كامل إدريس في نيويورك ... عندما يتفوق الشكل ع المحتوى    أيهما تُفَضَّل، الأمن أم الحرية؟؟    مباحث قسم الصناعات تنهي نشاط شبكة النصب والاحتيال عبر إستخدام تطبيق بنكك المزيف    عقار: لا تفاوض ولا هدنة مع مغتصب والسلام العادل سيتحقق عبر رؤية شعب السودان وحكومته    إجتماع بسفارة السودان بالمغرب لدعم المنتخب الوطني في بطولة الأمم الإفريقية    بولس : توافق سعودي أمريكي للعمل علي إنهاء الحرب في السودان    البرهان وأردوغان يجريان مباحثات مشتركة    شاهد بالصورة.. الطالب "ساتي" يعتذر ويُقبل رأس معلمه ويكسب تعاطف الآلاف    شاهد بالفيديو.. الفنانة ميادة قمر الدين تعبر عن إعجابها بعريس رقص في حفل أحيته على طريقة "العرضة": (العريس الفرفوش سمح.. العرضة سمحة وعواليق نخليها والرجفة نخليها)    شاهد بالفيديو.. أسرة الطالب الذي رقص أمام معلمه تقدم إعتذار رسمي للشعب السوداني: (مراهق ولم نقصر في واجبنا تجاهه وما قام به ساتي غير مرضي)    بالصورة.. مدير أعمال الفنانة إيمان الشريف يرد على أخبار خلافه مع المطربة وإنفصاله عنها    وحدة السدود تعيد الدولة إلى سؤال التنمية المؤجَّل    بعثه الأهلي شندي تغادر إلى مدينة دنقلا    تراجع أسعار الذهب عقب موجة ارتفاع قياسية    عثمان ميرغني يكتب: لماذا أثارت المبادرة السودانية الجدل؟    الخارجية ترحب بالبيان الصحفي لجامعة الدول العربية    الفوارق الفنية وراء الخسارة بثلاثية جزائرية    نادي القوز ابوحمد يعلن الانسحاب ويُشكّل لجنة قانونية لاسترداد الحقوق    ياسر محجوب الحسين يكتب: الإعلام الأميركي وحماية الدعم السريع    محرز يسجل أسرع هدف في كأس أفريقيا    شاهد بالصور.. أسطورة ريال مدريد يتابع مباراة المنتخبين السوداني والجزائري.. تعرف على الأسباب!!    وزير الداخلية التركي يكشف تفاصيل اختفاء طائرة رئيس أركان الجيش الليبي    سر عن حياته كشفه لامين يامال.. لماذا يستيقظ ليلاً؟    "سر صحي" في حبات التمر لا يظهر سريعا.. تعرف عليه    والي الخرطوم: عودة المؤسسات الاتحادية خطوة مهمة تعكس تحسن الأوضاع الأمنية والخدمية بالعاصمة    فيديو يثير الجدل في السودان    إسحق أحمد فضل الله يكتب: كسلا 2    ولاية الجزيرة تبحث تمليك الجمعيات التعاونية الزراعية طلمبات ري تعمل بنظام الطاقة الشمسية    شرطة ولاية نهر النيل تضبط كمية من المخدرات في عمليتين نوعيتين    الكابلي ووردي.. نفس الزول!!    حسين خوجلي يكتب: الكاميرا الجارحة    احذر من الاستحمام بالماء البارد.. فقد يرفع ضغط الدم لديك فجأة    استقالة مدير بنك شهير في السودان بعد أيام من تعيينه    كيف تكيف مستهلكو القهوة بالعالم مع موجة الغلاء؟    4 فواكه مجففة تقوي المناعة في الشتاء    اكتشاف هجوم احتيالي يخترق حسابك على "واتسآب" دون أن تشعر    رحيل الفنانة المصرية سمية الألفي عن 72 عاما    قبور مرعبة وخطيرة!    