ساعات معدودات ويعود السر قدور ليرسم الدهشة ويصنع المتعة عبر البرنامج الجماهيري (أغاني وأغاني).. وبعد ثماني سنوات من الرهان الذي لا يخيب والنجومية التي لا تغيب، لا يبدو قدور متخوفاً من احتمال أن (تمسخ كثرة الطلة خلق الله) بل يراهن على أن (أغاني وأغاني) سيتمدد أكثر وسيحافظ على بريقه لأنه عرف كيمياء الشعب السوداني العاشقة للتجديد، وإلا فالتغيير والبحث عن برنامج آخر، فقد شهد البرنامج عبر سنواته الثماني الكثير من التجديد لكن ذلك لم يمنع السر قدور من إعداد خلطة جديدة وسحرية لنسخة هذا العام التي لن تقف عند حدود ترديد أغاني العمالقة وجيل الرواد، بل سيخرج البرنامج إلى تواصل حميم مع عدد من فرسان الكلمة ونجوم الغناء، مع اختيار مجموعة منسجمة من الفنانين بالتركيز على عددية أقل من تلك التي ظهرت في النسخ الأخيرة.. لم يقل قدور من قبل رأيه في فنان من الذين شاركوا معه في البرنامج، لكن (اليوم التالي) وعبر حوار مطول أجبرت قدور على إصدار أحكامه على جميع الأصوات التي ستظهر معه في نسخة هذا العام كما سنطالع كل ذلك عبر تفاصيل هذا الحوار: * الجديد في أغاني وأغاني؟ - العالم كلو جديد في جديد، لماذا لا يكون هناك جديد في أغاني وأغاني؟ الجديد شديد فقط انتظروا لساعات. * طيب بتحديد أكثر؛ الإضافات الجديدة؟ نبدأ على مستوى الأفراد مثلاً؟ - كويس.. طبعا أنا زول سمعي نضيف وبلقط الصوت الجميل من أول همسة، استمعت لإنصاف فتحي فوجدت فيها اللونية التي يحتاجها البرنامج وأعجبني صوت الابن عمر جعفر فقدمته للبرنامج وأنا واثق من أن الإضافات الجديدة ستحقق النجاح المطلوب. * والأعمال الجديدة، نطمع في حاجة خاصة بالسر قدور في نسخة هذا العام؟ - طبعاً، لي عمل عن الشهر الفضيل باسم (شهر رمضان شرفتنا) وسيتم تقديمه عبر حلقات البرنامج بإذن الله. * ما زلنا شغوفين للتعرف أكثر على الجديد؟ - طيب، سنقدم لمسة وفاء لعدد من الراحلين من الفنانين الذين لبوا نداء ربهم هذا العام مثل مبارك حسن بركات وعثمان اليمني بحضور أسرهم، كذلك هناك حلقات سيشارك فيها عدد من الفنانين أو أسر بعض الراحلين من الفنانين والشعراْء، سيشارك في إحدى الحلقات محمود علي الحاج ومجذوب أونسة ومحمد النصري، وحفيد الشاعر أبو صلاح والفنان النور الجيلاني.. كذلك هناك حلقات ستشارك فيها أسر الراحلين حسن عطية والشاعر الفذ إسماعيل حسن وعبيد عبد الرحمن وعبد الرحمن الريح. * في حلقة أخدت معاكم وقت طويل؟ - زمن تسجيل الحلقة بين الساعة ونصف الساعة، لكن في حلقة كان ضيفنا فيها الفنان النور الجيلاني حضرها الوزير أحمد بلال وزير الثقافة والإعلام، قال زمنو ضيق وما عندوا لينا أكتر من نصف ساعة لكن لما قعد معانا نسى نفسو وزمنو وقعد معانا خمس ساعات أو تزيد قليلاً ونحن قلنا لو ما الوزير مشى أصلوا ما بنقول خلصنا. * طيب زي ما الوزير انبسط أظن في فنانين زعلانين من البرنامج؟ - أنا ما خليت فنان يزعل، كلهم رضيانين ومبسوطين مني وأي فنان أديتو الفرصة بأي شكل من الأشكال. * على الأقل مثلاً في فنانين بيطلبوا المشاركة في البرنامج وما بيلقوا حظهم مع عم السر؟ - والله الفنانين الشباب دايماً بيقولوا لي دخلنا معاك في البرنامج، أنا ما شايف الحكاية دي بتخصم من رصيدهم، بالعكس ديل أولاد طموحين وعندهم رغبة يظهروا في برنامج جماهيري يوصلهم لأكبر عدد من الجمهور. * إنت مادي شديد، لقيت البرنامج ناجح ودفّعت ناس النيل الأزرق دم قلبهم؟ - ياخي حرام عليك، أنا آخر زول في الدنيا دي يقولوا عليهو مادي، يا اخي أنا لو مشيت البنك ولقيت الشيك ما فيهو رصيد ما برجع البنك تاني، كل يوم في وسطنا الفني في شكلة بين شاعر وفنان بسبب حق الشاعر، حصل لقيتوني متشاكل لي مع فنان؟ والله أنا بزعل شديد لما أسمع انو السر قدور مدفع ناس النيل الأزرق دم قلبهم عشان يستغل نجاح البرنامج، أنا اتجاوزت عمر الغرام والمال زي ما قال لي واحد صاحبي في داعي تقولو في حقي كلام زي دا؟ * طيب خلينا من الجانب دا.. إنت بتستقبل كيف نقد الإعلام للبرنامج؟ - طبعاً من حق أي زول ينتقد ويقول رايو، أنا ما بزعل من الحاجات دي، بالعكس بستفيد كتير من الانتقادات اللي بتقدم للبرنامج وأي زول بيشوف نفسو ناجح وفوق النقد مصيرو الفشل. * هناك نقد شديد من المساجد للبرنامج؟ لهم مني ألف تحية وسلام ورأيهم على العين والراس، لي علاقات قوية وحميمة مع عدد من أهل الدين ومعظمهم أصدقاء أعزاء لي وبيني وبينهم كل تقدير واحترام وأنا أحبهم من قلبي وأهديهم تحية خاصة في الشهر الفضيل. * عاوزين يا عم السر نعرف سر نجاح البرنامج؟ - قبل أي شي نقول القبول من الله، والله أدانا القبول ودي نعمة نشكر عليها ربنا كتير، بعد داك نجي نقول إنو المحبة بين المجموعة أقصر طريق للانسجام والتفاهم وده الحاصل بالضبط عندنا في أغاني وأغاني. * طيب وسر الضحكة ماركة السر قدور دي شنو؟ - والله ما عندها أي سر دي ضحكة حقيقية وليست صناعية وطالعة من أعماقي، من صغير عندي الضحكة دي لكن كنت (بكتما) احتراما أو قل خوفاً من كبارنا لكن هسي ما في أكبر مني ولقيت راحتي في الضحك. * والعصاية الما بتفارق السر.. سرها شنو؟ - دي بقى عندها قصة طريفة، مرة كنت ماشي في السوق في قلب القاهرة وشايل عصايتي وماشات معاي بناتي الأربعة، جا زول وسألني قال لي العصا دي شنو؟ فقلت له ما قاله سيدنا موسى في كتابه الكريم: "َأَهُشُّ بِهَا عَلَى غَنَمِي وَلِيَ فِيهَا مَآرِبُ أُخْرَى"، البنات زعلن ورجعن خلني براي في السوق ومشن اشتكني لي امهن وقالن أنا قلت عليهن غنم والحكاية بقت مشكلة كبيرة في النهاية قلت ليهم الكلام ده قالوا سيدنا موسى، في ناس مع الحداثة وما بحبوا العصا لكن الصحيح أي زول فات الأربعين يجهّز عصايتو. * فنان تمنيت لو أنه شارك معك في أغاني وأغاني؟ - حمد الريح، لكنه اعتذر لظروف السفر. * كيف استقبلت إشادة رئيس الجمهورية ببرنامج أغاني وأغاني؟ - الرئيس البشير زول ود بلد وأصيل، عزمنا إفطار في رمضان وأبدى إعجابه الشديد بالبرنامج خاصة بالأغاني الوطنية وأنا أشكره كثيراً على تلك الإشادة. * طيب البنات الأربعة، أخدن من السر الشعر ولا المسرح ولا الكتابة؟ - زينب دي سكرتيرتي الخاصة وعندها محاولات جميلة جداً في الكتابة في عدد من الصحف المصرية، وثريا متخصصة في الكمبيوتر وخطيرة في الشعر ومرات بتغني، والصغيرة أمل بعيدة كل البعد عن الشعر والغناء. * وفي البيت الكلمة لي منو؟ - يا خي زوجتي دي لي يوم الليلة أنا شغال شنو ما عارفة، الزولة دي مع بناتها في القاهرة وما جايبة لي خبر. * زينب دوماً معك في تسجيل حلقات البرنامج؟ - عشان كده قلت ليك دي سكرتيرتي الخاصة. * السر صاحب قلمي صحفي مبدع لكنه أصبح بعيدا عن الكتابة؟ - والله في صحف كتيرة طلبت مني اكتب معاها، بإذن الله سأعود للكتابة في صحافة الخرطوم قريباً جداً. * ليس لك أي جديد في الشعر؟ - الجديد في وكتير وإن شاء الله حتشوفو في برنامج أغاني وأغاني. * طيب عاوزين أوتوغرافات صغيرة قبل الوداع: رأيك شنو في حسن فضل المولى؟ - يا زول، دا الجنرال ود المدير.. في أكتر من كدة؟ * الشفيع عبد العزيز؟ - رجل مثقف جداً وله معرفة جيدة بالغناء وبكل صدق أقول إن الشفيع عبد العزيز سر نجاح برنامج أغاني وأغاني. * طه سليمان؟ - ده فنان شيخ عرب بالجد، طه صديق عزيز بالنسبة لي وبدون مجاملة وما عشان صاحبي.. طه (الضرس) صاحب صوت جميل وزول غناي بالجد. * جمال فرفور؟ - ده فعلاً فرفور، الاسم ده ما جا ساي، فرفور ده اكتر فنان بدي البرنامج حركة وحيوية وفرفرة، جمال فرفور غنى معاي في كل الحلقات من الأولى وحتى حلقات النسخة الأخيرة يعني بقى منافس لي في عمادة البرنامج. * حسين الصادق؟ - ده يا خي ربنا يخليهو ويحفظو، الولد ده ذكي شديد وبحفظ الغنا سريع وأي عمل أديهو ليهو لو ما حافظوا بيحفظ الكلمات واللحن بسرعة البرق، اخترته لأصعب أغنية فنجح بدرجة امتياز. * رأيك في نسرين هندي؟ - دي نجمة بالجد، لما تغني الحقيبة تقول غيرها ما غنت ولما تغني الغنى الحديث تقول يخلوهو ليها، دي بت موهوبة بالجد. * عاصم البنا؟ - يا زول، ده راجل مرجعية في الأغنية السودانية، عاصم استفاد من الإرث الكبير، وهو بالمناسبة حافظ معظم أغاني الحقيبة وفي أغاني كتيرة لو عاصم ما معانا في البرنامج كان من الصعب نقدمها لأنو البحفظها ما بقدر يحفظ لحنها. * عصام محمد نور؟ - يا خي صلح السؤال؛ قول لي رأيك شنو في شيخ عصام؟ الزول ده شيخنا البصلي بينا كل الأوقات أثناء تسجيل الحلقات، عصام صاحب صوت جميل وموهبة عالية وأي أغنية بغنيها زي ما صاحبها غناها، لا تشويه ولا تحريف. * إنصاف فتحي؟ - دي بقى مفاجأة برنامج أغاني وأغاني لهذا العام، البت دي ربنا يخليها، صوتها جميل جداً جداً وأي زول بسمعها في الحلقات اللي بتغني فيها بيقع ليهو كلامي. * مصطفى السني؟ - دا ود ممتاز، وهادي ورزين وصوتو جميل ومثقف. * عمر جعفر؟ - مدني قدمت لينا فنانين وشعراء ما حنقدر نشكرها عليهم مدى الحياة، عمر جعفر ده دَيْن جديد من مدني لكل الشعب السوداني، فنان صاحب صوت جميل فيهو نكهة مدني وفن مدني، لما يغني عمر جعفر وتسمعوهو حتشكروني كتير على الهدية الغالية لأنو عمر ده هديتي لي جمهور أغاني وأغاني. * طيب رأيك في المخرج مجدي عوض صديق؟ - مخرج الروائع، أي برنامج جاذب بتلقى وراهو مجدي، في نجاح أكتر من كدة. * المصورون؟ - ديل أول ناس مفروض أشكرهم، ياخي ديل مهما تكون صورتي شينة بظبطوا الحكاية ولما أشوف روحي في الشاشة لما أقول يا ربي ده السر قدور ولا بيشبهو؟ * الفرقة الموسيقية؟ - دي مش فرقة موسيقية، دي فرقة ذهبية بالجد، بس أنا حزين جداً لأنو صاحبي محمدية مافي، ربنا يديهو الصحة والعافية، لو كان في محمدية كانت النكهة حتكون أحلى وأجمل. * أكيد في جندي مجهول في أغاني وأغاني الناس ناسياهو تماماً.. - أيوه، عائشة، سكرتيرة الأستاذ الشفيع عبد العزيز ربنا يخليها دي بتقوم بي عمل كبير. * في زول عامل ليك إزعاج في البرنامج؟ - واضح طبعاً، ما شفتو أنا تعبان كيف مع جمال فرفور؟! * أها، السر لمن ينجز مهمة التسجيل على أكمل وجه ويبدأ بث الحلقات في الشهر الفضيل بيشوف الحلقات عبر (النيل الأزرق) أم يكتفي برهق التسجيل؟ - لا.. أحرص على مشاهدة جميع الحلقات وأستفيد كثيراً من مشاهدة الحلقات في تدوين العديد من الملاحظات ودائماً ما يستقبل هاتفي العديد من الاتصالات أثناء بث حلقات البرنامج للإشادة والإطراء. صحيفة اليوم التالي
