للواتساب حكاية مع الاخوة الهلالاب مجلس يجتمع بالواتساب واهلة يلتقون بالواتساب كي ينقذوا هلالاهم من الخراب وبمناسبة خراب دي اذكر قصة طريفة قبل سنوات ايام البلد لسه فيها مشروع جزيرة وقطن قصير وطويل التيلة ومصانع ومحالج تربط نهارها بليلها بدري الكلام ده ايام يوكشير ولانكشير مدورة بي قطنا ونحنا نغني وقتها في الجزيرة نزرع قطنا نزرع نتيرب نحقق امالنا ايام شعارنا الكان مرفوع لن تسقط لوزة قطن واحدة والغريبة يجيبوا ليك في التلفزيون اللوري ماشي شايل بالات القطن والقطن يتطاير منو زي فقعاات الصابون والاغنية المصاحبة شغاااااااالة لن تسقط لوزة قطن واحدة طبعاً بعد داك تغير الشعار بقى شعارنا العالي بيرفع وفشل أيضاً الشعار في رفع لوزة قطن واحدة من الارض بل قرض القطن وسيرة القطن قرض بتاعين شعارات نحنا المهم لما كان عندنا قطن قبل القطن الكاميروني جات شركات اجنبية عملت في مجال صناعة الاقطان منها مصنع المنسوجات القطنية بالباقير«اسي في الواتساب مافي » كان بشراكة سودانية باكستانية جميع رؤساء الاقسام باكستان وابن عمي محمد خير اسماعيل كان احد امهر الكوادر السودانية بذلك المصنع كان رئيس القسم من السودانيين الرئيس باكستاني اسمو وحيد وحيد ده كان لما حاجة تبوظ بقول خلاص مشى خراب كانت عبارة كوميدية منه مضت السنين ومشى قطنا خراب ومشى مصنع الباقير خراب ومشى كل العاملين بالمصنع خراب والخراب كال خطاب وضاع زمن الشباب في الواتساب المهم يجتمع مجلس الهلال بالواتساب يشطب مجلس الهلال بالواتساب بكري المدينة يستنى قروشو فاتح الواتساب وناس الهلال «اوف لاين» انقر بكري ما دخل ليك في الفايبر مباشرة معانا لما رجعوا ليهو في الواتساب لقوهوا حظرهم ليك فالتقى الاهلة الشرفاء بالواتساب عشان على رأي وحيد الباكستاني الهلال ما يمشي خراب ومن حواراتهم بالواتساب فتحوا موضوع بوتاكو بوتاكو الحبشي الجا مع امو ناس بقولوا وكيلتو وطبعاً شافوهوا وركزوا عليهو يوم مباراة الجزائر واثيوبيا الجزائريون بي سايد بوتاكو مشوا مرتين في الشوط الاول جابوا منها تلاتة اقوان ما قدر يوقف اي مرور جزائري بي سايدو واحد سماهو فوتاكو محمد خير ابن عمي هلالابي لما شاف بوتاكو قال لي ده بتاعنا الجديد ؟ قلت ليهو ايوه قال لي خلاص الهلال مشى خراب وعبارة مشى خراب هي كل ما تبقى لمحمد خير من مشروع الجزيرة والقطن ومصانع المنسوجات عبارة في الذاكرة ولكنها مؤلمة ايها الناس اوكرا اذا كانت اصابته يرجى برؤها يبقى نسجلوا ونصبر لمن يبرا نحتفظ له بالخانة شهرين تلاتة ما فيها شي بالنظر الى موهبته وصغر سنه الخانة ما كتيرة عليهو خانة يا يمة قعد فيها الزومة تسعة سنين خلاص احتجنا ليها شدييييييييد في شهر شهرين !!!! في الاوقات دي التصرف بحكمة ضرورة والنظر بعيد مفيد ايها الناس ان تنصروا الله ينصركم اها نجي لي شمارات والي الخرتوم نسألك يا والينا انت ويييييييين مشروع الجزيرة الكان فخر لينا ووييييييييين كلمة القطن الحنينة ووييييييييين شعاراتنا الرزينة بالذات العالي البيرفع يا والينا وكنا قايلين العالم كلو بسمع بقوا ونسة واتساب !!!!! ومشى المشروع والقطن والشعار الجديد خراب !!!! سلك كهربا ننساك كيف ووكت مشينا خراب تاني الا نتقابل في الواتساب، البقعد منو ! والللللللللللللى لقاء سلللللللللللللللللللك في السلك - بابكر سلك صحيفة الإنتباهة