شاهد بالصورة.. "كنت بضاريهم من الناس خائفة عليهم من العين".. وزيرة القراية السودانية وحسناء الإعلام "تغريد الخواض" تفاجئ متابعيها ببناتها والجمهور: (أول مرة نعرف إنك كنتي متزوجة)    حملة مشتركة ببحري الكبرى تسفر عن توقيف (216) أجنبي وتسليمهم لإدارة مراقبة الأجانب    عزمي عبد الرازق يكتب: عودة لنظام (ACD).. محاولة اختراق السودان مستمرة!    انخفاض أسعار السلع الغذائية بسوق أبو حمامة للبيع المخفض    ضبط أخطر تجار الحشيش وبحوزته كمية كبيرة من البنقو    البرهان يصل الرياض    ترامب يعلن: الجيش الأمريكي سيبدأ بشن غارات على الأراضي الفنزويلية    قوات الجمارك بكسلا تحبط تهريب (10) آلاف حبة كبتاجون    مسيّرتان انتحاريتان للميليشيا في الخرطوم والقبض على المتّهمين    إسحق أحمد فضل الله يكتب: (حديث نفس...)    مياه الخرطوم تكشف تفاصيل بشأن محطة سوبا وتنويه للمواطنين    محافظ بنك السودان المركزي تزور ولاية الجزيرة وتؤكد دعم البنك لجهود التعافي الاقتصادي    الصحة الاتحادية تُشدد الرقابة بمطار بورتسودان لمواجهة خطر ماربورغ القادم من إثيوبيا    مقترح برلماني بريطاني: توفير مسار آمن لدخول السودانيين إلى بريطانيا بسهولة    الشتاء واكتئاب حواء الموسمي    عثمان ميرغني يكتب: تصريحات ترامب المفاجئة ..    "كرتي والكلاب".. ومأساة شعب!    ما الحكم الشرعى فى زوجة قالت لزوجها: "من اليوم أنا حرام عليك"؟    حسين خوجلي: (إن أردت أن تنظر لرجل من أهل النار فأنظر لعبد الرحيم دقلو)    حسين خوجلي يكتب: عبد الرجيم دقلو.. إن أردت أن تنظر لرجل من أهل النار!!    







شكرا على الإبلاغ!
سيتم حجب هذه الصورة تلقائيا عندما يتم الإبلاغ عنها من طرف عدة أشخاص.



سواقتك زي الشافع البنزل من السطر
قوون نشر في قوون يوم 28 - 03 - 2014

قاعدين نتفرج...قالوا لينا بتتفرجوا في شنو؟..فتحنا خشومنا ..وقلنا قولة خير.
قلنا ليهم بنحضر في هدف مدثر كاريكا في ليوبار...هدف متل (مشوار العصاري).
الكورة ماشي (6) يوم..إلى أن وصلت المرمى.
طقطقنا اصابعينا ..ودخلنا ايدينا في جيوبنا ..قالوا لينا ما تتكلموا عن (العدس).
قلنا ليهم هسع (العدس) الدخلوا هنا شنو؟.
القال ليكم منو عاوزين نتكلم عن (العدس).
كمان الحديث في العدس منعوه.
قالوا لينا نحن عارفنكم ..لو اتكلمتوا عن (العدس)..ح تتكلموا عن (السلم التعليمي).
والموضوع بجر.
والكلام بجيب الكلام.
تاني رجعنا وقلنا ليهم : (والله ما في أي علاقة بين السلم التعليمي والعدس).
دي زي علاقة الزول البكون عندو (صلعة) ولابس (شُرابات)...(جوارب) يعني.
قالوا لينا ..نحن حفظناكم حفظ ..لو اتكلمتوا عن (السلم التعليمي)..ح تفتحوا ملف (طبق النيلين).
وقت جابوا لينا سيرة (الطبق)...انعدلنا في قعدتنا ..وقلنا ليهم بالحيل..نحن من قبيل عاوزين نصل للنقطة دي.
عليكم الله في داعي هسع خالد الاعيسر تتم اقالته من منصب مدير قناة النيلين بالانابة ..ويتم تعيينه نائباً لرئيس مجلس الادارة.
يعني ح يبقى مسؤول كذلك من القومي والنيلين وانغام والنيل الازرق ذاتها.
على كدا الزول دا قرب على (الشروق).
فهمونا الحكاية دي انتوا.
اشرحوها لينا ...نحن غلبتنا عديل كدا.
يمكن يكون سمعنا غلط.
يمكن في الاساس في غلط في (العجور).
عجور شنو؟.
أنا قلت عجور.
شيلوا (العجور) دا بره.
