شُفت الفرِق..؟ ما بين تكون زول زيّنا.. زيّك وزى باقى العِباد.. ما بين تكون مسؤول كبير.. بى إمضا مِنك..تنشطِر تِلت البِلاد.. كيفن ده عاد.. والباقى ما زال يحترِق.. عِقدين ونُص .. فيها ضلينا الدرِب.. فيها المعاش بِلحيل صِعِب.. نحنا عارفين الفرِق.. وقفت خُطى التعمير تمام.. تُهنا فى وسط الزحام.. ضِقنا ملينا الكلام.. بيناتنا خُضناها الحرِب.. من الجنوب العدوى جات.. جاتنا دمرت الغرِب.. دارفورنا يا وطنى الحبيب.. وضعِك صِبِح شائك غريب.. مشهد كئيب.. شايفنوا ما زال مُضطرِب.. أما الشرق.. إنسانوا بِسأل عن وُعود.. قالوها يوم المانحين.. وين المِنح..موجودة وين..؟ لا شربوا يوم موية سدود.. لا شافوا ليهم قط طحين .. بس جعجعة..كثرة وُعود.. راجيكا يبحث عن مُعين.. لا اترسّمت عندو الحدود.. شان حلايب كان تعود.. والفشقة قُبال تنسرِق.. شُفت يا سيدى الفرِق.. تلقى المشاكل وين تروُح.. عاصمة حافيها النِزُوح.. باعوها جت ما خلو سُوح.. شان يمشو يبنوها الصروح.. بحر الفساد بلحيل عميق.. ريحتوا بانت جات تفوح.. فيهو بعض الناس غِرِق.. شُفت كيف كان الفرِق..؟ ما بين تكُون مسؤول كبير.. أو تكون زُول زيّنا.. غرقان يقاوم فى العِرِق.. بلا أقنعة.. صحيفة الجريدة..
