بالأمس تم تدشين مشروع الدعم المريخي المكان كان قدر المقام نادي النفط الرائع وادارته المضيافة الحضور من البكور مجلس شورى مجلس ادارة اقطاب جماهير وشفووووووووت ايمن المصري شرفنا وجميع القنوات والاذاعات الفيها فائده كانت حضوراً مشرفاً وكانت ضربة البداية غايتو تاني قروشنا الا نختها دولار عشان المكان يشيل بالسوداني الا نخزنها في الوطن كلو المهم المشروع ناجح فقط يجب أن يدار بدقة وشفتنة ويا ادروب اللجنة الاعلامية يجب ان تضم كل الاعلاميين ما معقول يكون معاوية الجاك واسماعيل حسن وحسن حمد بره منها ما معقول اولادنا المحررين الشفوت يكونوا بره منها ما معقول اعلامي زي زهير عبادي يكون بره منها وكل زول من ديل يستطيع ان يقدم الكثير في هذا المشروع الرائع والاستاذة الاعلامية بدرية يمكنها من موقعها ان تقدم الكثير فهمتني يا ادروب؟ المهم البعض يتمنى ان يخرجنا الترجي من المنافسة ونحن نريد ان نخرج الترجي من المنافسة ولينا اسباب اولها ان الترجي ليس اكبر منا وتانيها دايرين نلم الترجي والصفاقسي والإفريقي في الكونفدرالية عشان التلاته يقعوا من الجماعة في مجموعة واحدة طبعا اذا المكرر وقع الجماعة مع تشاد او افريقيا الوسطى خلاف كده المكرر بكون آخر مباريات اخوتنا الافريقية المهم تمنياتنا لابو الهل ان يتخطي دور المكرر ويقع في مجموعة واحدة في الكونفدراليه مع الترجي والصفاقسي والإفريقي أرنب وسط ذئاب عشان أرنبنا السوداني يأكل الذئاب التونسية كلو شيء وارد موش الجقور أكلت الكبري!!! المهم يقابل الهلال سونغا الكنغولي وسونغا في ناس في الكنغو ما بعرفوهوا لكن الهلال عودنا على ان يخرج امام الفرق الكنغولية لو قابل قميص كنغولي بطير خليهو فريق كنغولي وبحثنا عند عمك قوقل عن معنى اسم سانغا في لغة الافارقة قال لينا وانغا يعني شنو؟ قلنا ليهو ما عارفين؟ قال وانغا يعني حمد وسانغا يعني حمدان المسرحية بتقول حمدان قوم جيب شاي الله يستر حمدان ما يرسل للشاي المهم الترجي يشوف كونفدرالتو وين.. ويقابل زباينو هناك وشامي لي ريحة مطار ريحة المطار في البلد دي بنعرفها برانا منو الشماها معانا؟ عارف يا محمد عبد الماجد ريحة المطار.. مطار مطار عرفتها؟؟ ايها الناس الناس ديل جادين في بناء الجوهرة امس مشينا نكشف الحقيقة بدوا لقينا سبعة حفر وسيخ ده كلام شغل عديل كده لكن نحنا كاصحاب طوابق من زمااااان بنعرف انو الطابق بكون فيهو سبعه وخمسين عموداً امس لقينا سبعه حفر ما عارف يمكن الخمسين خفضوها الصينيين لكن احتمال الزول ده ما داير يعمل طابق.. السبعة اعمدة ديل بكون داير يعمل بلكونة برضو حلوة اخير من عدمها لكن يظهر قعدة رواد النادي الشرفاء عند نوش حاتطول ماجد اسماعيل يا ماجد اسماعيل السبعة حفر ديل جقور ما بشيلن اجروا ليكم نادي سااااااااااي المهم واحد سألني عن سبب غياب سيمبو قلت ليهو سيمبو زي شريحة الدفع المقدم رصيدك كمل بقطع طوالي دق الرصيد يا كردنة شوف سيمبو ده قاطع رصيد ولا الشبكه كعبة؟! المهم نؤيد كلام امير كمال الترجي لا يخيفنا نحترمو ونردمو ونشوف غيرو يشوف كونفدراليتو وين ايها الناس شرف المشاركة في مشروع 2870 شرف كبير والشفت ما بوصوهو علي ناديهو والتنافس بين الشفوت بدأ الخطوة الجاية التحويل بالدولار والريال والدرهم اليورو والين والبر البر مهم الحبش ديل كلهم مريخاب والمريخ هو الذي يوحد إثيوبيا وإريتريا لي اسي بكون الرقم وصل مليارين حاسب شركات الاتصال يومي يا ادروب الناس ديل ما عندهم خزن قدر المال ده ايها الناس علمتني أمي قلت ليها في زول زعلان من صلعتي يا امي قالت لي يمكن بتذكروا سنكيت قلت ليها احكي يا امي قالت لي المثل بقول اربعمية دولار الخندقاوي لي اخوك بتداوي اليد العليا خير من السفلى يا ولدي أيها الناس إن تنصروا الله ينصركم أها نجي لي شمارات والي الخرتوم كان شفت يا والينا الغاز ستة شهور رافض يجينا ويومو اليجينا يحرّق فينا يعني لازم الناس دي تعيش حزينة يا والينا؟! سلك كهربا ننساك كيف والغاز يا مننا يفرتق يا فينا يحرّق اللهم اشفي المصابين يا رب العالمين وخفف عنهم والى لقاء سلك