دا عمود ولّا سلطة؟.
زول تتم اقالته من منصب عشان اخفق في حاجة ..وطلع ما خلى زول ما اتكلم عنو على الهواء مباشرة.
ووصلوا معاه للمحاكم.
وسفير السودان في يوغندا ذاتو ما سلم منو؟.
يجوا يعينوه في منصب اكبر.
فهمونا يا جماعة.
القرع دا ما وقع لينا.
قرع شنو كمان؟.
أنا قلت (قرع).
شيلوا (القرع) دا بره.
عمود هو ولاّ (غداء)؟.
يا جماعة انتوا بتلعبوا علينا.
بتغشونا انتوا.
يعني في البلد دي الزول البخفق في حاجة بتم ترقيته وترفيعه إلى منصب أعلى.
الموضوع دا كلو كدا ...زي واحد مشى البحر.
دي فيها حاجة.
في البحر زولكم رمى سنارتو.
دي فيها حاجة.
صاحبكم من الصباح لمن قربت تمغرب ..ما صاد ليه ، ولا سمكة.
دي فيها حاجة.
زولكم ما خلى ليه (نرفزة).
اتنرفز في الدنيا دي جنس نرفزة.
دي فيها حاجة.
اخر حاجة ..وقت زهج خالص ..والواطه ذاتها مغربت ..قال يقوم يشيل (قفتو) فاضية ويرجع البيت.
دي فيها حاجة.
هو بفكر في الرجعة ..وكيف يقنع زوجتو انو ما صاد ليه أي حاجة ...(السنارة) غمزت.
دي فيها حاجة.
زولكم اتبسط في الدنيا دي جنس انبساطة.
قعد يجر ليك في (الجبادة).
بعد 35 دقيقة ...قدر ينفض ليك (السمكة) بره البحر.
مشى عليها ...لقى ليك السمكة قدر (الشولة).
حاجة خسارة يقول عليها من الاساس (سمكة).
سمكة اسم بس ..زي (الختم).
يمين من صغرها ...(ريحة) سمك ما فيها.
دي الريحة كتيرة عليها.
دي فيها حاجة.
الزول دا (خجل) في الدنيا دي جنس خجل.
اتعقد مرة واحدة.
دي فيها حاجة.
زولكم عاين للسمكة كدا ..وقال والله السمكة دي ذكرتني ليك ناس المريخ.
طاروا من دور ال (64).
واتعادلوا في الممتاز مع الاهلي شندي في شندي.
واتوفيستر نام.
وعلاء الدين يوسف عمل مشكلة مع ابراهومة.
وهيثم مصطفى قال عندو (جيوب انفية).
وجمال الوالي زعلان.
وعصام الحاج بقى يكتب في المقالات زي (الدركسون).
اول الدركسون بكتب مقالات.
وفرحانين.
فرحان أوي.
عارفنهم فرحانين بي شنو؟.
فرحانين عشان غلبوا النسور (سبعة).
عليكم الله في تواضع اكتر من كدا.
في تدهور اكتر من دا.
انتوا يا مريخاب البفرحكم شنو؟.
فوز على النسور عمل فيكم كدا ..طيب لو اتأهلتوا للمجموعات كان عملتوا شنو؟.
اها هسع يا جماعة باختصار شديد كدا ..وبدون لف ودوران ..سمكة الزول (الفوق داك) زي فوز المريخ على النسور.
صاحبكم اتشمر ...ورمى ليكم السمكة في القفة ومشى البيت.
اول ما دخل الحلة ..قابلتو ليك (المدام) وهو شايل قفتو ...قالت ليه ان شاء الله خير يا أبو العيال...البشوفك شايل (القفة) بتشهيه (السمك).
إن شاء الله ما عدمناك يا أبو الرجال.
أبو العيال زول صعب ..قال ليها خير ..ونزل (القفة) من كتفو.
تعاين ليه كدا ..تقول الزول دا جاب ليه تمساح...هو شايل ليه (سمكة) زي سرحة اللحمة البتدخل بين الضروس.
المدام مشت على (القفة) لقت ليك السمكة زي (السريحة)..عاينت ليك في السمكة (10) مرات ..مرة واحدة ما بتشوفها.
