سودارس : اليوم والأيام التالية بجميع دور العرض الفيلم الهندي (ريحة المطار)

الدعم السريع: الخروج من الفاشر متاح لماذا اختار الأميركيون هيروشيما بالذات بعد قرار قصف اليابان؟ 12 يومًا تحسم أزمة ريال مدريد تشكيل لجنة تسيير لهيئة البراعم والناشئين بالدامر البرهان يتفقد مقر متحف السودان القومي التفاصيل الكاملة لإيقاف الرحلات الجوية بين الإمارات وبورتسودان بيان من سلطة الطيران المدني بالسودان حول تعليق الرحلات الجوية بين السودان والإمارات الطوف المشترك لمحلية أمدرمان يقوم بحملة إزالة واسعة للمخالفات "واتساب" تحظر 7 ملايين حساب مُصممة للاحتيال السودان يتصدر العالم في البطالة: 62% من شعبنا بلا عمل! نجوم الدوري الإنجليزي في "سباق عاطفي" للفوز بقلب نجمة هوليوود كلية الارباع لمهارات كرة القدم تنظم مهرجانا تودع فيه لاعب تقي الاسبق عثمان امبده بيان من لجنة الانتخابات بنادي المريخ رواندا تتوصل إلى اتفاق مع الولايات المتحدة لاستقبال ما يصل إلى 250 مهاجرًا يامال يثير الجدل مجدداً مع مغنية أرجنتينية شاهد بالفيديو.. السيدة المصرية التي عانقت جارتها السودانية لحظة وداعها تنهار بالبكاء بعد فراقها وتصرح: (السودانيين ناس بتوع دين وعوضتني فقد أمي وسوف أسافر الخرطوم وألحق بها قريباً) شاهد بالفيديو.. فنان سوداني يعتدي على أحد الحاضرين بعد أن قام بوضع أموال "النقطة" على رأسه أثناء تقديمه وصلة غنائية بأحد المسارح شاهد بالصورة.. بعد أن أعلنت في وقت سابق رفضها فكرة الزواج والإرتباط بأي رجل.. الناشطة السودانية وئام شوقي تفاجئ الجميع وتحتفل بخطبتها تقارير تكشف خسائر مشغلّي خدمات الاتصالات في السودان توجيه الاتهام إلى 16 من قادة المليشيا المتمردة في قضية مقتل والي غرب دارفور السابق خميس ابكر تجدّد إصابة إندريك "أحبط" إعارته لريال سوسيداد السودان..وزير يرحب بمبادرة لحزب شهير الهلال السوداني يلاحق مقلدي شعاره قانونيًا في مصر: تحذير رسمي للمصانع ونقاط البيع ريال مدريد الجديد.. من الغالاكتيكوس إلى أصغر قائمة في القرن ال 21 "ناسا" تخطط لبناء مفاعل نووي على سطح القمر السودان.."الشبكة المتخصّصة" في قبضة السلطات مسؤول سوداني يردّ على"شائعة" بشأن اتّفاقية سعودية غنوا للصحافة… وانصتوا لندائها توضيح من نادي المريخ حرام شرعًا.. حملة ضد جبّادات الكهرباء في كسلا شاهد بالفيديو.. بأزياء مثيرة وعلى أنغام "ولا يا ولا".. الفنانة عشة الجبل تظهر حافية القدمين في "كليب" جديد من شاطئ البحر وساخرون: (جواهر برو ماكس) امرأة على رأس قيادة بنك الخرطوم..!! وحدة الانقاذ البري بالدفاع المدني تنجح في إنتشال طفل حديث الولادة من داخل مرحاض في بالإسكان الثورة 75 بولاية الخرطوم المصرف المركزي في الإمارات يلغي ترخيص "النهدي للصرافة" "الحبيبة الافتراضية".. دراسة تكشف مخاطر اعتماد المراهقين على الذكاء الاصطناعي الخرطوم تحت رحمة السلاح.. فوضى أمنية تهدد حياة المدنيين أنقذ المئات.. تفاصيل "الوفاة البطولية" لضحية حفل محمد رمضان انتظام النوم أهم من عدد ساعاته.. دراسة تكشف المخاطر خبر صادم في أمدرمان اقتسام السلطة واحتساب الشعب شاهد بالصورة والفيديو.. ماذا قالت السلطانة هدى عربي عن "الدولة"؟ شاهد بالصورة والفيديو.. الفنان والممثل أحمد الجقر "يعوس" القراصة ويجهز "الملوحة" ببورتسودان وساخرون: (موهبة جديدة تضاف لقائمة مواهبك الغير موجودة) شاهد بالفيديو.. منها صور زواجه وأخرى مع رئيس أركان الجيش.. العثور على إلبوم صور تذكارية لقائد الدعم السريع "حميدتي" داخل منزله بالخرطوم إلى بُرمة المهدية ودقلو التيجانية وابراهيم الختمية رحيل "رجل الظلّ" في الدراما المصرية... لطفي لبيب يودّع مسرح الحياة وفاة 18 مهاجرًا وفقدان 50 بعد غرق قارب شرق ليبيا احتجاجات لمرضى الكٌلى ببورتسودان السيسي لترامب: ضع كل جهدك لإنهاء حرب غزة تقرير يسلّط الضوء على تفاصيل جديدة بشأن حظر واتساب في السودان مقتل شاب ب 4 رصاصات على يد فرد من الجيش بالدويم دقة ضوابط استخراج أو تجديد رخصة القيادة مفخرة لكل سوداني أفريقيا ومحلها في خارطة الأمن السيبراني العالمي السودان.. مجمّع الفقه الإسلامي ينعي"العلامة" ترامب: "كوكاكولا" وافقت .. منذ اليوم سيصنعون مشروبهم حسب "وصفتي" ! بتوجيه من وزير الدفاع.. فريق طبي سعودي يجري عملية دقيقة لطفلة سودانية نمط حياة يقلل من خطر الوفاة المبكرة بنسبة 40% عَودة شريف لماذا نستغفر 3 مرات بعد التسليم من الصلاة .. احرص عليه باستمرار

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

اليوم والأيام التالية بجميع دور العرض الفيلم الهندي (ريحة المطار)

محمد عبد الماجد نشر في النيلين يوم 07 - 10 - 2015

الدكتور أول ما عاين ليه كدا ..قال لينا الزول دا عندو ارتفاع في ريحة درجة (ريحة المطار)
أنت يا محسن سيد وقت ما بتعرف ترص العلامات …ما تشتغل مع البودي قاردات ديل بدل ما تقعد ساي
غارزيتو قالوا (باع) المباراة – يعني يا يشم معاكم ريحة المطار يا تقولوا عليه : (باع)
تلاتة أقوان في عشرين دقيقة …مفروض طوالي تشوفوا (ترباس) كان قاعد وين؟..يكون مشى يشرب موية
· عندنا مريخابي في الحلة – جنو بابكر سلك ..كل ما يلاقيك في حتة يقول ليك بابكر سلك قال.
· القون يجيبو بكري المدينة – المريخابي دا قاعد يصفق لي (بابكر سلك).
· كل ما بكري المدينة يجيب ليه قون …المريخابي زولنا دا بيقول : ( الله عليك يا سلك).
· اتقطعت فيها.
· يتشقلب بكري والشكر لي بابكر سلك.
· وسلك يستاهل.
· يتألق ديديه ..يشكّر ليك سلك ..ويقول ليك : (و الله سلك أصلو ما قصر).
· مقطعها.
· المريخابي دا لو أكل ليه (سمك)..بيشكر (سلك).
· المريخابي دا عشان ما أفضحو ليكم ساكت ..نقول اسمو (حسن كوارع).
· قولوا اسمو كدا – أنتوا عاوزين تطلعوا ليه (رقم وطني).
· دا اسم (وهمي) ساكت ..ما تشتغلوا بيه كتير.
· اسم حركي.
· أحسن يوضحو ليكم الكلام من بدري.
· رأيكم شنو مع (حسن كوارع) دا ..ندخل لينا فيلم هندي اسمو (ريحة المطار).
· نحن حقنا ما بنخليه.
· وبنتحاسب بالورقة والقلم.
· عشان تاني ما تتكلموا لينا ساكت – وما تقطعوا لينا من رأسكم يا (سلك).
