينا. * لبدت للمرة يوم يا والينا. * قبضتها ليك بتختلس من أموال الأسرة الفاضة لينا. * قلت ليها قبضتك بتسرقى. * قالت لى أبداً بختلس من مال فيهو شبهة ملك لينا. * وقروشك حلال علينا أنت موش والينا. * أنت موش الجبتنا هنا وجبتها لينا. * سكتتنى يا والينا. * لكن فى سرى قلت. * الأموال تتخم وأنا الوالى آخر من يعلم. * معليش ده أصلوا حال البتولى أمراً فينا. سلك كهربا * ننساك كيف والسرقة من بيت الأسد ونحنا نايمين يا أسد,كنا قايلين الأسد ساديها سد. والللللللللى لقاء سللللللللللللللك في السلك - بابكر سلك