وهاجت ليك في الراجل ..قالت ليه هسع دي سمكة تجيبها لينا في (انصاص) الليالي.
دي سمكتك مع الرجال.
وكمان شايلها في (قفة)...كان افضل لينا ..وعشان ناس الحلة ما يشيلوا حالنا ..كان افضل تجي شايلها في (جيب الساعة).
ولّا كان يمكن تدخلها في موبايلك في مكان (الشريحة)...بدل ما تجي متلتل ليك (قفة) في ضهرك بالشكل دا.
هسع انا اقول للناس شنو؟.
اقول لنسوان الحلة ايه؟.
الراجل ما كضب ..وقال ليها قولي ليهن..فزنا على النسور.
المرا ..من قال ليها كدا اتقصرت.
ما عرفت تقول شنو؟.
صاحبكم اختصر ليها الموضوع.
قمنا نحن تاني رجعنا.
تاني قعدنا نتفرج في هدف مدثر كاريكا..واحد شاف ليك الهدف ..ومعلق المباراة بعلق عليها باللغة الفرنسية.
زولكم اتخلع.
سنونو بقن في نص ضهرو.
يا زول في شنو؟..مالك اتخلعت كدا ..زي الباب المفتوح.
اول الباب المفتوح بتخلع.
الهدف.
الهدف مالو؟.
هدف كاريكا ..بعلقوا عليه باللغة الفرنسية.
ايوا بعلقوا عليه باللغة الفرنسية.
دي كيف؟..الواحد لو حول (الطبق) 26 درجة في اتجاه الشرق ..اللغة ذاتها بتتغير.
يا جماعة ناس قناة (النيلين) ديل مالهم عاوزين يلخبطونا.
قلنا ليه يا زول روق ..اقعد ساي ..الهدف ما في النيلين ...الهدف في قناة فرنسية أو قناة كنغولية.
طيب الجابو هنا شنو؟.
جابو الواتساب.
طيب عليكم الله دا هدف ولاّ (عقد) البجيبوه في (الواتساب).
اهدافكم حايمة في الواتسابات يا ناس الهلال ...والمريخاب فرحانين بالفوز على النسور.
انتوا لو دخلتوا المجموعات ...مع (الواتساب) دا ما في مريخابي بقعد ليكم في البلد.
انتوا بدون (واتسابات) معذبين الناس ..وقت يجيبوا ليكم (واتساب) تعملوا شنو؟.
طبعاً المجموعات مع الواتساب ..حاجة عجيبة ...حاجة ما بتخلص.
المريخاب اخر مرة وصلوا مرحلة المجموعات كان ذلك ايام (التلفون الثابت).
ولو ما بخاف الكضب ..اقول ليكم الكلام دا كان ايام (التلغراف).
ايام ما كانوا بقولوا ليك (عمتك ماتت قف الرجاء القيام باللازم).
زمان التلغرفات دي كلها كدا.
دي فيها حاجة.
هسع نحن في عهد الواتساب ...المجموعات ح ننقلها ليكم بالواتساب.
يعني الناس البدخلوا مباراة الهلال وليوبار إن شاء الله يوم الاحد ...لازم ينقلوا الصورة كاملة بالواتساب.
جمعة جينارو بسخن.
مهند الطاهر قاعد في الكنبة.
نزار الصاقعة بربط في الكدارة.
عمر بخيت بشرب في الموية من الصبارة ...(جنو موية).
أي حاجة انقلوها لينا بالواتساب...من التسخينة إلى احتفالات جماهيرالهلال إن شاء الله بالتأهل.
ما عاوزين لينا (واتساب) قاعد ساكت.
انقلوا لينا الفرحة اول بي اول.
املأوا الشبكة كلها فرح.
هسع بالمناسبة الما فيها مناسبة دي لو قلت ليكم حاجة قبل المباراة بتصدقوا.
ولاّ ح تقعدوا تغالطوا لي كدا.
عندنا واحد ما بعرف يسوق.
كل يوم نطلعوا ليكم من (عمود).
كل يوم داخل ليه في عمود كهربة.
نقول ليه يا التريبلي ..انت ما بتشوف البدخلك في عمود كهربة.
يقول لينا ..والله أنا من تمغرب ..ما بشوف.
بنقول ليه يا التريبلي وينك وين المغرب؟ ....الساعة يا دوب واحدة ظهرًا.
