طالعين خلاص الجنة زول واحد نفر أزف الخلاص أزف الرحيل أزف السفر مافيش مناص صدح الرصاص واتلعثم القول والنظر والله واجعني البلد الخاطرو في لمحة انكسر وانسانو راح مكتول هدر وأنا جوة ساكني البعاد والشوق زناد ولع لهيب نار المطر توّه عمرنا مع القدر والليلة نتحدى العناد المستعاد والمعتبر *** طالعين خلاص للجنة دور بالسفسفة بالله يا حاج انتباه يا زول تعال اجمع صفا قايدنا ابليس اشتباه شادّينا بي عصب الجفا راصينا صف راصعنا كف في دروب حزينة ومؤسفة عارفين صراطنا المستقيم سالكنو تقوى وحب مقيم خفقان قلوب متعففة الجنة ما رقصة زعيم ولا عرضة لما تقول كفا الجنة ما هيجة وهتاف ولا اعتكاف جوة القصور الوارفة الجنة ما خدعة اوادم بالبساطة مغلفة الجنة ليها شفيع وحيد سيّد دروبنا المصطفى *** بس انت قول سايقنا وين يا ضيم وشمسك كاسفة يا تاجر الدين بالبنادق والخنادق واجفة ملعون زمنا العشنا بيك ملعونة لحظات الوفا لي نيل حرقت ضفافو ويل خليتو بالذل اختفى من جيت تخادع بالكلام وافعالك انت معرّفة بالظلم والجور والنفاق والليلة جيت بالعاصفة سايقنا لي جنة عدن رحلة وطن مستشرفة أنا غايتو حاجز في الممر شان بت جميلة مهفهفة حورية من وعد المشير في الجنة توش نتلقفا يا سيدنا يا سيد النعيم سلم مفاتيح الجحيم عبّد طرقنا وارصفا متعنا بي شوفتك سنين فردوس حنين بريادتك انت ح ندلفا الوعد وعدك يا مشير وانت الأمير كاتب حروفنا وعازفا *** مبروك عليك مليون سنة لا لحظة طليت بالهنا كل الموارد لاهفا والليلة جيت تغزو الجنان سايقنا نحن معاك كمان بؤس وذهان .. نقمة وحفا أرحمنا يا سيدي الرئيس وسوق معاك (عبدو) التعيس لو كان بدنياك اكتفى خليهو يتلفت هناك ويرقص معاك رقصات مريبة مزيفة زي حكمك الطاغي ارتباك يحرق سنينو ويصرفا اطلع براك خلينا نخمد نار بلاك خلي الفراق يصبح شِفا لي شعب محبوس في خطاه لا قدرت انت تعيش معاه في الدنيا لا بيك احتفي في الآخرة راسم منتهاه لا راضي يقبل ذل شقاه أو لحظة يوم عنك عفا