· الغريبة سلك كان مُصر على حكاية (ريحة المطار) – نحن كنا قاعدين ساعة ونص مع السفير البريطاني ..وسلك ما عندو شغلة غير(ريحة المطار).
· السفير البريطاني يتكلم لينا عن عمله في الدامر في تمانينات القرن الماضي ..وسلك بتكلم عن (ريحة المطار).
· السفير يتكلم لينا عن سفراء النوايا الحسنة في الهلال والمريخ – وسلك يتحدث لينا عن (ريحة المطار).
· السفير الإنجليزي (مايكل ارون )يحدثنا عن تفعيل وتنشيط التعاون الرياضي السوداني البريطاني وإمكانية زيارة الارسنال للخرطوم والعكس – سلك يتكلم عن (ريحة المطار).
· آخر حاجة لقيت ليك الكلام كتر في (ريحة المطار) – قمت قلت ليهم : (الكاس ما بشموه ..الكاس بشيلوه).
· إلّا كاس تاني – الكاس البشموه دا كاس تاني يا (حسن كوارع).
· بعدين أنتوا لمتين ح تقعدوا تشمشموا في (المطار).
· أنتوا شغالين في مكافحة تهريب المخدرات.
· يا أخوي يا سلك ..ما في ريحة مطار بشموها بي (عشرة بودي قاردات).
· بتشموا ليك في (تماسيح).
· إذا كنتوا في (الشم) بتعملوا كدا …وقت تشيلوا الكاس تعملوا شنو؟.
· البلد كانت اتملت بودي قاردات.
· تقول الكأس عاوزين يجيبوه من جزيرة الكنز.
· الجماعة ديل من التمهيدي ..من مرحلة ال (64) شغالين لينا (شم).
· من زمن عزام وهم بشمشموا في ريحة المطار.
· الكدايس ما بتعمل كدا.
· أدخل ليكم على الفيلم الهندي.
· حسن كوارع دا ما كان عندو قدرة لي (الشية).
· الشية بنتظرها من العيد للعيد.
· ما عندو قروش.
· وقت يبالغ كدا ..ويشطح بيمشي ياكل ليه (كوارع) في سوق الموردة ويرجع مبسوط وهو بغني لي عثمان حسين.
· كوارع ساكت بتخليه يغني لعثمان حسين.
· عشان كدا الناس أطلقوا عليه اسم (حسن كوارع).
· زول كورعنجي.
· ولا بكضب.
· ولا بدسها.
· حسن كوارع كان (الشية) بحلم بيها حلم.
· وقت يشم ليه ريحة شية في الحلة ..كان بطلع من الشبكة ..وبتجلي ليك في الشعر والقصة القصيرة.
· بيبقى فنان تشكيلي عديل كدا.
· زولكم ريحة الشية بتسكرو – يا ربي الشية في (عضمها) بتعمل ليه شنو؟.
· جماعتكم سكرتهم (ريحة المطار).
· حسن كوارع كان وقت يشم ليه ريحة شية ..بجري على (الفرن) يشتري ليه (رغيف) سخن.
· من نارو.
· ويقعد على إثر (ريحة الشية) دي يقرض ليك في (الرغيف) – زولكم كان بنتشي جنس نشوة.
· بدخل في الحالة 107.
· مرحلة الهزيان عديل كدا …والكلام بره الرأس.
· حسن كوارع الدكتور رسمي مانعو من الشية ..قال ليه أنت تكتفي بالريحة فقط ..إذا كانت ريحة الشية براها بتعمل فيك كدا.
· في زول الفرحة الشديدة يمكن تشقو اتنين.
· ناس المريخ ديل فرحتهم مصممة على استيعاب كاس (سيكافا) – اكتر من كدا (الممتاز) ما عندهم فيه طريقة.
· بس تقعدوا تهضربوا لينا كدا بي (ريحة المطار)..وقت نبقى على الجد تسوقوا ليكم عشرة بودي قاردات.
· وحسن كوارع كان معذبنا عذاب بي ريحة المطار.
· مرات نكون قاعدين في الحوش العصر ..زولكم فجأة كدا يطلع ليه في (شباك).
· نقول ليه يا حسن كوارع الحاصل شنو؟.
· يقول لينا شامي لي ريحة مطار.
· ومرات نكون في الحلة واقفين لينا مع ناس – حسن كوارع يقوم كدا يطلع ليه في (شجرة).
