زميلها في الجامعة..... صديقها )ابن ميكي( جدا.. هي تحاول أن تعيش الدور.. لكن بيئتها غير مساعداها.. جاها زيارة في البيت اسمها كلتوم بيدلعها صديقها ب (كلتو) قاعد يتونس معاها.. فجأة سمع حس جدها المخرف يكورك "الرسااااااالة.. الرسااااااالوووو.. تككتي السروال؟".. قال لها "كلتو سوري.. دا منو دا؟" كلتو قالت ليهو "دا جدو.. شوية خرفان" قال لها "ياااااااي.. فانتاستيك.. حزكم.. حزكم نفسي يكون عندنا جدو خرفان.. كلتو سوري يعني.. يعني شنو تككتي؟" قالت ليهو "دي كلمة فرنسية.. لكن ما عارفة معناها.. أصلو جدو ثقافتو فرنسية.. انت عرفت السروال؟ بتسال من تككتي؟" قال لها وهو يقرض في ضفور يدو اليمين وضربها في كتفها بيدو الشمال ومدنقر خجلا "كلتو يا شريرة.. عيب" ثم افاق من نوبة الخجل وسالها "يعني جاتو مسج؟ بالفرنساوي.. سامعو يقول الرسالة.. الرسالة" قالت ليهو "لأ.. الرسالة دي حبوبتي الله يرحمها.. وهو بيكورك ليها" قال ليها وتبدو على وجهه فرحة ممزوجة باندهاش "يعني بحب رسالة دي؟" قالت ليهو "ايوا حب فظيع.. هيييي اقسد فزيع" نظر إليها قال "ياااااااي نفسي اشوف جدو خرفان وبحب كمان.. كان بدلعها؟.. بيقول ليها شنو بالدلع؟" قالت ليهو وهي تفتعل الحنكشة "كان بيقول ليها رُسالين" قال لها وهو ينفض في ايديهو جذلا" يااااااااااي.. حلو.. حلو.. رُسالين..وجدو اسمو منو يا كلتو؟" "جدو اسمو.. اسمو..اسمو.. تورشين" (يااااااي.. ليه كدا؟ الاتنين؟.. وحبوبتك بتدلعو تقول ليهو شنو؟) "بتدلعو بتقول ليهو جمل الشيل" قال لها وهو متردد.. خوفا على مشاعرها ( كلتو.. سوري يعني.. ما تزعلي مني.. حبوبتك عندها خلط بايلوجي.. يا تور.. يا جمل) ثم أردف بعد الاعتذار "ممكن يا كلتو نمشي نتفرج في جدو؟" مش الاثنان ودخلو لقهو مصنقر في نص العنقريب.. سلم عليه "جدو.. هااااااااي".. لم يستوعب العجوز النضم قال "منووووو؟" استدرك صاحب كلتو..الموقف فردد "جمل الشيل.. هاااااااي" صاح العجوز "الرسالة؟ تااااااااني جيتي؟" ثم بضحكة خبيثة جدا وبصوت خفيض "انتي يا الرسالة سعرتي؟.. حسي ما كنتي هنا؟" أرادت كلتوم تصحيح الأوضاع وخوفا من استطراد جدو في حالة سعر الرسالة وتفلت الاوضاع من يديها قالت "جدو.. دا.. ننوش صاحبي" ما زال العجوز يتمعّن في صديق كلتو ولم يعر لكلام كلتوم أي اهتمام "الرسالة؟.. منو الزينّك وحلق لك صلعة كدي؟" بعد أسبوع في الجامعة.. كان يجلس مع شلتو واقترح عليهم "رايكم شنو نمشي رحلة لبيت ناس كلتو؟.. ونتفرج في جدها.. ثم نفض ايديهو الاتنين زي الفيهن موية تعبيرا عن التعجب والعجب والاستعجاب وعلى وجهه علامات الاندهاش مخلوطة بحسادة ميكية"ياااااااااي.. فزيع فزيع.. جدو خرفان بالفرنساوي.. حزها والله.. حزها". الباب البجيب الريح- صحيفة اليوم التالي
