*كلنا شاهدنا هدف النمور الملغي *كلنا تابعنا راي سيحه في صحة الهدف *ورأيه حول الخطأ في الرايه القامت والصافره الانطلقت *كلنا تابعنا ضربة جزاء صحيحه لهلال كادوقلي ارتكبها ماكسيم لم تحتسب *وكلنا تابعنا التسلل الواضح في هدف فريق يخطئ ولا يظلم التاني في شباك اسود الجبال *وكلنا تابعنا ضربة جزاء الجماعه الاولي في مباراة اهلي مدني *وخجلت الكاميرا ام خجل المعد ام تواري رضا خجلا من اعادة البلنت التاني في نفس المباراه *المهم البلنت التاني قالوا ما اتصور عشان الكاميرا مشت محل تاني *تكون مشت تستغفر يا ربي ؟؟؟ *تلاته نقاط امام اهلي مدني غير مستحقه *المستحق نقطه واحده فقط *تلاته نقاط امام اسود الجبال غير مستحقه *المستحق نقطة واحده فقط *تلاته نقاط امام اهلي شندي غير مستحقه *المستحق نقطه واحده *ولو احتسب شانتير جميع مخالفات ناس الهلال لخرج الهلال بدون نقطه امام النمور *واسجل ليك غرامي واجيب شانتير محامي *يبقي ابو الهل من تلاته مباريات عندو تلاته نقاط *زايد نقطة امام هلال الابيض تبقي اربعه نقاط في تلاته مباريات *زايد تلاته نقاط بتاعت مريخ نيالا *تبقي الحصيله الحقيقية سبعه نقاط *يبقي مكابس مع مريخ كوستي في السقاله *معقوله زول عندو سبعه نقاط يزيدوهوا سته نقاط عشان يعمل تلطاشر ؟؟؟ *ايها الناس *لايمكن ان يكون ثمن الفوضي العملها كردنه الموسم الفات هو تتويج الهلال باللقب الجديد *حقوا نتفق علي اعطاء الهلال الكاس الجديد اليوم *لنضمن موسم نزيه ورائع وقوي *كل ذي حق فيه يأخذ حقه *لتتطور الكورة عندنا *معقوله يا روشا *تحدثونا عن رد الظلم وانتوا اظلم من ظلم ؟؟؟؟ *علي اليمين لو لا اخطاء التحكيم المقصود منها والغير مقصود *لخرج ابو الهل مثل الشتاء *ولا نقطه *اسي في خرطومنا دي في مطره في الشتاء ؟؟؟ *ايها الناس *محاربة الفساد في البلد دي فرض عين *كلو ناس يحاربوا الفساد الفي مجالهم *ونحنا كرياضيين يجب علينا ان نحارب الفساد الرياضي *باقي الفسادات ليها ناسها *يحاربوها يصالحوها يقسموها معاهم *حرين فيها *لكن في رياضتنا دي *يجب علينا ان نحارب الفساد *ومحاربة الفساد الرياضي تكمن في ان نواسي الفايت الحدود *والفايت الحدود هو الزول الخرخار والبخرج علي القانون *ثم يبحث الناس له عن مخارج *وتقدم له تنازلات *تجعله يطلع في راس الناس من جديد *ايها الناس *نحنا راسنا صلعه *والصلعه بتحرق الواطيها *راسنا سراميك *والسراميك برميك *ويكسرك حته حته *سامعني يا اب كسكته *يها الناس *ان لم نحارب الظلم والفساد بجديه *يبقي لا كورتنا بتتطور ولا حلتنا بتتنور ولا لقمتنا لغذاء مفيد بتتحور *ان لم نحارب الفساد بجديه *يبقي لا قهوتنا بتتفور ولا فسحاتنا بتتسور ولا عرباتنا بتتدور *المهم *نقابل نيل شندي الصاعد *نتمني له مباراة طيبه *بعيده عن اخطاء الحكام التي تظلمه *حتي يستمتع بالمباراه ونستمتع *نهزمه بعرق جبيننا حتي لا نشعر بتأنيب الضمير اذا سرقوا لنا عرقه *فنحن بحمد الله لا نعيش علي سرقة عرق الناس *من عصرا بدري *نجي كلنا *لنستمتع ونمتع *بس حانخت كمامه علي انوفنا *تعبيرا عن استيائنا من الرائحه النتنه التي فاحت بالممتاز منذ البدايات *ايها الناس *ان الله لايغير مابقوم حتي يغروا ما بانفسهم *اها *نجي لي شمارات والي الخرتوم *كان شفت يا والينا *قلت اتم ليك النشره اصلنا بدينا * لعطل طارئ علي اجهزة البث يا والينا *نؤجل النشره لما العطل يتصلح لينا *لكن يا والينا *للزريبه مشينا *بكم شوال الفحم يا اخينا *ابتسم خجلة وقال لينا *بخمسية *خمسمية الف جنيه شوال الفحم تصدق يا والينا *قلت ليهو مادايرين فحم تركي يا بلدينا *ادينا فحمنا البلدي البحن علينا *دايرين فحمنا المن شجرنا انقطع لينا ومن حشانا اتحرق لينا *قال لينا *منعول فهمكم يا هو فحمكم الافحمكم *سيبوا الفحم الغلي عليكم ونجضوا في حشاكم *تصدق يا والينا !!!!! سلك كهربا ننساك كيف وزمان قالوا لينا جوع كلبك يتبعك …اسي الكلب جعاااااااان وما بباريك خطوه والي لقاء سلك