· نقول ليه يا زول مالك الحاصل شنو؟.
· يقول لينا شامي لي ريحة مطار.
· مرات نكون راكبين لينا في عربية ..حسن كوارع يجنب العربية ويشغل الهزار.
· نقول ليه مالك ؟..في لستك ضرب ..نخت إيدنا في قلبنا.
· حسن كوارع يقول لينا أبداً : شامي لي ريحة مطار.
· يا زول طيرت قلبنا …بي ريحة مطارك دا يوم بتكتل ليك زول.
· يوم جونا ضيوف هنود …كلمة عربية واحدة ما بعرفوها.
· قلنا نضبح ليهم.
· عشان ما ندخل في إحراجات ساكت ..قلنا نضبح ليهم بالهندي.
· ضبحنا ليهم (ديك).
· قبل ما نجيب الغداء – كنا قعدنا مع حسن كوارع – قلنا ليه الهنود ديل أوعك تجيب ليهم سيرة ريحة المطار ..بقوموا يضحكوا فينا.
· ونحن الهنود ديل طول عمرنا بنضحك فيهم وبتقول للزول العاوز يمقلبك أنت قايلني (هندي) – اوعك يا حسن تحرجنا مع الهنود ديل.
· حسن كوارع قال لينا جداً ..ما عندكم مشكلة…ما بجيب ليكم سيرة ريحة المطار أصلو.
· نحن قاعدين نضرب في (الديك) بالهندي..ومشغلين ليك موسيقى بتاعة زول بتقلب في النجيلة ..(مضروب شاكوش).
· الهنود ديل لو ما عملت ليهم كدا ..ما بيألكو ..ولا بتصل معاهم لي نتيجة جنهم (شواكيش) وتقلّب في النجيلة.
· المهم نحن قاعدين كدا – حسن كوارع قام.
· عرفنا ليك الموضوع ح يكبر.
· حسن كوارع قعد يدردق ليك في النجيلة.
· عمل لينا جنس دردقة.
· الهنود اتكيفو …افتكروه مضروب (شاكوش) وبيعبر عن شعوره ..ونحن عارفين حسن كوارع بكون بشم في (ريحة المطار).
· حسن كوارع ما وقف على (الدردقة) في النجيلة – الحالة وصلت بيه لغاية أنو بقى يدردق في شارع الظلط.
· تمسكو وتقول ليه الحاصل شنو؟.
· يقول ليك شامي لي ريحة مطار.
· وهو الجواز الالكتروني ما عندو.
· أنتوا المطار دا بتشمو ريحتو بلا عدل.
· حالة حسن كوارع ادهورت شديد.
· حالتو بقت صعبة.
· الزول دا علق.
· قلنا نشيلو ونمشي بيه على الدكتور.
· لكن نقول للدكتور شنو؟.
· نقول ليه الزول دا عندو (ريحة المطار).
· اتحرجنا ليك جنس إحراج.
· عبد الجبار قال موضوع الدكتور دا خلوه علي.
· عبد الجبار أخوي.
· سقنا حسن كوارع ومشينا على الدكتور.
· الدكتور أول ما عاين ليه كدا ..قال لينا الزول دا عندو ارتفاع في ريحة درجة (ريحة المطار).
· قلنا للدكتور بس كتلتو كتل – لكن عرفتو كيف يا دكتور قبل ما تفحص عليه.
· الدكتور قال لينا الحالة دي جاتني كتير.
· الدكتور أول حاجة اتفق معانا على ما قلناه أمس أن (ريحة المطار) البشم فيها سلك (ريحة بصل) ساكت.
· أما حسن كوارع فقد لخبط ليك عديل كدا في الروائح.
· ريحة (أم فتفت) يشمها ليك (ريحة مطار).
· ريحة العدس يقول ليك ريحة مطار.
· عادم سيارات ..يقول ليك ريحة مطار.
· دخان ركشة ..يقول ليك ريحة مطار.
· قلنا للدكتور طيب والحل شنو يا دكتور؟ ..الموضوع دا ما عندو علاج.
· الدكتور صنقع لينا في (المروحة) ساعة ونص.
· ساعة ونص مصنقع يا عبد الجبار أخوي.