التريبلي بقول لينا..يا جماعة الله انا واطتي بتمغرب من تسعة صباحاً.
يعني واحدة ظهرًا دي عندي نص الليل عديل كدا.
بنقول ليه بتمغرب من تسعة صباحاً ليه؟..انت قايل نفسك في (استراليا).
التريبلي سواقتو كعبة ..زي الشافع البنزل من العمود..قدر ما تقول ليه اكتب فوق العمود ...تلقاه نزل منو.
التريبلي دا كدا ...في شارع الزلط تلقاه ماشي في (الترتوار).
عشان كدا ما بخلي ليه عمود كهربة حايم.
عليكم الله هي وينها (الكهربة) عشان يعملوا ليها (اعمدة).
بعدين مع (العولمة) الحايمة دي ..الكهربة ذاتها توصيلها مفروض ما يكون عبر الاعمدة والاسلاك ..والكلام القديم دا.
مفروض الكهربة يوصلوها ب (الواتساب).
العالم اتقدم ..استفيدوا من (التقنية) دي ..بدل ما تقعدوا لينا كدا زي (الجركانات) الفاضية.
اول الجركانات الفاضية بتقعد كدا؟.
غايتو يوم الاحد..أنا لا بعرف جركانات فاضية...لا بعرف التريبلي ذاتو ..ولا بعرف اعمدة كهربة.
شفتوا يوم الاحد (كورة بس)...من تصبح على استاد الخرطوم..حوموا بي اعلامكم ..شيلوا شعاراتكم.
خلوا الاستاد كلو (ازرق).
البسوا ازرق ..والما عندو فانلة زرقاء أو قميص ارزرق ..يجينا لابس ابيض.
عاوزين ندخل المجموعات بي فهم.
المباراة يمكن ان تكون منقولة في (بن سبورت).
والعالم كلو ح يتابع معانا.
عاوزين حصص مختلفة.
عاوزين فهم جديد.
انتوا (هلالاب)...عارفين القيمة دي ...عارفين (الفرحة) دي.
نظموا الحكاية.
الخرطوم دي عاوزنها كلها بالازرق الكامل.
اعلام الهلال خلوها مرفوعة من الصباح.
وانتوا يا بشه ويا كوليبالي وبكري المدينة ..اقعدوا براكم..اعملوا لينا احتفالات خاصة بالاهداف.
يا كاريكا نظموا الشغلانة ..أي هدف عاوزين طريقة الاحتفال بيه تكون مختلفة.
بعدين انت يا الشغيل جهّز نفسك...واحتفل بي طريقة جديدة..عشان انت ذاتك إن شاء الله تجيب ليك هدف.
ضربة رأسية كدا...واحتفل لينا يا الشغيل.
برّفوا الاهداف في المعسكر ...وفرحوا الناس في استاد الخرطوم.
نحن في الانتظار.
ملحوظة : لو جابت ليها مطرة ..كمان تكون خير وبركة.
هوامش
انتوا معاي ...الناس عاوزة تستغرب شوية.
الناس محتاجة (استغراب).
انتوا فاكرين (الاستغراب) دا حاجة ساهلة؟.
خالد الاعيسر بعد ما رجع نائب رئيس مجلس الادارة ...يمكن يحول ليكم (الطبق) غرب.
هو نائب مدير حولو لينا شرق.
غايتو (الطبق) دا تعب معانا جنس تعب.
خلينا أي حاجة وقبلنا على (الطبق).
طبعاً ما بنقدر نقول حاجة إلّا في (الطبق).
فلاحتنا في (الطبق).
ولو في (طبق) تاني ..برضو ح نقبل ليكم عليه.
لو جابوا لينا (10) اطباق ..ما بنرحمهم.
نحن الاطباق دي اصلو ما بنرفع منها.
الطبق لو ما فيه شق ...ما بحولوه.
قالوا ليكم نحن فاضيين عشان نقعد نباري في اطبقاكم دي.
نحول فيها من اتجاه لي اتجاه.
.....
عاجل : ناس المريخ ديل بدل ما يقعدوا لينا كدا لا شغل ولا مشغلة إلى يوم 10 ابريل...كلموهم يمشوا الدهب.

انقر هنا لقراءة الخبر من مصدره.