نلعب نهائي سيكافا بروح عالية أهدافنا من المشاركة في سيكافا كتيرة وكتيرة جداً بحمد الله حققناها كلها وما حققناه منها هو الأهم تبقى هدف وحيد وهدف وحيد يحقق الهدف الوحيد الذي تبقى والهدف الوحيد كفيل بأن يجمعنا بالمطار ومافي مريخابي بوصفوا ليهو درب المطار كلنا بنعرف درب المطار كويس التقينا فيهو قبل كده كتير مرة في سيكافا الأولى ومرة في مانديلا ومرة للشارقة ومرة لي دبي وجوبا قبل تبقى عاصمة دولة أجنبية برضو كانت سبب لقاء جميل لينا وتلاقي بالمطار يبقى بنعرف درب المطار كويس ما زي الناس الما بمشوا المطار الا عشان يسافروا للعلاج او يستقبلوا جثمان ودي فرصة طيبة لنودع مطار الخرطوم بانجاز جديد ونفتح صفحة جديدة مع المطار الجديد ويا حلاوة المطار الجديد الشديد لما ندشنوا بي جوية المهم نسأل الله ان يكفينا شر الحاسد والشناف لتتواصل مسيرة الاعداد والعودة لمنصات التتويج حقيقة البلد دي في حاجة شديدة لي فرحة تنسي الناس احزانها المهم الصحف الزرقاء خرجت علينا بالامس وكلها تتفق في معنى واحد هو لجوء الهلال للفيفا وفيهم ناس قالوا يجيبوا محامي البرير محامي البرير الطلع البرير بريء والحيمودي جضمو وارم وناس قالوا يودوها لوزان الموضوع كلو يدور حول رفض الشكوى طيب وكت النتيجة بتاعت الشكوى لسه ما طلعت ليه الكلام عن تصعيدها للفيفا ؟؟ يبقى كلام رئيس الزمالك صاح قال عرفنا قرار الاتحاد الافريقي وعرفنا ان المباراة تحصيل حاصل لذلك لم نجتهد ولم نجهد لاعبينا كورة نتيجتها لا بتقدم ولا بتأخر وده كلام العقل أيها الناس لا لوزان ولا حلاوة لبان فيتا في الميدان ولان فيتا ومازيمبي ضعيفان عملو فيها اسود على الهلال والزمالك اتوقع ان تكون آخر مراحلهما هي هذه المرحلة اسد على الزمالك والهلال وفي سطيف نعامة ونشوف أيها الناس بعد ان خرج ابو الهل كعادته من المولد بدون حمص اتوقع ان يتوجه اعلامه الى اكمال البنيات التحتية استجلاب جهاز فني قدير اربعة محترفين من العيار الثقيل الكاردينال يقسم بان يظفر الهلال بالدرة الفريدة وبعد داك يدخلوا في موضوع شعار عصمت وبعدها يكون الموسم انتهى لا محترف ولا بطولة ولاجهاز فني ولا بنيات ولا شعار عصمت مكنكش في شعارو والراجل ماسك شديد المهم كلنا بالدعوات مع الشفوت وننتظر بالمطار يا حبذا لو من دواعي الوطنية كان معنا في المطار شجرابي أيها الناس إن تنصروا الله ينصركم أها نجي لي شمارات والي الخرتوم كان شفت يا والينا بلدنا كانت بلد الافراح النور يجي نفرح الشاي يجي نفرح الغدا يجي نتزحزح ونفرح المطر يجي نفرح السيل يجي نفرح المطر يفوت نفرح السيل ينشف نفرح نقوم من النوم من التعب نقولها اح برضو يا والينا نفرح اسي بقينا نصحى نزعل نحيا نزعل المطر يجي يلقانا حيين نزعل السيل يجي وما يشيلنا نزعل الدولار يصل السما ما بنقول ليه وما بنسأل سلك كهربا ننساك كيف والجمهورية يادوبك دايرة تعرف اسباب الغلاء.... موش لينا حق لما نلقى روحنا حيين نزعل !!! والللللللللللللى لقاء سلللللللللللللللللللك في السلك - بابكر سلك صحيفة الإنتباهة
