الحب والأمطار الربكة العاطفية:- .. أن تكون أنت ومن تحب قاعدين قعدة رومانسية في إحدى الحدائق وتصب المطرة وتتلخبطو في النهاية تتحشرو تحت شدرة قصيرة .. زي السواسيو الانهيار العاطفي:- أن تكونو أنت ومن تحب راكبين ركشة في قمة السكون والتصالح والهدوء العاطفي، وهي متشعبطة في يدك.. فجاة في موية المطرة الركشة تقع في حفرة.. تطلعو من الركشة انتو وسيد الركشة زي السواسيو. الانزلاق العاطفي:- تكونو ماشين انت ومن تحب.. في الشوارع والطين.. وتجو جنب خور صغير انت تنط.. وتمد يدك لحبيبتك الغليدة عشان تنط.. جمبلوووووغ هي تقع في نص الخوير وتجرك وانت تنزلق تقع معاها..وتعافرو وتمرقو الاتنين من الخور زي السواسيو!! حننا الحنانة تحنن فيهن للعيد.. هي وبناتها الاتين الصغار انتهت.. البنت مشت تجيب القروش من الابو لقتو قاعد مسكين يعاين للحيطة الرمتها المطرة رجعت ومدت القروش لامها وقالت: " يمه هاكي.. لكن لقيت أبوي مصنقر متمحن يعاين للحيطة الرمتها المطرة.. يحنن". جارتها الجاتهم عشان تسوق الحنانة تحننها هي واختها.. قالت ليها "غايتو جنس بزار؟؟؟.. مخير الله .. انتو مادام ابوكم بيحنن خسرانين وجايبين حنانة لي شنو؟؟" فاصل إعلاني:- كانت مع المغرب ترقد في عنقريب قدام غرفتهم الوحيدة تهدهده عشان ينوم على انغام ""النوم.. النوم.. النوم تعال.. سكت الجهال" أصبحت تشيلو وهي قاعدة في الصقيعة وهي كاضمة متمحنة وهو ينوم على أنغام فرقة قعونجات امدر"غوووغ.. غااااااغ.. غوووغ.. غااااغ.. غووغ.. غااااغ.. غووغ" دعاء الاستسقاء وضعت على وجهها كل صنوف وألوان وأشكال المكياج وهي ذاهبة إلى زواج صديقتها.. كان شافعها حمودي ذو الست سنوات.. يبكي ويجعر وهو ماشي وراها على خشم باب الشارع "وااااااع.. سوقيني معاكي.. واااااع... سوقيني معاكي".. انتهرته وقفلت باب الشارع بعد أن كوركت للشغالة "تماليت... تماليت.. تعالي امسكيهو".. خمت الشغالة حمودي... وهو يرافس ويكورك لي امو بطول حسو "شينة.. شينة.. شينة.. إن شاء الله يا رب تصب مطرة تخرب ليكي وشيكي دا كلو.. أها بس". فاستجاب الله لدعاء استسقاء حمودي.. وصبت مطرة.. ورجعت أم حمودي البيت ووشيها ملخبط.. فاستقبلها حمودي بالهتافات بعد أن تمعن في وشيها هنيهة فاخذ يصفق بايديهو وينطط "البعاتية جات.. البعاتية جات.... البعاتية جات"!!! ثم وصلت رسالة بالموبايل لحمودي "نؤيدكم ونشد من أزركم.. التوقيع:- أبوك"!!!! تنقيح:- كان مكتوب علي ضهر ركشتة باللون الأزرق (ما تشكّر لي الراكوبة في الخريف).. بعد مطاردة استمرت تلاتة ساعات قبض الركشة من نص السيل، شنقل الركشة.. استبدل كلمة "راكوبة" بي كلمة "ولاية".. وهو ينقنق "كلو عند العرب رواكيب" . الباب البجيب الريح- صحيفة اليوم التالي