· آخر حاجة قال لينا تعملوا لي ترسيم للقلب.
· قلنا الموضوع وصل القلب …خلاص حسن كوارع المريخ كتلو.
· عملنا الترسيم.
· الدكتور بعد ساعة ونص في المروحة ..عاين لينا ساعة ونص في التقرير وقال لينا الزول دا فعلاً بشم ريحة المطار.
· يا دكتور مطار شنو؟.
· هو شم ريحة المطار ممنوعة.
· الدكتور قال لينا بشم في ريحة مطار الخرطوم الجديد.
· قلنا ليه مطار الخرطوم الجديد (سيخة) ما ركبوها فيها …لسه ورق وخرائط …لو ظهر بعد خمسين سنة بنعتبروا انجاز ..معقولة الزول دا بشم ريحة المطار الجديد من الآن.
· الدكتور قال لينا ممكن تحصل لو الحالة تطورت.
· قلنا ليه غايتو يا حسن كوارع ..لو موضوع المطار الجديد طرشق متل كوبري الدباسين ..إلّا تشجع (النسور).
· ناس النسور ديل لو مثلوا البلد ..بدخلوك مطار الخرطوم القديم.
· قمنا ليك متنفضين ..وقلنا للدكتور أها يا دكتور …الزول دا ندفنو ولّا ننتظر بيه المطار الجديد.
· الدكتور قال لينا ادفنوه طوالي …مطار جديد شنو البتنتظروه؟ …الموضوع دا بدري عليه.
· مشينا دفنا زولنا وانتهينا من حكاية (ريحة المطار) دي.
· بعدين المطار القديم دا ريحتو ذاتها (معتتة).
· ………
· ملحوظة : إعادة الفيلم ح تكون مع مباراة الأمل.
هوامش
· غارزيتو قالوا (باع) المباراة – يعني يا يشم معاكم ريحة المطار يا تقولوا عليه : (باع).
· عبد القادر همد هو ذاتو هاجم ليك غارزيتو …وقال أسوأ مدرب أشرف على المريخ في السنوات الأخيرة.
· أما غارزيتو فقد قال محسن سيد العلامات في التمرين ما بعرف يرصها.
· رص ساكت ما بعرف.
· محسن سيد ذنبو شنو؟.
· أنت جايبو للعلامات يا غارزيتو.
· دي حقارة دي.
· وحقارة فرنسية كمان.
· اوعك يا محسن سيد يحقر بيك فرنسي.
· هي حصلت كمان.
· الكاردينال في إذاعة 104 ..أكد بقاء نبيل الكوكي.
· وهذا أفضل ما أخرجه الكاردينال.
· استمرار الكوكي أحسن لينا من بناء الجوهرة الزرقاء ذاتها.
· إذا ما كان في استقرار فني – ما ح يكون في بطولات.
· الكوكي زول شغال ..ووصل بالهلال في ظروف صعبة للمربع الذهبي.
· ومتصدر الممتاز بفارق 6 نقاط من المريخ.
· تشكيلة الهلال الحالية لو كان موجود فيها سادومبا كان الهلال حقق البطولة.
· لازم نتعلم من الدروس والتجارب.
· التسجيلات الصاح ..طريق الهلال للبطولة.
· يا الكاردينال ح نعتبرك ح تبدأ من التسجيلات القادمة.
· غارزيتو إذا استمر ..سوف يطيح به الهلال.
· واتذكروا هذا الكلام.
· عندما يخسر المريخ من الهلال ….ح يشيلوا غارزيتو.
· انتظروا بس.
· تلاتة أقوان في عشرين دقيقة …مفروض طوالي تشوفوا ترباس كان قاعد وين؟..يكون مشى يشرب موية.
· المباراة ناقصة (ترباس).
· يا همد قلنا ليكم.
· كلمناك ..قلنا ليكم اوعكم من الموية الباردة.
· الزميل محمد عوض قدم رسالة متميزة من لوممباشي وانفرد بحقائق وتصريحات خاصة.
· أنت يا محسن سيد وقت ما بتعرف ترص العلامات …ما تشتغل مع البودي قاردات ديل بدل ما تقعد ساي.
· ………
· عاجل : شامي لي ريحة سيكافا!!.

انقر هنا لقراءة الخبر من مصدره.